KL

DK

AMMAANERSIORNERMI OQALLINNEQ

Akileraartarnermik aaqqissuusseqqinneq illuatungiliuttut isornartorsioraat

Akileraartarnermik aaqqissuusseqqinnermi akiligassaq "tullissatsinnut ingerlateqqinneqartoq“ Demokraatit isumaqarput. Ammaanersiorluni oqallinnermi, pisarnertut oqallissutaaqisumi, partiimit oqaatigineqarpoq.

Thomas Munk Veirum
Tusagassiortoq
Saqqummersinneqarpoq

Inatsisartut ukiaanerani ataatsimiinneranni ammaanersiorluni oqalugiaat, Naalakkersuisut siulittaasuata Múte B. Egedep (IA) tallimanngormat oqalugiaatigisaa, politikerit ataasinngornermi oqallisigaat.

Oqallinneq ukiaanerani ataatsimiinnerup aallartinnerani partiit sumi inissisimaneranni ersersitsisarpoq, ilimagisaasutullu illuatungiliuttut partiiannit Demokraatinit naalakkersuisoqatigiit isornartorsiorneqarput.

Tassani partiip siulittaasuata Jens-Frederik Nielsenip akileraartarnermut aaqqissuusseqqinnerup aningaasalersorneqarnera sakkortuumik isornartorsiorpaa. Aaqqissuusseqqinneq naalakkersuisoqatigiit ataatsimiinnermi oqaluuserineqarnissaa kissaatigaat.

Akileraartarnermik aaqqissuusseqqinneq ukiumut 367 millionit koruunit missaannik akeqassaaq, Demokraatillu isumaqarput aningaasaliiniarneq aarlerinartoq. Aningaasanut inatsisissanit siunissami sinneqartoorutigineqartussat atorlugit aningaasalersuinissaq aalajangerneqarmat:

- Tunngaviatigut tamanna ajunngilaq, kisiannili oqippallaamik aarlerinarsinnaasumillu aaqqiinerulluni, taamaaliornikkut siunissami isertitarisassat apeqqutaasussaammata.

- Ingasattumik oqaatigissagaanni akiligassaq tullissatsinnut ingerlateqqiinnartussanngorlugu. Suleriaaseq taamaattoq pitsaanngitsuuvoq, qularnanngittumillu toqqarneqarsimalluni, IA aamma Siumut kissaatigimmassuk qinersisoqanngitsiarnerani tunissutissanik tunioraarusummata, Jens-Frederik Nielsen oqalugiarnermini oqarpoq.

Paviasen: Ikiortissaq utaqqiinnassanngilarput

Naalakkersuisoqatigiit partiianniit IA-miit oqaaseqartartoq Mariane Paviasen oqalugiarpoq. Partiimi siulittaasup Múte B. Egedep tallimanngormat oqalugiaatimini eqqaasaa eqqartorpaa; tassa sulisinnaasut tamarmik sulisariaqarnerat:

- Inuit Ataqatigiinni isumaqarpugut pisortanit ikiorserneqarnissamik utaqqiinnartunngorsimasut amerlavallaalersimasut inuiaat amerlanngeqisugut nunarujussuarmi najugaqartitertuusugut atukkagut assigiinneqaat ataaserli assigiimmik ingerlaffigisinnaasarput tassaavoq ikiorneqarnissamik pisariaqartitsigaanni saaffissarpaalussuaqarmat.

- Ikiortissarlu utaqqiinnarnagu nammineq aamma iliuuseqarnissamut inuttut ataasiakkaattut pisussaaffeqarnerput akisussaaffittut tigusariaqaratigu, Mariane Paviasen ilaatigut oqarpoq.

Uani qinigaaffimmi annertuumik allannguisoqaraluartoq ilanngullugu oqaatigaa. Taamaakkaluartoq naligiinnginneq iliuuseqarfigissallugu suli suliassarpassuaqarnerarpaa.

Siumut: Inissaaleqineq peqqinnissaqarfillu ukkatarineqarput

Naalakkersuisoqatigiit partiivisa aappaanniit Siumumiit politikerip misilittagaqarluartup Doris J. Jakobsenip partiip politikkia nassuiarpaa.

Ilaatigut Siumup anguniagaa uteqattaarpaa, tassa nioqqutissat nunanit allanit tikisitat akiisa qaffasinnerpaaffilerlugit inatsisiliornissaq.

Aamma peqqinnissaqarfiup ajornartorsiornera inissaaleqinerlu pissutigalugit innuttaasut Kalaallit Nunaannit nuuttarnerat eqqaavaa:

- Sulisinnaasut pisariaqartippavut, taamaattumik taakkua aamma ukkatarissavagut.

- Innuttaasut inissaqartariaqarput aamma pisariaqartitsigaangamik peqqinnissaqarfimmut saaffiginnittarsinnaasariaqarlutik, Doris J. Jensen ilaatigut oqarpoq.

Naleraq: Nunaqavissut peqataatinneqanngillat

Jens Napãtôp Naleqqameersup oqalugiarnermini kalaallit kalaallisullu oqaasillit naammattumik peqataatinneqanngitsut partiip nalileraa eqqartorpaa:

- Nunap inuisa ulluinnarni inuunerminni, soorlu pisassiissutit oqaatsillu eqqarsaatigalugit, peqataatinneqanngillat.

- Pappialatigut illersugaavutit. Illersugaasussaagaluarputit uterpara pisinnaatitaaffigalugu illersugaasussaagaluarputit salliutinneqartussaagaluarlutillu oqaaatsigut atorlugit, Naleqqami politikkeri oqarpoq, taassumalu oqaatsit tungaatigut qallunaat oqaasii pinnagit allatut isiginnittoqarnissaa kissaatigaa.

Atassut: Akisussaaffiiagaavugut

Atassutip siulittaasuata Aqqalu C. Jerimiassenip oqalugiarnermini qitiusumik aqutsineq allaffissornerlu sakkortuumik isornartorsiorpai. Múte B. Egedep kikkut tamarmik sulisinnaasut pisariaqartinneqarnerat pillugu oqariartuutaa aamma uterfigaa:

- Sulinngitsut sulilersikkusukkutsigit iluaqutaanavianngilaq oqarfigissallugit inuiaqatigiinnut pisussaaffeqartut. Tamavittaana paasisariaqaripput sulisariaqartugut uumaniassagutta.

- Ajoraluartumimmi ukiorparujussuarni aappaluttukkunniit akisussaaffiiagaasimagatta allaat sulinnginneq akilersinnaasutut ilarpassuatsinniit isigineqarpoq, Aqqalu C. Jerimiassen oqarpoq.

Avannaata Kommuniani kisitsisinut innersuussivoq:

- Ilinniartitaanikkullu kisitsisit ersaripput, meeqqat atuarfiiniit naammassisut 54 %-iinnaapput, ilinniagaqarlutillu ingerlaqqittartut suli ikinnerullutik. Kiisa aamma ilinniagaqarneq ajoraluartumik akilersinnaasimanngilaq. Kisitsisit uppernarsaasoralugit, partiip siulittaasua oqarpoq.

inuiaqatigiit samfund

ATORFIIT Se alle jobs

Powered by Labrador CMS