Suliffeqarfiit akileraartarnerannut
malittarisassat allanngortinneqarnissaat pillugu siunnersuut Kalaallit Nunaanni
kukkunersiuisartut annersaata siuttuatalu, Grønlands Revisionip, sakkortuumik
isornartorsiorpaa.
Akileraartarnermut inatsisissatut siunnersuut
akuerineqassappat tamanna suliffeqarfinnut aningaasaliinernut akornutaassaaq.
Suliffeqarfiit akileraartarnerannut
malittarisassat allanngortinneqarnissaat pillugu siunnersuut Kalaallit Nunaanni
kukkunersiuisartut annersaata siuttuatalu, Grønlands Revisionip, sakkortuumik
isornartorsiorpaa.
Akileraartarnermut inatsisissatut siunnersuut
akuerineqassappat tamanna suliffeqarfinnut aningaasaliinernut akornutaassaaq.
Kukkunersiuisarfiit ilaat aamma qallunaat
akileraartarnermut siunnersuisarfiat Revitax, isertitanut akileraarutinut
inatsisip allanngortinneqarnissaanut inatsisissatut siunnersuutip
tusarniaassutigineqarneranut ataatsimut akissumminni taamatut allappoq.
Aningaasaqarnermut Akileraartarnermullu
Naalakkersuisoqarfik inatsisissatut siunnersuut pillugu tusarniaanermi 14-inik
akissuteqarfigineqarsimavoq. Aningaasaqarnermut Akileraartarnermullu
Naalakkersuisup Múte B. Egedep inatsisissatut siunnersuut Inatsisartut ukiakkut
ataatsimiinneranni saqqummiutissavaa.
„Inatsisissatut siunnersuutip annertuumik
akileraartitsinera nunanit allanit suliffeqarfiit Kalaallit Nunaanni
aningaasaliinissaannut akornutaasinnaavoq. Tamatuma suliffissanik
annaasaqarnermik kinguneqarsinnaanera avaqqunneqarsinnaanngilaq" Grønlands
Revision aamma Revitax tusarniaassummut ataatsimoorlutik akissumminni allapput.
Nalorninartorsiortitsisoq
Grønlands Revision aamma Revitax
naapertorlugit Kalaallit Nunaanni iluanaarutit immikkut
akileraaruserneqarnissaat akileraartarnermut inatsisissatut siunnersuutip
kingunerisinnaasaasa ajornerpaat ilagaat.
Suliffeqarfiit namminneq aningaasaataat,
aningaasaliiffigineqarnerat iluanaarutillu akileraaruserneqareersimasut 17
procentimik akileraarutip nutaap kingunerisaanik eqqugaarujussuarsinnaapput.
Tassa sinneqartoorutit siornatigut
akileraaruserneqartarsimasut akileraarutit allanngortinneqarnerisa
kingunerisaannik 17 procentimik akileraaruserneqaqqissapput. Tamanna
sinneqartoorutit siunissami agguagarsiatut tunniunneqaratarsinnaanerinnaanik
peqquteqarpoq, aamma iluanaarutit agguagarsiatut
tunniunneqanngikkaluarpataluunniit.
Grønlands Revision og Revitax naapertorlugu
assersuutigalugu piginnittoq pisortaasorluunniit napparsimanini pissutigalugu
Danmarkimut nuukkallarpat akileraarutip nutaap suliffeqarfik eqqussavaa.
„Inatsisissatut siunnersuut atuaratsigu
malittarisassat maanna aningaasaliisartunut aningaasaliisinnaasunullu
nalorninartorsiortitsissapput, soorluttaaq aningaasaliisinnaasut Kalaallit
Nunaanni suliffeqarfinnik pisiumanaviarnatillu aningaasaliiumanavianngitsut.
Inatsisit atuaratsigit, akileraarutit
siunnersuutigineqartut suliffeqarfiup nalinga tamaat tunngavigissavaat,
suliffeqarfiup nalinga qaffassimanersoq apparsimanersorluunniit
apeqqutaatinnagu, tamannalu akileraarutinik naleqqutinngitsumik
taamungaannartumillu akiliisitsisussaavoq.“
Grønlands Revision aamma Revitax
tusarniaanermut akissumminni taamatut aamma allapput.
Inatsissatut siunnersuutip, Grønlands
Revision aamma Revitax naapertorlugit, inuussutissarsiortut Kalaallit Nunaanni
suliffeqarfinnut aningaasaliisarnissaat akornuserpaa. Allatut oqaatigalugu
Naalakkersuisut inatsisissaq nutaaq Inatsisartuni atuutilersinneqarpat,
Kalaallit Nunaanni suliffeqarfinnut aningaasaliisarnerit
pinngitsoortissallugulu unitsissavaat.
BDO: Inatsit maanna atuuttoq attatiinnarsiuk
Danskit kukkunersiuisarfissuata BDO-p,
Kalaallit Nunaanni kukkunersiuisarfiit annersaasa siuttuusullu ilaasa, Kalaallit Nunaanni akileraartarnermut inatsit
maanna atuuttoq allanngortinneqassanngitsoq inatsisissatut siunnersuut pillugu
tusarniaanermut akissummini inassutigaa.
BDO-p assersuutit marluk taavai, taakkulu
„kalaallit ingerlatseqatigiiffiinut assersuutaalluarlutillu“ inatsisissatut siunnersuutip kingunerinut
assersuutaapput. Tassa inatsisissatut siunnersuummi iluanaarutit piunngitsut
akileraarutaanissaat piumasarineqassammat.
Naalakkersuisut Aningaasaqarnermut
Akileraartarnermullu Naalakkersuisoqarfik aqqutigalugu isertitanit
akileraarutip allanngortinneqarnissaa pillugu inatsisissatut siunnersuut juunip
20-aniit juulip arfernata tungaanut tusarniaassutigisimavaat.
Inatsisissatut siunnersuut pillugu oqallinneq
sakkortuumik, aap, ajornerpaamik aallartippoq. Grønlands Revisionip aamma BDO-p
saniatigut ilaatigut eqqartuussissuserisut Arctic Law Greenland,
sanaartortitseqatigiiffissuaq Permagreen, nunatsinni aningaaseriviit annersaat
Grønlandsbanken aamma inuussutissarsiortut kattuffiat Sulisitsisut Sermitsiami
allaaserineqartutut sakkortuumik isornartorsiuipput.
