Akileraarusiisarnermik iluarsaaqqinneq pissutigalugu millionikkaat innuttaasunut tunniunneqassasut
Akileraartarnermut aaqqissuusseqqinnerup kingunerisaanik 17,4 millionit koruunit missaat innuttaasunut 21.298-inut agguaanneqassapput.
Assi: Leiff Josefsen
Naalakkersuisooqatigiiusimasut Inatsisartullu akileraartarnermut aaqqissuusseqqinnermik annertuumik ukiaq naammassisaqarput, tassani akileraartartut aalajangersimasut ukiumut 100 millionikkaanik koruuninik akileraarnikinnerulersinneqarlutik.
Aaqqissuusseqqinneq januaarip aallaqqaataani atuutilerpoq, aningaasallu siulliit maanna innuttaasunut tunniunneqartussanngortut aningaasaqarnermut akileraartarnermullu naalakkersuisoqarfik paasissutissiivoq.
- Katillugit 17.395.615 kr.-it tunniunneqartussanngorput.
- Innuttaasut 21.298-it Nem-kontoannut 101 kr. 1.313 kr.-llu tikillugit aningaasanik ikisisoqassaaq, naalakkersuisoqarfik tusagassiorfinnut nalunaarummi allappoq.
Akileraarusiisarnermik iluarsaaqqinnermi allannguutaanerpaaq tassaasoq sulinermut ilanngaat naalakkersuisoqarfik allappoq. 2025-mi innuttaasunut sulinerminniit ukiumut 70.000 - 500.000 kr.-it akornanni isertitaqartut pissarsisalissapput.
- Suila-tapit-nik taagorparput, naalakkersuisoqarfik allappoq.
Qaammatit tamaasa marlunngornerit pingajuani tunniunneqartassapput
Tunniunneqartut siulliit taakkuupput sulinermiit aningaasarsiat, tunisinermiit isertitat, akileraarutit B-t aammalu suliffeqarfinni iluanaarutisiat januaarimut tunngasut. Suila-tapit qaammatit tamaasa marlunngornerit pingajuanni tunniunneqartassapput.
Akileraartarnermut Aqutsisoqarfik ukiumut isertitassatit 160.000 kr.-it aamma 250.000 kr.-it akornanniissasut naatsorsutigineqartut nalunaarfigineqarpat Suila-tapinik qaffasinnerpaanik pissarsisoqartassaaq.
Qaffasinnerpaaq qaammammut 1.313 kr.-iuvoq.
Ukiumut isertitassat 70.000 – 160.000 kr.-it imaluunniit 250.000 – 500.000 kr.-it akornanniittut naatsorsuutigigukku appasinnerusunik Suila-tapisisassaatit, naalakkersuisoqarfik nangilluni allappoq.
Akileraarusiisarnermi iluarsaaqqinneq innuttaasut akornanni aningaasaqarnikkut assigiinngissut annikillisarniarlugu aammalu sulinermik kajumilersitsinissaq anguniagaavoq.
Ilanngaat pillugu annertunerusumik paasisaqarnerorusukkuit Naalakkersuisut.gl-imi atuarit.
