AKILIUTIT AJUTOORNERAT
Akiliutinik akiliiniarnermi ajornartorsiorneq aaqqiivigineqarsimasutut isikkoqarpoq
Kalaallit Nunaat, Danmark aamma Nunat Avannarliit sinneri kortimik akiliinermi ajornartorsiuteqarnermik eqqugaaqqapput. Nets-imi ajutoornerup pissutaa suli nassaarineqanngilaq, Netsip tusagassiinermi pisortaa Søren Winge Ritzau-mut oqarpoq.
Arfininngornermi ualikkut kingusissukkut nunatsinni aallartittumik kortimik akiliisarnerit annertuumik ajornartorsiutigineqalerput.
Assiliisoq (toqqorsivimmit): Signe Goldmann/Ritzau Scanpix
Kalaallit Nunaanni, Danmarkimi nunanilu avannarliit sinnerini arfininngornermi ualikkut kingusissukkut unnukkullu akiliutit (betalingskortit, aaqq.) atorlugit akiliinianermi ajornartorsiortoqarpoq, Nets-ip ajutoornerata kingunerisaanik.
Danskit nalunaaqutaat malillugu nal. 22.00 missaani akiliinerit ingerlaqqilerneragaapput.
Taamak Ritzauimut ilisimatitsivoq Nets-ip tusagassiutinut pisortaa, Søren Winge.
Aallarteqqinniarnera ajornartorsiutitaqarsinnaavoq
- Pisiniarfinni allanilu akiliutit tiguneqarsinnaalernikuupput. Taamaattorli aaqqiveqqinnissaata tungaanut anornartorsiutinik nalaassisoqartarsinnaassaaq, taanna oqarpoq.
Ajoquteqarnermut pissutaasoq suli nassaarineqanngilaq.
- Nalunaaquttap akunnerini tulliutuuni malinnaassaagut, misissuillutalu paasisaqarnerorusulluta, suna pissutaanersoq paasiniarlugu, Søren Winge oqarpoq.
Taassuma nalilerpaa ajoquteqarneq nal. 19.30 (16:30 kalaallit nalunaaqutaat, aaqq.) aallartissimasoq. Taamaasilluni nalunaaquttap akunneri pingasut missaanni sivisussuseqartumik akiliutinik akiliiniarneq ajornarsisimagaluarpoq.
Nunanilu avannarlerni Norge, Sverigelu Islandilu aamma ajoquteqarnerup sunnerpai, Søren Winge TV 2-mut aamma oqarpoq.
Taamatuttaaq Kalaallit Nunaat ajutoortoqarnerata sunnerpaa. Pisiniarfinni pisiniartut inuit attaveqaqatigiittarfiini pisiniarfinni annertuunik iliuusissaaleqerrattoqartoq oqaluttuarput.
Taamatuttaaq Danmarkimi Nunatsinnilu najugallit nunani allani angalasut eqqugaasimasut tusagassiorfinnit arlalinnit allaaserineqarpoq.
