Akitsuutinik qaffaanissaq - umiarsualivinni umiarsuarnullu
Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit Inatsisartut inatsisaata allanngortinneqarnissaa pillugu Inatsisartut inatsisaattut Naalakkersuisut siunnersuutaat tigulluarneqarpoq - Inatsisartuni amerlanerussuteqarluartut isumaqatigiissutigaat umiarsuit takornariartaatsit allallu umiarsuit umiatsiarsuillu akitsuutitigut qaffaaffigineqassasut.
Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit Inatsisartut inatsisaata allanngortinnera pillugu Inatsisartut inatsisaattut siunnersuut Inatsisartut siullermeeqqammerpaat. Ataatsimoortumik isumaqatigiittoqarpoq nunarput avataaneersunit umiarsuarnit akitsuutitigut aningaasat amerlanerusut pissarsiarisariaqarai. Siunnersuut aningaasaqarnermut ataatsimiititaliamut suliassanngortinneqarpoq, partiillu akitsuutit qaffanneqarnissaat ilimananngitsumik siunnersuutigissavaat.
Foto (Arkiv): Leiff Josefsen
Nunatsinni inatsisiliortunut ajornaatsuinnaanngilaq aalajangersaaffigissallugu qanoq annertutigisumik nunarput pissarsisassanersoq umiarsuarnit takornariartaatinit umiarsuarnillu allanit, ilaatigut tingerlaataannalinnit nuannaariartaatinillu nunatsinnut tikittartunit qanoq annertutigisumik nunarput pissarsisassanersoq.
Krydstogtpassagerafgifti 2003-mit
- 2003 umiarsuarnut takornariartaatinut akitsuut atuutilerpoq / takornariaq ataaseq 300 koruut nalinginut akiliisitsisoqartalerluni.
- 2006 akitsuut qaffanneqarpoq / 450 takornariaq ataaseq 450 koruunit nalinginut akiliisitsisoqartalerluni.
- 2008 akitsuut qaffanneqarpoq / takornariaq ataaseq 525 koruunit nalinginut akiliisitsisoqartalerluni.
- 2010-p missaani akitsuummik qaffasissumik akerlilersuineq/aaqqissuunneq / takornariartaatsit amerlassusaannik ikiliartortitseqataalerluni
- 2015 naalakkersuisut siunnersuutigaat akitsuut 525 koruuni atorunnaarsinneqassasoq, taarsiullugu umiarsuup angissusaa tunngavigalugu umiarsualivinnut akitsuut atuutilersinneqassasoq.
- Ukiakkut 2023 / 1. januar 2024 malittarisassat nutaat: angalasumut ataatsimut 50 koruunit akitsuummik akileeqqusineq aallartinneqarpoq, kommunimut avatangiisinut aserfallatsaaliuinermullu akiliuteqartitsisoqarsinnaanera; umiarsuit takornariartaatsit angisuut akitsuutaat marloriaatinngorlugu qaffanneqarluni.
2003-mili nunarput iluanaaruteqarniarsarisarpoq takornariartitsinermik inuussutissarsiortunit siammaraluttuinnartunillu. Taamaakkaluartoq sunniuteqarpianngitsumik maannamut iluatsinniarneqarpoq, tassami Inatsisartut akitsuummik qaffatsitsisaqattaarnikuupput, 2010-p missaani ajutoortoqarnissaata tungaanut, tassami taamani umiarsuit takornariat amerlasuut nunarput saneqqutiinnartaleraluarpaat, 2008-mili 525 koruunit inummut ataatsimut akitsuusersuisalerneq annertuumik pissutaalluni.
Ullumi septemberip naanerani allapparput, maannalu ilisimavarput nunatsinni umiarsualiviit talittarfiillu nunanit allanit umiarsuarnik assigiinngitsunik ulikkaartaleqqinnikuusut.
Naalakkersuisut allannguutissatut siunnersuutaat
Siunnersuummi siunertaq pingaarnersaq tassaavoq umiarsualivimmiinnermut, umiarsuit takornariartaatinut aamma avatangiisimut aserfallatsaaliuinermullu akitsuutinik akiliisitsiniartarnermik tunngavimmik allannguiniarneq, tamatumani umiarsualivinni oqartussat suliaat oqilisinniarlugu suliassallu pingaarnerit aamma passunnerussammagit.
Akiliisitsiniartarneq allaffissornerlu Akileraartarnermut Aqutsisoqarfimmut nuunneqassapput, taakkulu aaqqissuussakkut nutaakkut akiliisitsiniartassalluni.
Inatsimmi ilanngullugu erseqqissaatigineqarpoq, umiarsuit ilaasartaatit takornariartaassuunngitsut, (yatchtit nuannaariartaatillu angisuut), inatsimmi aamma ilaassasut.
Inatsimmik allannguutip kingunerissavaa, angallatinut taakkununnga avatangiisimut aserfallatsaaliuinermullu akitsuummik akiliisitsiniartarsinnaaneq, tamannalu kommunit piffinni atortorissaarutaannut pitsanngorsaanermut ineriartortitsinermullu atorsinnaassallutik.
Tamatuma saniatigut aamma siunnersuutaavoq, nunanit allanit sunngiffimmi angallatinut, tamatumunnga ilanngullugit tissiartaatit, aalajangersimasumik ullormut 300 kr.-nik umiarsualivimmiinnermut akitsuummik atuutilersitsisoqassasoq. Tamatumunnga pissutaasoq tassaavoq angallatit taakku sukkassusaat aamma akitsuummik akilisitsiniarfigineri pisariunerat.
Taamaammat akiliutip qaffasissusaa allaffissornikkut pisariuneranut naapertuunnerulersinneqarluni.
- Taamatuttaaq siunnersuutigineqarpoq Kangerlussuarmi umiarsualivimmut umiarsuarnullu takornariartaatinut tunngatillugu akitsuut appartinneqassasoq. Siorna ukiakkut taanna akuersissutigineqarnikuuvoq maannalu inatsimmi allassimasunngortinneqassasoq ilanngullugu siunnersuutaavoq.
Inatsisartut takornariartitsinermit aningaasat amerlanerusut nunatta karsianut ikineqartassasut piumasaraat
Takornariartitsinermit aningaasat amerlanerusut akitsuutinik qaffaanikkut pissarsiarineqarsinnaasut Inatsisartuni amerlanerussuteqarluartut isumaqatigiissutigaat.
Tamanna paasinarsivoq naalakkersuisut siunnersuutaata siullermeerneqarnerani marlunngornermi.
Kisianni qanoq annertutigisumik akitsuutinik qaffaasoqassanersoq partiit mianersornerupput, taamaattoq Naleraq ersarissumik kissaateqarpoq takornariat ataasiakkaarlugit 100 koruuninik akitsuutitigut qaffaavigineqassasut.
Tassunga ilanngullugu Naleraq isumaqarpoq illersornissaqarfiup umiarsuaasa aamma umiarsuit allat nunamut imarmullu mingutsitsisut akileeqataasariaqartut.
Aamma naalakkersuisut piareersimanerarput aningaasaqarnermut ataatsimiititaliamik qaffaanissamik oqaloqatiginninnissaminnut.
Akitsuutilerinerup saniatigut, Siumut sinnerlugu oqaaseqartup Erik Jensenip periarfissaq atorluarpaa naalakkersuisunut kaammattuuteqarluni Royal Arctic Line aamma Sikuki Nuuk Harbour ataatsimuulersinneqassasut.
Siunnersuutip aappassaaneerneqarnissaa pissaaq novembarip sisamaanni.
