Akitsuutit, nakorsat namminersortut, imaatigut isumannaallisaaneq, inatsisartunut qinersinermi inatsisit minnerunngitsumillu qinersisoqarnissaanik tusaamasarsorneq

Suna tamarmi ataatsimut isigalugu pissusissamisut ingerlarpasippoq.

Inatsisartut 2024-mi upernaakkut ataatsimiinnertik ingerlappaat. Naalakkersuisut Inatsisartullu ilaasortaat tulleriaarlutik oqaluuseritikkumasatik aalajangiiffigitikkumasatillu Inatsisartunit suliarineqarlutik aallartinneqarnissaat utaqqisarpaat.

Sapaatip-akunnerani aggersumi oqaluuserisassat soqutiginartut amerlasuut saqqummiunneqassapput.

Naalakkersuisut akitsuusersuinermut siunnersuut, akileraartarnermut aaqqissuuseqqinnermut tunngassuteqartoq siulleq saqqummiutissavaat, tassani akitsuutit ilaat piivinniarneqarput, ilaat naleqqussarniarneqarlutik ilaallu apparsarniarneqarlutik.

Ineqarnermut aaqqissuusseqqinneq ilivitsuutillugu suli takkunneqanngilaq, kisianni Naalakkersuisut nalinginnaasumik peqateqarluni illuliortiternermi piumasaqaatit sakkukillisarneqarnissaannik siunnersuuteqareerput, taamaattorli naagga, illoqarfinni ineriartortitsiffiusutut taaneqartartuni innuttaasut illuliortiternermut taamaattumut periarfissinneqanngillat, aamma isertitamikkut nunaqarfinni avinngarusimasunilu innuttaasunit appasinnerusumik inissisimagaluarunilluunniit.

Inatsisartut ilaasortaat oqallinnermi siunnersuutinik assigiinngitsunik saqqummiussaqarusupput. Ilaatigut nakorsat namminersortut nunatsinni nakorsiartarfiutitaarsinnaanissaannik periarfissiinissaq siunnersuutigineqarpoq aammalu imaani angalasartut tamarmik ”Emergency Position Indicating Radio Beacon”-imik peqassallutik pisussaaffilerniarneqarput, allat nunatta sinniisoqarfiini nunanut allanut tunngasuni aningaasartuutit aamma suliniutit qanoq ilillutik pitsaanerusumik ingerlanneqarsinnaanerat pillugit oqaluuserinnikkusupput, allallu qinersinermut inatsit qanoq ililluni nutarterneqarsinnaanersoq eqqartorusukkaat.

Sapaatip-akunnerani tulliuttumi suliassat amerlanerusut suliarineqartussaapput tamarmillu Inatsisartut nittartagaanni qimerloorneqarsinnaapput.

Qinersinissamut plakatit pillugit tusaamasarsornerit unikkumanngitsut

Sermitsiap nittartakkatigut nutaarsiassaqartsiviani sivitsortumik assigiinngitsunit tusagaqartarpugut Inatsisartunut qinersinissamut piareersartoqartoq.

Aaqqissuisoqarfimmit arlaleriarluta Naalakkersuisut siulittaasuannut, Múte Bourup Egedemut aamma Siumut siulittaasuannut, Erik Jensenimut tusaamasarsorneq  ilumoornersoq paasiniartarparput, taakkua marluk naalakkersuisooqatigiit qullersarivaat.

Taakku marluullutik  ilumoorneraasarput "naalakkersuisooqatigiinni suleqatigiinneq ajunngilluinnartoq" aamma qinersinissamut pilersaarutinik immikkut ittunik pilersaarusiortoqanngitsoq, qinersinerlu tulleq piumaartoq kingusinnerpaamik 6. april 2025-mi.

Kingullermik Sermitsiap nittartakkatigut aaqqissuisoqarfianiit Naalakkersuisut siulittaasuannut, Múte Bourup Egedemut tallimanngornermi oqallisigineqartoq ilumoortortaqarnersoq apeqqutigaarput, taassumalu akissutaa allanngunngilaq:

- Politikkikkut suliassaqarfiit assigiinngitsut isumaqatigiinngissuteqarsinnaasaraluarluta, suleqatigiinnerput pitsaasumik anguniagaqaqatigiiffiusumillu ingerlapparput, suliassat oqaloqatigiissutigisarpagut aamma Inatsisartuni gruppit peqatigalugit oqallisigisarpagut, taamaattumillu qinersinissamut qilanaartunut uppernarsarsaannassavara Inatsisartunut qinersineq tulleq kingusinnerpaamik apriilip 6-anni 2025-mi piumaartoq.

Taava tassa qinersissamut attataasap toornissaanik qanittumi pilersaaruteqanngilatit?

- Pilersaaruteqanngilanga, arlaannik paatsuuerujussuarsimanngikkuma takunngitsuugaqarsimanngikkumaluunniit, taava tassa nalinginnaasumik Inatsisartunut qinersinissarput tikillugu suleqatigiinnerput ingerlaannassaaq.

Qanormi paasiariaqarpa plakatit aamma allagartarsuit piareersarneqarnerarlugit oqallinneq?

- Naamik, qinersinermut plakatinik naqiterisitsinngilagut aamma suli qinersinermut piareersaateqanngilagut. Maannakkut eqqaasinnaasatuara tassaavoq Inuit Ataqatigiinni ataatsimeersuarnissamut piareersaateqarnerput, taanna aasaru pisussaavoq, tamatumunngalu atatillugu bannerimik angisuumik nutaamik aamma roll-upsinik sanatitsivugut, taakkulu saniatigut sukkuaqqat, nallukattat aamma allat partiitta ilisarnaataanik ilisarnaatillit ataavartumik sanatittarpagut immikkoortortaqarfitsinnullu nassiussortarlutigut.