Akunnittarfinni unnuisut ikileriartut
Nuna tamakkerlugu akunnittarfinni angalaartunullu unnuisarfinni unnuisut kvartalip aappaani 2023-mut sanilliullugit ikileriarsimapput.
Ilulissani unnuisut 2024-mi kvartalit aappaanni ukiup siulianut sanilliullugit 9,4 procentimik ikinnerupput, Naatsorsueqqissaartarfiup kisitsisaataasa tamanna takutippaa.
Toqqorsivimmit assiliartaliussaq: Leiff Josefsen
Naatsorsueqqissaartarfiup 2024-mi kvartalip aappaani tikeraat unnuinerillu pillugit kisitsisit nutaat saqqummiuppai.
2023-mi kvartalimut tassunga sanilliullugu Kalaallit Nunaanni tamarmi appariartoqarsimasoq kisitsisit takutippaat.
2024-mi kvartalip aappaani Kalaallit Nunaanni akunnittarfinni, vandrehjemini unnuisarfinnilu allani 45-ni, kisitsisinut tunngaviusunut ilaasuni, katillugit 59.930-t unnuisimasut 151.706-illu atuisimasut Naatsorsueqqissaartarfik allappoq.
- Tamanna tamakkiisumik isigalugu ukiup siulianut piffissamut pineqartumut sanilliullugu unnuisimasut amerlassusaat 6,5 pct.-inik kiisalu 8,0 pct.-inik appariarsimapput, Naatsorsueqqissaartarfik allappoq.
Takussutissaq: Naatsorsueqqissaartarfik
