Aleqa Hammond Siumumi siulittaasunngorpoq
Parti Siumut siulittaasortaarpoq. Tassavoq 59-inik ukiulik Aleqa Hammond, taannalu taamaalilluni oqaluttuarisaanermi uteqqippoq.
Assiliisoq: Jensine Berthelsen
Nutarterneqarpoq....
Maanna paasinarsivoq - Aleqa Hammond Siumumi siulittaasutut uteqqippoq.
Taanna 23-19-imik Vivian Motzfeldtimut ajugaavoq.
Aleqa Siumup qullersaatut inisseqqippoq
assiliisoq Oline Inuusuttoq Olsen
Maanna politikkikkut siulittaasup tullianik aamma aaqqissuussaanikkut siulittaasup tullianik qinersinissaq pissaaq.
Lars Erik Gabrielsen, Ineqi Kielsen, Oliver Bech aamma Doris Jakobsen Jensen politikkikkut siulittaasup tulliatut qinigassanngortipput.
Ineqi Kielsen politikkikkut siulittaasumut tullinngorpoq, Lars Erik Gabrielsen sinniisussaralugu.
Assiliisoq: Oline Inuusuttoq Olsen
Arnat sisamat partiip aaqqissuussaanermut siulittaasuata tulliatut sassarput. Taakku tassaapput Evelyn Frederiksen, Dorthe Marie Mogensen Fontain, Laura Taunajik Uitsatikitseq og Doris Jakobsen Jensen.
Doris Jakobsen Jensen Siumumi aaqqissuussaanermut siulittaasumut tullinngorpoq.
Siumup siuttui nutaat Taamaalillutik siulittaasoq Aleqa Hammond, siulittaasup politikkikkut tullia Ineqi Kielsen aamma aaqqissuussaanermut siulittaasup tullia Doris Jakobsen Jensen tassaalerput Siumup qimuttuini sallerpaanngortut.
Maanna Siumup siulersuisuunerini ilaasortassat pingasut qinerneqassapput. Tamannalu naammassineqarpat Siumup immikkut ittumik ataatsimeersuarnera aamma taamaalilluni naammassineqassaaq.
Siulersuisuunerni ilaasortanngortut tassaapput Anders Olsen, Lars Poulsen og Ole I. Frederiksen. Taakku saniatigut Siumup inuusuttai, nunap immikkoortuini immikkoortortaqarfiit toqqagaat siulersuisuunerniissapput.
