SIUMUP SIULITTAASORTAAVA
Aleqa utoqqatserpoq Vivianilu ajugaaffigalugu
Siumup siulittaasortaavq, Aleqa Hammond, Siumup naalakkersuisooqatigiinni peqataaneranut allanngortitsinissamut pilersaaruteqanngilaq, kisianni ulluinnarni aqutsisunngortut, siulersuisuunerit, Inatsisartuni gruppi aammalu immikkoortortaqarfiit allatut aalajangissappata tamanna uterfigineqassaaq. Massakkulli siulittaasunngortup suliassamisut kinguarsarnertaqanngitsutut isigisaa tassaavoq partiip immikkoortortaqarfiisa aallunneqarnissaat.
Arnat marluk Siumumi siulittaasunngorniullutik unammereerlutik, Vivian Motzfeldt aamma Aleqa Hammond, partiip immikkut ittumik ataatsimeersuarnerata naanerani sapaatiummat nalunaaqutaq 18:00 sioqqutilaarlugu ataatsimeersuarneq matummat.
Foto: Jensine Berthelsen
- Siumut nukittorsarneqassaaq, nunap immikkoortuini tamani partiip politikkia, Kalaallit Nunaanni inuiaqatigiinni tunngaviusumik inissisimasoq, nalornissutigineqassanngilaq, Siumup siulittaasua nutaaq, siusinnerusukkullu partiimi aamma Naalakkersuisuni siulittaasuusimasoq, Aleqa Hammond, Sermitsiamut oqarpoq.
Aleqa Hammondip qineqqusaarnermini oqalugiaatini aallarnerlugu parteeqatiminut utoqqatserpoq, tamanna pereermat partiip siulersuisuuneri tunuartut sakkukinngitsumik isornartorsiorpai ilaasortaminnik sumiginnaaginnaratik nunatsinni innuttaasut, pingaartumik avinngarusimasumiittut sumiginnarneqarsimanerarlugit.
Siulittaasussarsiorlunimilumi qinersinerup inernerata ersersippaa partiimi ilaasortat isumakkeerfigisimagaat, siullermik Naalakkersuisut siulittaasuattut kingusinnerusukkullu folketingimi ilaasortatut akiliutiminik (kreditkort) inuttut atuisimanera pillugu.
- Parteeqatima nalunngilaat oqaatsit iliuuseqarnermik malitseqartinneqartarnissaannik pingaartitsisuusunga, taamaattumik tatiginninnerat assut nuannaarutigaara, maannakkullu sulilluta aallartissaagut, siulliutissavarput periusissiaq sulinitsinni najoqqutarisassarput.
Partiip anguniagai allannguuteqassappat, tassami partiip siulersuisuunerinut maanna tunuartunut iliuuseqanngippallaarnerarlugit isornartorsiorpatit, aammalu nunatsinni innuttaasut amerlasuut Kalaallit Nunaanni inuiaqatigiinni amerlavallaartut inuuniarnermikkut ajornartorsiornerat ilanngullugu oqaatigivat?
- Partiip siulersuisuunerisimasai tusarnaanngippallaarsimanerat, peqataatitsinikippallaarsimanerat, sumiiffinnilu immikkoortortaqarfiit innuttaasullu tusaaneqarnissamik noqqaagaluartut qisuariarnikippallaarsimanerat pillugit isornartorsiuivunga. Partiittami politikkia ajoquteqanngilaq, kisianni partiip anguniagai qanoq sulissutigineqarnersut matumani pivara, Aleqa Hammond naqissusiivoq nangillunilu:
- Innuttaasut sumiginnarneqartutut misigisimassanngillat, inuiaqatigiinni ineriartortitsinermut peqataasutut piginneqataasutullu misigissapput, maannakkullu siulersuisuuninngortuugut sulerusussuseqarluartugut malugisinnaavara, aammalu immikkut qilanaarisaqarpunga, tassalu immikkoortortaqarfiit nukittorsarnissaat pillugu sulinissatsinnut.
Siumut naalakkersuisooqatigiinnit anissanngilaq - kisianni nalilersuineq ingerlaavartumik ingerlanneqassaaq
Siumummi aamma Inatsisartuni ilaasortaatitaqarpoq, taakkulu aamma naalakkersuisooqatigiinni peqataapput, allannguisoqassava? Siumut naalakkersuisooqatigiinnit anissasoq siunnersuutigissaviuk?
- Suliaq una kisima aalajangissallugu pisussaaffiginngilara, tassa siulersuisuunerit, Inatsisartuni gruppi aammalu immikkoortortaqarfiit apeqqut taanna pillugu aalajangiisoqassappat aalajangiissapput. Kisianni kikkut tamarmik nalornissanngillat Siumup anguniagai aammalu naalakkersuisooqatigiit suliaat imminnut naapertuunnersut ataavartumik nalilersorneqartassaaq.
Siumup Naalakkersuisooqataanut qanoq oqariartuuteqassavit?
- Maannakkorpiaq oqariartuuteqassanngilagut, naalakkersuisooqatigiit ingerlapput, aammalu Siumup peqataajunnaarnissaanut aalajangiisoqanngilaq. Kisianni pingaaruteqarpoq erseqqissassallugu Siumut ingerlaavartumik nalilersortassasoq taamatut suleqatigiinneq Siumup anguniagaannut naapertuunnersoq, tassami politikkitsinnut uniuisumik ingerlalissanngilagut aammalu sanioqutaarilissanngilagut.
