Alianartoq: Arnat pingasut erninerminni ernereernermiluunniit toqusut
Arnat erninerminni ernereernermiluunniit toqukkut qimaguttut pillugit oqaluttuat Facebookikkut piffissami kingullermi siammarterneqarput. Arnat pingasut qaammatit pingasut ingerlaneranni toqusimasut paasinarsivoq.
Nunami maani ukiorpassuarni erninermi toqusartut amerlassusii appasilluinnarsimasut, Nakorsaaneq Paneeraq Noahsen oqarpoq.
Assi: Thomas Rousing/Ritzau Scanpix
Arnat pingasut qaammatit pingasut ingerlaneranni toqukkut qimagupput.
Arnanut qanigisaasut Facebookikkut oqaluttuaraat arnat erninermi nalaani ernereernermiluunniit toqukkut qimagussimasut.
Tamanna pillugu Naalakkersuisut, Kalaallit Nunaanni Politiit Nunattalu Nakorsaaneqarfia Sermitsiamiit paasiniaaffigineqarput.
Politiit: - Ataaseq misissuiffigineqarpoq
Kalaallit Nunaanni Politiit uppernarsarpaat toqusut pingasut pillugit ilisimasaqarlutik. Suliat ilaat misissorneqaleruttorpoq, politiilli tamanna pillugu itinerusumik oqaaseqarusunngillat.
- Kalaallit Nunaanni Politiit suliat taaneqartut ilisimavaat. Suliat ilaat suli misissuiffigineqarpoq, taamaattumik Kalaallit Nunaanni Politiit oqaaseqarsinnaanngillat, Kalaallit Nunaanni Politiit Sermitsiap apeqqutaanut akissuteqarluni allappoq.
- Siornatigut taamatut assingusunik pisoqarsimava, pisimasunillu taamaattunik misissuisarneq nalinginnaava?
- Naatsorsuutiginngisamik toqusoqartillugu suliat Kalaallit Nunaanni Politiinut ingerlateqqinneqartarput, suliallu tamarmik misissoqqissaarneqarnissaannik pisariaqartitsisoqarnersoq nalilersorneqartarlutik, Kalaallit Nunaanni Politiit allapput.
Nakorsaaneqarfik: - Misissuinerit aallartippavut
Nunatta Nakorsaaneqarfiata pingasunik toqusoqarsimanera aamma uppernarsarpaa, ilanngullugulu paasissutissiissutigalugu suliat pingasut misissuiffigigitsik.
- Toqusut pingasut pillugit Nakorsaaneqarfiup ilisimasaqarpoq, toqusullu pingasut tamarmik immikkut misissorneqarput. Misissuinerit marluk naammassineqarput, ataaseq suli misissuiffigineqarluni, nakorsaaneq Paneeraq Noahsen Sermitsiamut allappoq.
Misissuinerit inerneri pillugit nakorsaaneq oqaaseqanngilaq. Sermitsialli apeqqut akissutissarsiniarlugu sulissuteqarpoq.
Aammattaaq nakorsaaneq oqarpoq nunami maani ukiorpassuarni erninermi toqusartut amerlassusii appasilluinnarsimasut.
- Nunarsuaq tamakkerlugu arnaq ataaseq minutsini ataasiakkaani naartunermi erninermilu ajornartorsiutit pissutigalugit toqusarpoq, sumiiffiilli assigiinngilluinnarput.
Peqqissutsimut Naalakkersuisoq Agathe Fontain oqaaseqartinniarlugu Sermitsiaq sulissuteqarpoq.
Allaaserisap uumap saqqummersinneqannginnerani arnanut pingasunut qanigisaasut Sermitsiap attaveqarfigai.
