Qineqqusaarneq aallartimmat pingasuupput, naammassimmatalu qulinngorlutik.
Qanoruna pisoqartoq?
Qineqqusaarneq aallartimmat pingasuupput, naammassimmatalu qulinngorlutik.
Qanoruna pisoqartoq?
Demokraatit ullormiit ullormut Kalaallit Nunaat saamerliusoq talerperlinngortimmassuk Jens-Frederik Nielsenip allat assigalugit isini allartertariaqarpai. Qinersisartut 30 procentiisa missaat partii tapersersorpaat.
Jens B. Frederiksenip, Demokraatini 2008-miit 2014-imut siulittaasup, partiitoqqami siuariarnissaa upperisimavaa.
- Allannguisoqangaatsiarporli. Demokraatit taama amerlassuseqalernissaat Siumullu taama ikitsigilernissaat takorloorsimanngilara, oqarpoq, Inatsisartunullu ilaasortanngortut 31-t tamaasa pilluaqquniarlugit oqapallalluni.
- Demokraatit ullumi taamanilu aquttuunerni suna allaanerussutigaa?
- Talerperlinngornerusimapput. Uanga Danmarkimi Det Radikale Venstremik suleqateqarneq isumaqatigiissutiginikuuara Jens Frederiullu Liberal Alliancemut suleqateqalernissat aallartimmagu ilaatigut takuneqarsinnaavoq, Jens B. Frederiksen akivoq, nangillunilu:
Jens B. Frederiksen ukiuni arfinilinni Demokraatini siulittaasuunikuuvoq. Partii qanoq ililluni siuariangaatsiarsimanersoq isummersuutigaa.
Assi: Leiff Josefsen
- Naalagaaffeqatigiinneq eqqarsaatigalugu taamaaginnangajappoq. Demokraatit partiip anguniagaani namminiilivinnissaq tapersersorneqartoq allassimajuaannarpoq. Uanga nalinni ulapputigivallaanngilarpuq, Jens-Frederilli oqarpoq arriitsumik tuaviutissagipput.
Jens B. Frederiksenip nukkani Minik Serano Frederiksen Demokraatit sinnerlugit Inatsisartunut ilaasortanngortut akornanniimmat nuannaarutigaa.
- Angajumisut Naalakkersuisunut ilaasortanngorsinnaanersoq takussavarput, Jens B. illarluni oqarpoq; taanna Kuupik Kleistip Naalakkersuisuutitaani 2009-miit 2013-miit ilaasortaanikuuvoq.
Angutit inuusunnerusut Nunami qinersivinni 72-ini kisitsisoqareermat inernera erseqqarissoq saqqummerpoq. Jens-Frederik Nielsen qinersisartunit qinerneqangaatsiarpoq. 4.850-inik taaneqarluni qinerneqarnerpaat allattorsimaffianni siuttuuvoq. 2021-mi qinersisimi quleriaatai.
JFN kisimiilluni tupaallatsitsinngilaq. Qinerneqarnerpaat tulliattut Anna Wangenheim (1079) inissippoq, kiisalu Nivi Olsen (453), Jørgen Rosbach (354) Pipaluk Olsenilu (246), qinigassanngortittut sisamat qinerneqarnerpaat 20-t akornanniillutik.
Nunani allani tusagassiuutit qinersinerup inernera partiitoqqanut akerliussutsimik takutitsinertut oqaatigaat, Nalerarmi aamma qinerneqarluarluni ilaasortaatitai marloriaatinngormata taamaalillutillu Demokraatit angumaannangajallugit. Aki-Matilda Høegh-Dam aamma Pele Broberg qinerneqarluarput.
Partii qinerneqarnerpaaq Naalakkersuisooqatigiliornissamik siullertut isumaqatiginninniarsinaatitaavoq, sulorarnermilu pissartaasimasup JFN-ip taakku iluatsissagai ilimanarluarpoq naak qanoq isikkoqassanersut allaaserisap uuma suliarineqarnerani suli ilisimaneqanngikkaluartoq. Jens-Frederik Nielsen Naalakkersuisunut siulittaasunngussappat, siulittaasuusarsimasuni inuusunnerpaanngussaaq. Múte B. Egede Namminersorlutik Oqartussani atorfimmut qaffasinnerpaamut ivertinneqarami 34-nik ukioqarpoq. JFN-ip 33-iinnarnik ukioqarluni Mútemit ukiukinnerulaarpoq.
Atassummeersoq Aqqalu Jerimiassen aamma 30-t sinnerlugit ukioqarpoq, Pele Broberg Vivian Motzfeldtilu 50-it sinnerlugit ukioqarput. Nunanut allanut sanilliukkaanni partiit siuttui inuusunnerupput taamaakkaluartoq misilittagaqarluartuullutik, taakkulu ukiuni tulliuttuni sisamani nunamut aqutsisussaapput. Agguaqatigiissillugu 40-t sinnilaarlugit ukioqarput.
Ataatsimiinneq Jens-Frederik Nielsen suliniuuteqarusussuseqartutut piviusorsiortutullu oqaatigineqartarpoq. Inatsisartut ataatsimiittarfianni kimigiisertarpoq, oqaatiginiagaali amerlanertigut qungujulalluni oqaatigineqartarput.
- Angut taanna mikisunnguuneraniilli ilisarisimavara. Taamanimiilli suut angunnginnerpai. Sulorartartutut tusaamasaq, ataataq, piniartorsuaq maannalu Kalaallit Nunaanni politikerit nuimasut siuttuattut, meeraanerani ikinngutaasa ilaat LinkedInimi allappoq.
Jens B. Frederiksenip, ullumikkut namminersortumik inuussutissarsiuteqartup Radikale Venstrellu Næstvedimi immikkoortortaqarfiani siulittaasup tulliata, aamma oqaatsit taakku isumaqatigai.
- Inuusuttuullunilu silassorissuuvoq. Qineqqusaarnerillu ilaanni tv-kkut takusanni eqqissisimasumik saaffigiuminartutullu nipeqartoq maluginiarpara. Kalaallit Nunaata ataatsimoortinnissaa eqqartorpaa, piffissamilu nalorninartorsiorfiusumi ataatsimoortitsisinnaasoq upperaara. Aammattaaq piffissaq tamanna naalagaaffeqatigiinnermi naligiinnerusumik pilersitsinissamut oqaluttuarisaanermi aatsaat taama periarfissaqarfiutigivoq. Isumaqarpunga qallunaat politikerii eqeeriartulersut, Jens B. Frederiksen oqarpoq.
- Sooruna qinersisartut uani qinersinermi taama nikeriartigisut?
- USA-mut tunngatillugu aamma Naalagaaffeqatigiinnermut tunngatillugu nalorninartorsiortoqarpoq, qanorlu pisoqassanersoq aamma nalorninartorsiortitsisoqarpoq. Isumaqanngilangali tamanna qinersinerup inerneranut aalajangiisuusoq. Tassaapput ulluinnarni atukkanut tunngasut. Aalisarnermut inatsit inuuniarnermilu atugassarititaasut, Jens B akivoq , nangillunilu:
- Aalisarnermut inatsit niuernikkut suliffeqarfissuarniinnaanngitsoq isorineqarpoq, aammali aalisartut peqatigiiffiini, ilaqutaariinnilu aalisartoqarfinni.
- Politikkerisaq tassa aalajangiisuusimava?
- Taamatut pisoqarneranut naalakkersuisooqatigiit pisuutinneqarsinnaanerat kukkunerussaaq. Coronap Ukrainemilu sorsunnerup aningaasat naleerukkiartortippaat. Sunniutaa inunnit amerlasuunit malugineqarput. Naalakkersuisut kikkuugaluarpataluunniit taamatut pisoqarsimassaaq. Pisut avataaneersut sunniutaat inuit naammaginninnginnerannik kinguneqarput, Jens B. Frederiksen akivoq.
