Politikkikkut avatangiisini, kinguaariit ingerlaneranni
angutinit inersimalluartunit sunnerneqarsimasuni, Pipaluk Olsen, 33-nik ukiulik
anaanaasoq kisimiittoq sisamanillu meeralik qaqutigoortuuvoq.
Politikerinngorlaalluni marsip 11-ani qinersinermi Demokraatit
qinigassanngortitaattut 246-nik qinerneqarami meeqqat ilaqutariillu pillugit
nammineq misilittakkani Inatsisartuni atorniarlugit aalajangiusimalluinnarpaa.
Politikkikkut avatangiisini, kinguaariit ingerlaneranni
angutinit inersimalluartunit sunnerneqarsimasuni, Pipaluk Olsen, 33-nik ukiulik
anaanaasoq kisimiittoq sisamanillu meeralik qaqutigoortuuvoq.
Politikerinngorlaalluni marsip 11-ani qinersinermi Demokraatit
qinigassanngortitaattut 246-nik qinerneqarami meeqqat ilaqutariillu pillugit
nammineq misilittakkani Inatsisartuni atorniarlugit aalajangiusimalluinnarpaa.
Pipaluk Olsen 2017-imi isumaginninnermi ikiortitut
ilinniarsimasunngorlunilu 2022-mi perorsaasutut ilinniarsimasunngorpoq.
Meeqqat, inuusuttut ilaqutariillu assigiinngitsutigut suliaqarfigisimavai,
ilaatigut meeqqerivimmi, atuareernerup kingorna ornittakkami, meeqqat
angerlarsimaffianni kingullermillu Kommuneqarfik Sermersuup Nuummi naartusunut
ilaqutariinnullu mikisunik meeralinnut najugaqarfiani katsorsaaviutigisumi
Kusernermi ilaqutariinnut siunnersuisartutut sulivoq.
– Meeqqanik, inuusuttunik angajoqqaanillu sullissininni kinguaariit tullii
uatsinnit nukittunerusinnaaniassammata allannguineq meeqqanit aallartittartoq
ilikkarpara, Pipaluk Olsen Sermitsiamut oqarpoq.
Ukiakkut ataatsimiinneq septembarip 19-ianni aallartissaaq, Pipaluk Olsenilu
Ilaqutariinnermut Peqqissutsimullu Ataatsimiititaliami siulittaasutut nunami
unammilligassat annersaasa ilaat pillugit oqallinnermi qitiutinneqassalluni.
Siulittaasup tullia Aki-Matilda
Høegh-Dam, Naleraq, kiisalu Bo Martinsen, Demokraatit, Paarma Lund Kreutzmann,
Inuit Ataqatigiit, aamma Anders Olsen, Siumut, ataatsimiititaliami aamma
ilaasortaapput.
– Qaammatit tamaasa ataatsimiittarpugut, partiimut tunngatillugu
assigiinngissuteqaraluarluta ataasiussuseqarluta sulisarpugut. Tamatta
ilaqutariit peqqinnissaqarfiullu atugaasa pitsanngorsarnissaat
anguniagaraarput, politikkikkullu oqallinnerit sakkortuut piffissami allami
oqaluuserisarpagut, Pipaluk Olsen oqarpoq.
Filippinerit imaluunniit matu matoqqasoq
Pipaluk Olsen qineqqusaarnermi sassaqqaarpoq, ilaatigut qineqqusaarnermi
Sisimiuni TV-kkut oqallinnermi, tassanilu paaqqinnittarfinni sulisussaaleqineq
oqallisaaqaaq. Qeqqata Kommunia nunanit allaneersunik, Kangianit nunanillu
avannarlerneersunik, atorfiit inuttassarsiuutat inuttalerneqarnissaannut
sulisussarsiorpoq.
Aaqqiissut oqallisaaqisoq, angajoqqaalli matumi allagartaq
naapikkuminaatsoq, meeqqerivik sulisussaaleqineq pissutigalugu matusoq pinnagu
filippineri naapikkusunneruaat.
– Nunanit allaneersut perorsaasunik amigaateqarnermut aaqqiissutaasinnaappat
– Inuit inunnik allanik isumassuinermik suliaqarusuttut, aamma Filippinerinit,
naaggaanngilakka, kisianni nunanit allanit sulisussat pillugit
sinaakkusersuisoqarnissaa pisariaqartinneqarpoq. Meeqqat oqaatsitigut
ineriartortinneqartariaqarput, angajoqqaallu meeqqap ineriartornera pillugu
sulisunik oqaloqateqarnissaq pisariaqartippaat, Pipaluk Olsen Sermitsiamut
oqarpoq.
Qineqqusaarnermi tassani inimi
ataatsimi sulisut pingasuninngaanniit sisamanngortinneqassasut nammineq
siunnersuutigaa.
– Nunanit allaneersut paaqqinnittarfinni sulisussatut
piukkunnarnerpaajunngippata qanoq sulisussarsisoqarsinnaava?
– Paarlatserpassuit ilinniarsimanngitsullu paaqqinnittarfinni
pinngitsoorneqarsinnaanngillat, sulisullu tamakkersinnaaniassammata
piginnaanngorsaasoqarnissaa uanga sulissutiginiarpara. Meeqqat
toqqissisimanissartik pisariaqartippaat, toqqissisimanerlu tamanna sulisunit
aalajangersimasunit pitsaanerpaamik pilersinneqartarpoq, Pipaluk Olsen oqarpoq.
PIPALUK OLSENIP PILLUGU
33-nik ukiulik Pipaluk
Olsen Sisimiuneersuuvoq, aqqanilinnik ukioqartoq ataataa, Peter Olsen,
aalisartut piniartullu peqatigiiffianni KNAPK-mi siulittaasunngormat,
anaanaalu, Emilie Olsen, Atassut tunuliaqutaralugu Inatsisartunut
ilaasortanngormat Nuummut nuuppoq.
Anaanat Atassutip sinnerlugu nuna tamakkerlugu kommuninilu politikkimik
suliaqartoq sooq Demokraatit sinnerlugit qinigassanngortippit?
– Demokraatit partiitut anguniagaat uanga anguniakkannut assingupput, aammali
partiip siulittaasua Jens-Frederik Nielsen Nuussuup Atuarfiani
atuarnitsinniilli ilisarisimagakku pingaaruteqarpoq. Aamma NÛK-mi assammik
arsaqatigiittarnikuuvugut, Jens-Frederillu angajullequtinnut tigummiartiiuvoq.
Pipaluk Olsen sisamanik meeraqarpoq – niviarsiaraq aqqaneq-marlunnik ukiulik
nukappiaqqallu pingasut, qulinik, tallimanik marlunnillu ukiullit.
– Ukiakkut ataatsimiinnissaq soorunami ulapaarfiussaaq, ilaquttamali ulluinnama
ingerlalluarnissaanut ikiuunnissaminnut piareersimapput. Imminut
paarilluartartutut misigivunga, tassa allanik ikiuisinnaajumallunga
oqimaaqatigiissaarisariaqarpunga. Timmisartumut assersuuttarpara, tassani
silaannaap naqitsinera appariataarpat anersaartuutit qulinniit nakkassapput.
Taamaattoqartillugu anersartuut nammineq ateqqaarlugu allat anersaartuutaannik
ikiorneqartassapput, Pipaluk Olsen oqarpoq.
kurt@sermitsiaq.gl
Naalakkersuisooqatigiinnissamut
isumaqatigiissummi, nammineq partiiminit atsioqataaffigineqartumi,
meeqqerivinni sulisunut pitsaasunik ilinniartitaanermik piginnaaneqarnermillu
ineriartortitsinermik neqeroorutit sulissutigineqartut naammagisimaarluni maluginiarpaa.
Pingaartumik ilinniagaqanngitsut ukiorpassuarni meeqqanik sullissisimasut
piginnaanitik pillugit uppernarsaateqarnissaminnut periarfissaqassapput.
Oqartussaasut suleqatigiinnerat
Ataatsimiittarfik apriilip arfineq-aappaani ivertitsilluni ataatsimiinnerminngaanniit
septembarip 19-iani ukiakkut ataatsimiinnerup aallartinnissaanut
atorneqanngilaq, Pipaluk Olsenilli ulluunerani paaqqinnittarfiit pillugit
oqallinneq § 37 naapertorlugu Naalakkersuisunut arlalinnik apeqquteqarluni
aallartippaa.
– Meeqqat toqqissisimasumik ineriartorfiusumillu ulluinnarni
inuuneqarnissaminnut pisinnaatitaaffeqarput, sulisullu naatsorsuutigineqartutut
suliniuteqarsinnaajumallutik pitsaasunik sulinerminnut
atugassaqartinneqartariaqarput. Ajoraluartumik meeqqat paaqqinnittarfissaqanngitsut
ullumikkut takusarparput, sulisullu sulisussaaleqinermik suliffimmilu
avatangiisinik unammillernartunik tatineqangaartarput. Tamanna meeqqat
atugarissaarnerannut perorsaanermilu avatangiisinut sanngiillisitsivoq, Pipaluk
Olsen tunngavilersuivoq.
Meeqqanut, inuusuttunut ilaqutariinnullu naalakkersuisup Mads Pedersenip
akissummini Namminersorlutik Oqartussat kommunillu meeqqanut tunngasutigut
akisussaaffiisa agguataarnerat sammivaa.
– Akissut naammagaajuk?
– Namminersorlutik Oqartussat kommunillu assigiinngissutaat nalunngilakka,
meeqqalli naluaat. Meeqqat akisussaaffiit agguataarneqarnerat apeqqutaatinnagu
oqartussanit ingerlateqqinneqaqattaannginniassammata, pisariaqartumilli
ikiorneqarniassammata Namminersorlutik Oqartussat kommunillu qanimut
suleqatigiinnissaat sulissutigissavara, Pipaluk Olsen oqarpoq.
Ingammik kommunini ataasiakkaani meeqqat paaqqutarineqarsinnaanngitsut
amerlassusaat maluginiarpai, ilaatigut Qeqqata Kommuniani meeqqat 15-it,
Kommuneqarfik Sermersuumi meeqqat 66-it aamma Kommune Kujallermi meeqqat 49-t.
– Meeqqat nunami sumiluunniit naligiimmik atugaqarnissaat sulissutiginiarpara,
meeqqat toqqissisimasumik pitsaasumillu meeraasinnaanerat postnormumit
aalajangerneqassanngilaq, Pipaluk Olsen oqarpoq.
Marsip 11-ani qinersinermi Qaanaami ataatsimit
qinerneqarpoq.
– Qinersisoq taanna allat 245-t pingaaruteqarnerattulli pingaaruteqartigaaq,
sulinera meeqqanut tamanut atuuttussaagami, Kalaallit Nunaanni
sumiikkaluarpataluunniit, Pipaluk Olsen oqarpoq.
