Allannguutissatut siunnersuut: Naalakkersuisut Royal Greenlandip pisassaanik appaasinnaalissapput

Naalakkersuisut aalisarnermut inatsisissatut siunnersuutip pingajussaaneerneqarnissaanut allannguutissatut siunnersuuteqarput.

Allannguutissatut siunnersuutip Aalisarnermut, Piniarnermut Nunalerinermullu Ataatsimiititaliap innersuussutaa, tassa aalisartut namminersortut namminersorlutillu oqartussat pisassiissutit tungaasigut naligiimmik unammilleqatigiinnissaat, malinniarpaa.

Taamatut inassuteqaateqarnerup Naalakkersuisut Royal Greenlandimik immikkut pinnittarnissaanik aamma suliffeqarfiup pisassiissutit killiliinerannut ilanngunneqarnissaanut siunnersuuteqarnerannut akerliusumik inassuteqaateqarpoq, tamannalu Polar Seafoodip namminersortup sakkortuumik eqqugaaffigissavaa.

Suliffeqarfinnut namminersortunut malittarisassat naleqqussarneqartariaqarput

Allannguutissatut siunnersuutip pisortat ingerlatseqatigiiffiutaannut pisassiissutit qaffasinnerpaaffiat appartinnavianngilaa, Naalakkersuisulli piffissaq ungasinnerusoq eqqarsaatigalugu pisortat ingerlatseqatigiiffiutaannut – aamma Royal Greenlandimut – pisassiissutit qaffasinnerpaaffiannik appartitsinissaminnut piginnaatilersissavai.

Nassuiaammi allannguutip siunertaa ima allaatigineqarpoq:

- Ingerlatseqatigiiffiit pisortanit pigineqartut Kitaani raajartassaasa amerlanerpaaffissaat namminersortut pisassaasa amerlanerpaaffissaannut aalajangersakkanut naleqqussarneqartariaqarnissaat siunertaralugu allannguutissatut siunnersuusiortoqarpoq.

Oqaaseqaatinili aamma allassimavoq, naleqqussaaneq mianersortumik ingerlanneqartariaqartoq. Royal Greenlandip pisassiissutai ikilisinneqarpata tamanna ‘mianersortumik’ pissaaq:

Erhvervsinissamik suleqatigiinnermillu eqqartuineq

- Inuiaqatigiinnut pisussaaffittut suliassat pisortat ingerlatseqatigiiffiutaanit isumagineqartartut aaqqiiffigineqarnissaata suli pisariaqarnissaa naatsorsuutigineqarpoq. Taamaattumik pisortat ingerlatseqatigiiffiutaani pisassat amerlanerpaaffissaannik appartitsinissaq qajassuullugu ingerlanneqartariaqarpoq, pitsaanngitsumik sunniutaasinnaajunnartut minnerpaaffianiitsinniarlugit.

Nassuiaammi erseqqissarneqarpoq allannguutit qanoq kinguneqassanersut paasiniaqqaartariaqartut, pisassiissutissanillu ikilisaanermi ‘nalinginnaasumik najoqqutassiat biologiimut, aningaasaqarnermut inuiaqatigiinnullu ataavartumik ineriartornissamut tunngasut’ eqqarsaatigineqartariaqartut.

Naalakkersuisut oqaaseqaamminni namminersortunngorsaanissamut piginneqatigiinnermillu pilersitsinissamut periarfissat aamma pigisanik arsaarinnissuteqarnissamut apeqqutit eqqaavaat:

- Ingerlatseqatigiiffiit pisortanit pigineqartut pisassaasa naleqqussarneqareernerisa kingorna pisassiissutit naleqqussarniarneranni tamakkiisumik namminersortunngorsaanissaq imaluunniit najukkami aalisartunik suleqatigiinnermik pilersitsinissaq naatsorsuutigineqarpoq.

- Pisassat amerlanerpaaffissaannik appartitsineq ingerlatseqatigiffiit pisortat pigisaasa pisassaannik appariartitsisussaq piffissaqarluarluni nalunaarutigineqassaaq pinngitsaaliilluni taarsiissutitalimmik pigisanik piginnikkunnaartitsinertut apeqqusiisinnaanerit pinngitsoortinniarlugit.