Allattaanerup Kalaallit Nunaat Savalimmiullu ministerit siunnersuisooqatigiivini pissaaneqarnerulersinniarai
Nunat Avannarliit Ministeriisa Siunnersuisoqatigiivini allattaanerup Karen Ellemannip Kalaallit Nunaata Savalimmiullu tamakkiisumik ilaasortanngornissaat tapersersorpaa.
Naalakkersuisut siulittaasorisimasaata Múte B. Egedep (IA) Nunat Avannarliit Siunnersuisoqatigiivinik naalakkersuisut suleqatigiinnerat 2024-mi maajimi unitsikkallarlugulu ataatsimiinnerit peqataaffigiumajunnaarpai.
Toqqorsivimmiit assi: Leiff Josefsen
Kalaallit Nunaat Savalimmiullu nunatut namminersortutut nunat avannarliit ministeriisa siunnersuisooqatigiivini peqataasinnaatitaassapput.
Siunnersuisoqatigiit allattaanerat Karen Ellemann taama isumaqarpoq. Donald Trump USA-mi præsidentiutillugu kissaatigineqartoq „piviusunngortinneqarsinnaassasoq“ Politikenimut oqarpoq.
- Nunarsuarmi politikkikkut pissutsit maanna atuuttut nunani avannarlerni ataatsimoornissarput ataatsimoorlutalu nukittuumik iliuuseqarnissarput qanoq pingaaruteqartigisoq ersersikkaat qularutissaanngilaq, Karen Ellemann oqarpoq.
Savalimmiut, Kalaallit Nunaat Ålandilu tamakkiisumik ilaasortanngorsinnaaniassammata Helsingforsimi isumaqatigiissutip allanngortinneqarnissaa naalakkersuisunit tapersersorneqassasoq nunani avannarlerni suleqatigiinnermut ministeri Morten Dahlin (V) oqarpoq.
Inatsisinut tunngatillugu qulaajaasoqassasoq
Ministeriunerup Mette Frederiksenip (S) isumaqatigiissutip allanngortinneqarnissaa kissaatigalugu Sverigemi, Norgemi, Finlandimi Islandimilu ministeriuneqatini siornali allaffigai.
Karen Ellemann naapertorlugu allannguineq „inatsisinut tunngatillugu ajornakusoorsinnaavoq“, tamannali pissutigalugu allannguiniarneq unitsinneqassanngilaq, oqarpoq.
Politiken naapertorlugu nunani avannarlerni naalakkersuisut Kalaallit Nunaat, Savalimmiut Ålandilu tamakkiisumik ilaasortanngorpata qanoq ajornartorsiuteqalersinnaanera inatsisitigut misissorniarlugu qaammatip matuma ingerlanerani aalajangersimapput.
- Maannakkut inatsisinut tunngatilugu qulaajaanerit ingerlanneqarput, tamannali nunani avannarlerni suleqatigiinnerup nutarterneqarnissaanut naligiinnerulernissaanullu politikkikkut tapersersuinissamut akornutaassanngilaq, Morten Dahlin Ritzauimut allakkatigut oqaaseqaateqarpoq.
Múte B. Egedep peqataasarnini unitsikkallaraa
Kalaallit Nunaata Nunat Avannarliit Siunnersuisoqatigiivini peqataasarnini unitsikkallaraa siorna nalunaarutigineqarpoq.
Taamanikkut Kalaallit Nunaanni naalakkersuisut siulittaasuat Muté B. Egede naapertorlugu tamanna Sverigep Nunat Avannarliit Ministeriisa Siunnersuisoqatigiivini siulittaasuuffigisaata nalunaaruteqarmat Savalimmiut, Åland Kalaallit Nunaallu illersornissamut politikki pillugu ataatsimiinnermut qaaqquneqannginnerannik pissuteqarpoq.
Aamma Kalaallit Nunaanni naalakkersuisut siulittaasuat, Jens-Frederik Nielsen, nunani avannarlerni suleqatigiinnermi ataatsimiinnernut peqataajumanngitsoq oqaatigineqarpoq.
Nunat Avannarliit Siunnersuisoqatigiivi nunani avannarlerni suleqatigiinnermut tunngatillugu inatsisartuni ilaasortanut suleqatigiiffissatut 1952-imi pilersinneqarpoq. Siunnersuisoqatigiit qinikkanik Danmarkimeersunik, Finlandimeersunik, Islandimeersunik, Norgemeersunik, Sverigemeersunik, Savalimmiuneersunik, Kalaallit Nunaanneersunik Ålandimeersunillu 87-inik ilaasortaqarpoq.
Nunat Avannarliit Siunnersuisoqatigiivinut ilaasortat ukiumut marloriarlutik ataatsimiittarput, tassanilu pissutsit nunani avannarlerni naalakkersuisunit aaqqitsikkumaneqartut pillugit aalajangiisarput.
/ritzau/
