Alternativet: Utoqqatserneq saammaasseqatigiinnerunngilaq

Kalaallit nunaat 2014-imi Danmarkimut assammik isaassigaluarpoq 2014-imi saammaasseqatigiinnissamik ataatsimiititaliarsuarmik pilersitsinermigut. 

Taamani partiip naalakkersuisuutitaqartup Inuit Ataqatigiit saammaasseqatigiinnissamik pisariaqartitsisoqarnera saqqummiuppaat, siunertaaqqaarluni Kalaallit Nunaanni namminermi saammaasseqatigiinnissaq aammalu Kalaallit Nunaata Danmarkillu akornanni saammaasseqatigiinnissaq. 

Taamaakkaluartoq taamani Danskit naalakkersuisui qujaannarliutik  peqataarusunngillat. Taamani ministeriuneq Helle Thorning Schmidt (S) Danmarkip peqataarusunnginneranut tunngavilersuutigaa Kalaallit Nunaata Danmarkillu akornanni attaveqarneq "ajunngitsuusoq naligiissumillu ingerlasoq".

Taamanili "kalaallit danskillu akornanni ataatsimoortumik oqaluttuarisaanermi kapitalit taartut" suli iluamik qaqilerneqanngillat ataasiakkaarlugillu ukkatarineqaleratik.

Taamanikkut aamma oqaluttuarineqartumiippoq Inuit Ataqatigiit Siumumut 2014-imi Inatsisartut-mut qinersinermi ajorsarnerat pimmat, taamanikkullu Danmarkimut attaveqarneq allaanerusoq siunnerfigineqarmat. Tamannalu Danmarkimi naalakkersuisut peqataarusunnginnerannut pissutaaqataasimanersoq nalunarpoq.

Taamanikkullu Inatsisartunut qinersinerup kingorna aamma Naalakkersuisut allanngornerisa kingorna, Kalaallit Nunaat Danmarkimik peqateqarani saammaasseqatigiinnissamik suliaqarniarluni aallartippoq, Kalaallit Nunaanni namminermi saammaasseqatigiinnissaq sammineqarluni. Ataatsimiititaliarsuup 2017-imi suliaqarnerminit nalunaarusiaq saqqummersippaa, taamanili saammaasseqatigiinnissaq pillugu sammisaq iluamik ukkatarineqanngilaq.

Maannali danskit partiivisa ilaat Alternativet piumasaqarpoq Kalaallit Nunaata Danmarkillu akornanni saammaasseqatigiinnissamik suliaqarneq aallartinneqassasoq.

Utoqqatserneq saammaasseqatigiinnerunngilaq

- Naalagaaffiup ministeriunerata ukioq manna spiralilersuisimaneq pillugu utoqqatsernera  pissusissamisoorpoq, tassami kalaallit arnat niviarsiaqqallu 1960-ikkunni 70-ikkunnilu spiralilersorneqarsimapput akuersissuteqarnatik inunnik amerlassusaatigut politikkikkut aqutsiniarnermik misileraatitut. Suliaq, soorunami  inuiaqatigiinni kalaallini itisuumik annertuumillu sunniuteqarsimasoq - aammalu Danmarkip Kalaallit Nunaatalu ungasilliartortoqarneranut pissutaaqataasoq. 

- Kisianni utoqqatserneq saammaasseqatigiinnerunngilaq, Alternativetip Kalaallit Nunaat pillugu oqaaseqartartua Sascha Faxe Sermitsiamut oqarpoq.

Utoqqatsernerit ataasiakkaat naammanngillat

Alternativet isumaqarpoq Danmarkip Kalaallit Nunaat inuiaqatigiillu kalaallit ajunnginnerpaamik ingerlanissaanut tapertaalluassappat, taava pisariaqartoq utoqqatsernerit ataasiakkaat kisiisa pinnagit annertunerusumik suliaqartoqartariaqartoq. 

- Pisariaqarpoq piviusumik saammaasseqatigiissinnaanissamut piumassuseqarneq - suliaqartoqartariaqarpoq pisimasut ataasiakkaat kisiisa eqqarsaatiginagit, kisianni aamma nunasiaateqarsimanerup kingunerisaanik kingornussat aammalu pissutsit tassunga tunngasut qaqilerneqartariaqarput.

- Alternativiniit Kalaallit Nunaannik attaveqaqateqarneq, aammalu nunasiaatigineqarsimaneranut tunngassuteqartut pillugit tassaaginnanngisaannarpoq naalagaaffeqatigiinnermi inatsisitigut sinaakkutanut tunngassuteqartoq. Nalunngilarput, allakkatigut nalunaarusiorsinnaavugut naaffeqanngiusartumik, kisianni pappiaqqat kisimiillutik attaveqaqatigiinnermut allannguutaasinnaanngillat. Allanngortitsisinnaasut tassaapput iliuuseqarneq aammalu pimoorussineq.

Ataatsimoorussamik saammaasseqatigiinnissamik sulissuteqarneq aallartinneqartariaqartoq

Taamatut suliaqassagaanni pisariitsuinnaanavianngilaq. Piffissamik sivisuumik, utaqqisinnaanermik aningaasaliinernillu pisariaqartitsisoqassasoq naatsorsuutigineqartariaqarpoq. 

- Taamak sulissuteqarnermi pisariaqartinneqassaaq, Danmarkip siornatigut naalagaaffittut nunasiaateqarsimasutut inissisimanerminik akisussaaffimmik pisussaaffimmillu tigusisariaqarneranik, aammalu piffissap ingerlanerani pisimasut anniaatillu akisussaaffigissallugit. Suliallu ingerlanneqarnerani pimoorussilluta Kalaallit Nunaat inuiaqatigiillu kalaallit pisariaqartitaat naalaartariaqarpagut. Taakkulu ilaatigut taarsiinissamik, sanaartornermik isumaginninnermillu imaqarsinnaapput.

Alternativet isumaqarpoq taamatut ingerlatsinermik aallartitsineq pingaarnerpaamik takutitsissasoq, Danmarkip attaveqatigiinneq pimoorullugu ingerlakkusukkaa. Oqaatsit kisiisa pinnagit, Kalaallit Nunaat peqatigalugu saammaasseqatigiinnissamut aqqut atuassallugu. Danmarkip Kalaallit Nunaallu ataatsimoorlutik saammaasseqatigiinneq ingerlatsinissamik aallartitsinissaq piffissanngunngila, Sascha Faxe aperivoq.

- Alternativet piareersimavoq suliniummik aallartitsissalluni. Utoqqatserneq aallarniutaasinnaavoq. Kisianni saammaasseqatigiinneq ilumoortoq anguneqassappat aqqutaa tamaat ingerlavigisariaqarparput, Alternativetip Kalaallit Nunaat pillugu oqaaseqartartua, Sascha Faxe naggasiivoq .