Ambassadøri Chistophe Parisot: Kalaallit Nunaata suleqatiginissaa Præsident Macronip pingaartippaa
Oqaluttuarisaanermi Frankrigip Kalaallit Nunaatalu akornanni attaveqatigiinneq qanittuuvoq. Kisianni generalkonsulati ammarneqarpat suleqatigiinneq suli qaninnerulissaaq nukittorsarneqarlunilu. Danmarkimi Frankrigip ambassadøriannik, Christophe Parisotimik Sermitsiaq naapitsivoq.
Frankrigip Danmarkimi aallartitaa, Christophe Parisot sisamassaa Kalaallit Nunaanniippoq. - Præsident Macronip aalajangerpaa generalkonsulati Kalaallit Nunaanni ammarneqassasoq, piareersaallutalu sulineq aallartereerparput. Ammarnissaanut sivisusinnaavoq, ataqatigiissaagassat tamarmik konsulatip pilersinneqannginnerani piareerneqaqqaartariaqarmata, taamaammat mianersortumik naatsorsuutigaarput 2026-imi Frankrigip generalkonsulatia Nuummi ammarneqarsinnaasoq, Sermitsiamut oqarpoq.
Foto: Jensine Berthelsen
Amerikamiut præsidentiata Kalaallit Nunaannut Danmarkimullu tatisimannileruttorfiani, pingaartumik ukioq manna aallartisimalaarnerani, nunat siuttui Trumpimut akerliunissaminnut nangaassuteqartut imaaginnavipput.
Taamaattorli Frankrigip præsidentia franskillu naalakkersuisui nangaarianngivillutik januaarimi nalunaaruteqarput Frankrig piareersimasoq Kalaallit Nunaanni sakkutuuliinissaminut, Kalaallit Nunaat Danmarkilu pisariaqartitsippata.
Tamatuma kingorna amerikamiut præsidentiat Kalaallit Nunaannut Danmarkimullu oqaatsitigut peqqarniitsumik pissusilersorluni kimigiisernerminik unikaallatsitsivoq.
Sivitsunngitsorli qaangiummat, amerikamiut præsidentiat Donald Trump suli sakkortuseriaannarluni kimigiiseqqilerpoq, ilaatigut oqarluni Kalaallit Nunaat USA-mut ilanngunneqassasoq nangaassutiginngikkini, allaallu pisariaqassappat sakkutuuliinissaminut tunuarsimaarnaviarani.
Taamanikkut Frankrigip præsidentia Emmanuel Macron aamma piareersimavoq. Taassuma ullorsiutimini pilersaarutini allanngortippai Kalaallit Nunaannut tikeraarsinnaajumalluni, Frankrigillu tapersersuinera nalunaarutigeqqikkumallugu, tikeraarnerlu pivoq juunip 15-iani 2025.
Macron tikeraarnermini, nalunaarpoq generalkonsulati (sinniisoqarfik) Kalaallit Nunaanni ammarneqassasoq, tassalu Macronip tikeraarnerata kingorna Frankrigip Danmarkimut aallartitaa, Christophe Parisot maanna Kalaallit Nunaanniippoq.
- Præsidenti Emmanuel Macronip suleqatigiinnerup nukittorsarnissaa pingaartilluinnarpaa, præsidentillu oqaatsimi timitalimmik iliuuseqarfigineqarnissaanik naatsorsuutiginnippoq, generalkonsulatillu piviusunngortinneqarnissaa piaarnerpaamik peqqussutigaa, taamaalilluta Kalaallit Nunaanniinnerput ataavarnerusunngortinneqassammat, tamatumalu malitsigisaanik suleqatigiinnitta tigussaanerusumik timitalersorneqarnissaa periarfissarissaarnerulerniassammat, taamaalillutalu suleqatigiinnerup nukittorsarnissaanut periarfissanik pilersitsillunilu, Parisot Sermitsiamut nassuiaavoq.
2026-imi ammarneqarnissaa ilimanarpoq
Christophe Parisot oqaluttuarpoq ataqatigiissaarinermik suliassat amerlasuut piareersarneqartariaqartut, generalkonsulati aallartinneqartinnagu.
- Missingersuutinut ilanngunneqartariaqarpoq, konsulatip inissisimaffissaanik illumik naleqquttumik nassaarniartussaavugut, atorfiup inuttassarsiuunneqarnissaa isumagineqartussaavoq, piareersarnernilu suliassat amerlasuut suliarineqartussaapput, taamaattumik konsulati qaqugu aallartissinnaanera naatsorsoruminaappoq, kisianni 2026-imi aallartissinnaanissaa ilimagissallugu mianersortumik naatsorsuutigivara, piareersarnerit ajunngitsumik ingerlariarpata taanna ilimagivara, franskit Danmarkimi ambassadøriat Sermitsiamut oqaluttuarpoq, nangillunilu:
- Kisianni generalkonsulimik nassaarnissatsinnut ajornartorsiuteqarnavianngilagut, tassami Macronip Frankrigip Kalaallit Nunaanni generalkonsulati peqartariaqarnera nalunaarutigeqqamiinnaraalu, soqutiginnittut amerlasuut saaffiginnittarput, atorfiup soqutiginartillugu imminnut piukkuttut saaffiginnittarmata, Christophe Parisot qungujulluni oqaluttuarpoq.
Kristine Winberg ullumikkut Nuummi Frankrigip konsuli honorær-iuvoq, kisianni taassuma suliassai amerlanertigut Frankrigimiusut innuttaassusillit ikiorneqarnissamik pisariaqartitsisut taassuma sullinnerusarpai, tassa inuttut saaffiginninnernut tunngassuteqarnerusut suliarisarpai, generalkonsulatilli pilersinneqartussap politikkikkut aalajangersakkanik timitaliinissamik suliaqartassallunilu Kalaallit Nunaata Frankrigillu akornanni suleqatigiinnerup annertusarneqarnissaanik sulissutiginnittussaassaaq.
- Assersuutigiinnarlugu nunat sulissutigisassatut aalajangersimasaasa timitalersorneqarneranni suleqataasassaaq, taamaalillunilu nunat isumaqatigiissutigisaannik piviusunngortitsinissamut suleqataasassalluni. Assersuutigalugu inuussutissarsiornermut, kulturimut, ilinniartitaanermut ilisimatusarnermullu siuarsaanermut paarlaasseqatigiinnermullu aqqutissiuussinerniusinnaavoq, taamatullu suliassat piffissami sivisuumi anguniakkanut attuumassuteqartut timitalersorneqarneraniusinnaalluni. Kisianni siullertut nunat suleqatigiinnerat nukittorsarneqassaaq, tamannalu qilanaaraarput, Christophe Parisot Sermitsiamut oqarpoq.
