Amerikamiut nunanut allanut tunngasunut (Council on Foreign Relations, aaqq.) isummersortitaannut ilaasortat nuimasut 22-t Ilulissanut Nuummullu tikeraarput. Nunanut allanut tunngasunut naalakkersuisoq Vivian Motzfeldt Avannaatalu Kommuniani borgmesteri Lars Erik Gabrielsen ilaatigut ataatsimeeqatigineqassapput.
Aallartitat politikkikkullu anguniakkamik aalajangersimasunik siunertaqaratik Kalaallit Nunaannut paasinninnissaq siunertaralugu tusarnaariartorlutik erseqqissarpaat.
Amerikamiut nunanut allanut tunngasunut (Council on Foreign Relations, aaqq.) isummersortitaannut ilaasortat nuimasut 22-t Ilulissanut Nuummullu tikeraarput. Nunanut allanut tunngasunut naalakkersuisoq Vivian Motzfeldt Avannaatalu Kommuniani borgmesteri Lars Erik Gabrielsen ilaatigut ataatsimeeqatigineqassapput.
Aallartitat politikkikkullu anguniakkamik aalajangersimasunik siunertaqaratik Kalaallit Nunaannut paasinninnissaq siunertaralugu tusarnaariartorlutik erseqqissarpaat.
Trumpimut attuumassuteqanngitsut
Aallartitat Nunatsinniittut isumalioqatigiissitap siulittaasuanit Michael Fromanimit, 2013-imiit 2017-imut præsident Barack Obamap nunat tamalaat akornanni niuernermut aningaasaliinermullu tunngasunut siunnersortianit pingaarnermit, siulersorneqarput.
“Isummersortitat Kalaallit Nunaannut angalaneranni kalaallit tusarnaarnissaat ilinniarfiginissaallu siunertaavoq, ingammik silap pissusiata allanngoriartorneranut, nukissiuutinik ineriartortitsinermut issittumilu isumannaatsuunermut tunngasut pillugit,” isummersortitat oqaaseqartartuat Sermitsiamut allappoq.
Tikeraat 22-t taakkua arlaannaalluunniit USA-mi naalakkersuisunut maanna atuuttunut attuumassuteqanngitsut oqaaseqartartup aamma erseqqissarpaa.
"Isummersortitat politikkikkut aalajangersimasunik siunertaqaratik oqaloqatigiinnerulernissaq paaseqatigiinnerulernissarlu siunertaraat“ allappoq.
Nuummi Ilulissanilu ataatsimiinnerit
Isummersortitat tikeraarnerminni nunanut allanut naalakkersuisoq Vivian Motzfeldt, USA-mi Canadamilu aallartitaqarfiit pisortaat Jacob Isbosethsen, Issittumi aallartitaq Kenneth Høegh, Avannaata Kommuniani borgmesteri Lars-Erik Gabrielsen kommunimilu pisortaq Nick Nielsen kiisalu Issittumi Sakkutooqarfimmi majori Søren Andersen ataatsimeeqatigissavaat.
Isummersortitaq politikkimut attuumassuteqanngitsuusoq
Nunanut allanut tunngasunut isummersortitat 1921-mi pilersinneqartut arlaannaannulluunniit attuumassuteqaratik suliaqartuupput. Taakku quppersagaq nunarsuami pisut immikkut ilisimasallit misissuinerat aallaavigalugu inuiaqatigiinni oqallinnissamik tunngaviusoq, Foreign Affairs, saqqummersittarpaat.
Isummersortitat Trumpip aqutsineranut attuumassuteqanngitsut Danmarkimi nunanut allanut tunngasunut misissuisoqarfimmi (DIIS-imi) ilisimatusartuunerup Rasmus Sinding Søndergaardip uppernarsarpaa:
- Nunanut allanut tunngasunut ministeriusimasut ilisimatuullu politikkikkut illuatungeriinneersut isummersortitami ilaasortaapput. Taakkuupput isummersortitat "pikkorivissut", taamaattumillu Trumpip aqutsineranut imaluunniit USA-mi politikkimi ingasattajaarnerusunut qanimut attaveqartorsuunatik - attaveqassagunimmi.
– Paasissutissanik tunngaveqartunik paasinninnerorusussasut ilimagaara. Suliniaqatigiiffippassuit Nunanullu allanut tunngasut pillugit isummersortitat Kalaallit Nunaat ukiuni qulikkuutaani eqqarsaatigisimagunanngilaat. Trumpilli Kalaallit Nunaannut soqutiginnilermat Kalaallit Nunaat pillugu ilisimasanik ineriartortitsinissaq pingaaruteqalerpoq, taamaalilluni oqallinnermut peqataasoqarsinnaalluni, Rasmus Sinding Søndergaard oqarpoq.
