Anaanaasup meeqqallu attaveqatigiinnerat inuunermut pingaaruteqarluinnarpoq

- Meeqqap inunngoqqammernerani anaanaasup meeqqallu ataatsimoornissaat pissusissamisoortutuaavoq. Anaanaasoq meerarlu siusissukkut avissaartinneqartariaqassappata, tamanna pissaaq taakkua imminnut attaveqarlualereerpata, anaanaasorlu attaveqarfigiuaannarneqartariaqarpoq anaanaasullu kulturia ataavartumik attanneqartariaqarluni.

Inger Thormann Københavnip Universitetiani tarnip pissusiinik ilinniarsimasoq isumaginninnermilu perorsaasutut ilinniagalik taama oqarpoq. Taanna ukiut 30-t ingerlaneranni Skodsborgimi nakkutigineqartussanut katsorsarneqartussanullu angerlarsimaffimmi tarnip pissusaanik ilisimasalittut atorfeqarsimavoq. Tamatuma saniatigut Kalaallit Nunaat pillugu ilisimasaqarluarpoq, naalungiarsunnik katsorsaasartunik 70-inik ilinniartitseqataasimagami aamma 2000-imiilli Uummannami meeqqat angerlarsimaffianni tarnip pissusaanik ilisimasalittut siunnersortitut atuussimagami.

 Timi eqqaamannittartoq 

Inger Thormannip eqqumiiginartittorujussuuaa, ullumikkut Danmarkimi inoorlaaq inunngorneranit nalunaaquttap akunneri marluk qaangiutiinnartut anaanaminit peersinneqartarmat, soorlu Keira Alexandra Kronvoldimut, Thisted Kommunemeersumut, tunngatillugu taama pisoqartoq.

 – Meeqqat anaanamik suli naavaniitillutik qanoq misigisarnersut, ullumikkut ilisimasaqarfigilluarpavut. Attaveqarneq misigissutsikkullu ataqatigiinneq, anaanaasup meeqqallu akornanni ineriartortartoq, siusissukkut pilersinneqartarpoq, timittalu eqqaamasaani tamanna pigisarparput.

Inger Thormannip oqaatigisaa naapertorlugu, meeqqap taama siusitsigisukkut anaanaminit peersinneqartarnera sumiginnaanermut assinguvoq. – Meeraq anaanami naavaniitilluni kissalaartumiittarpoq, arnamilu uummataata tillernera naartuunermini tusarnaartarlugu. Taamaattumik meeqqap inunngornermi kinguninngua arnami sakiaanut pisinneqarnissaa pingaaruteqarpoq, arnamilu uummataata tillernera ilisimasani tusarnaassallugu. Tamanna saamasumik inunngorneruvoq, eqqissisimasumillu silarsuarmut anillannerulluni. Inoorlaap qalasia kipineqareerpat meeraq milutsinneqassaaq.

Meeqqap pisariaqartitaanut naapertuutinngitsoq 

Kommunimmi meeqqat inunnguinnartut pinngitsaalillugit inissinneqarnissaat qitornavissiarnngortinneqarnissaallu ajornannginnerulermat Meeqqat pillugit inatsit ukioq manna akuerineqartoq ajuusaarnartoq Inger Thormann oqarpoq. - Meeraq inunngornermi kingorna ingerlaannaq nuunneqaruni inuunermini aallartilluarnavianngilaq, aamma meeqqap anaanaminit avissaartinneqarnera meeqqap pisariaqartitaanut naapertuutinngilaq. Meeqqat ilaat qitornavissianngortinneqarsinnaapput, tamannali taama sukkatigisariaqanngilaq. Inger Thormann naapertorlugu meeraq anaanaminit arsaarinnissutaasariaqarpat pisimasoq pillugu unneqqarissumik oqaluttoqarnissaa qulakkeerneqassaaq. Allatut oqaatigalugu meeraq – aamma meeraaraq – qanoq pisoqarneranik aamma sooq anaanaminiissinnaannginneranik oqaluttuunneqassaaq.

 Meeqqap oqaluttuassartaa 

Meeqqap oqaluttuassartaata annertuumik pingaaruteqarnera Inger Thormann suleqataatalu Inger Poulsenip Henrik Dybvad Larsenillu atuagassiami ”Når vi skader børn ud fra det bedste hensigt”-imi (Ajunnginnerpaamik isumaqarluta meeraq innarleraangatsigu, aaqq.) 2023-mi saqqummersumi allaaseraat.

„Meeqqap oqaluttuarisaanera inuunera pillugu piviusunik imaqassaaq. Assersuutigalugu anaanami naavani angajoqqaaminit pinngortitaasimasoq, tamakkulu pissutigalugit aalajangertoqarsimasoq. Anaanaata qitornani tigumminniinnarusussimappagu tamanna aamma oqaluttuarineqassaaq. Piviusoq kisimi oqalutuarineqartariaqarpoq. Tamakku tamarmik meeqqap nunarsuarmi inissisimaffimminik paasinninnissaanut iluaqutaassapput.

Meeraq sorlaqarfimminiit peerneqariasaarpat, tamanna meeqqap eqqaamasaani kiisalu oqaluttuarineqartuni naapertuuttoqannginneranik pilersitsissaaq, tamannalu meeqqap malugalugulu atugarliornermut ersiutinik assigiinngitsunik — aamma ”qimanneqarsimasutut” misiginermik qisuariassaaq. Kimit pinngortinneqarsimanerup ilisimanissaa nunarsuarmi namminiulernissamut tunngavissat ilagaat. Tamanna meeqqap inuuneranut pingaaruteqartoq Inger Thormann oqarpoq. Meeqqap inunngornermini angajoqqaavi akuerigaanni aamma meeraq akuerinneqassaaq, oqarpoq.