Ane Hansen: Qajannaatsumik tunngaveqarpugut nalorninartoqartaraluartoq

Kommune Qeqertalik nunatsinni kommunit minnersaraat. Innuttaasut ikiliartorput, taamatuttaaq suliffeqarfiit suliffissanik pilersitsisut matuneqarnissaannik, aningaasaliinissamut sanaartornissamullu pilersaarutit tunuarsimaarutigineqarput.

Aarlerinartut tamakku timitalerneqassagunik kommunip missingersuutaanut pitsaanngitsumik sunniuteqassasut ilimanarpoq, ajornartoorsinnaanermut aaqqiissutissat nassaarineqanngippata.

Kisianni aarlerinartut taamaannerat borgmesteri Ane Hansen (IA)-p annilaartaatiginngilai :

- Aaqqissuussaanikkut allannguutit annertuut takkuttussaapput, ilaatigut aalisarnermut inatsisip akuersissutigineqarnerata kingorna. Suliffinnik matusisoqarsinnaanera navianartorsiortitsisut annertuut oqallinnerit ingerlanneqarput, soorlu aalisakkerivik ulloq unnuarlu ukioq naallugu 120-inik sulisoqartoq matumani pineqartut ilagaat. 

- Suliffissuup matuneqannginnissaa pillugu annertuumik suliniuteqarpugut, Polar Seafoodip aalisarnermut inatsisip akuersissutigineqarnera sioqqullugu suliffissuup matuneqarnissaa saqqummiummaguli. Taamaattumik aalisakkerivik ammatiinnarniarlugu pimoorussilluta suliniuteqarpugut, Naalakkersuisullu suliffissuup matuneqarnissaanik pinngitsoortitsiniarlutik oqaloqatigiinnerat aaqqiissutissamik tamarmik akuersaarsinnaasamik kinguneqassasoq naatsorsuutigaara.

Taamaattorli Aasianni suliffissuaq kisiartaanngilaq Kommune Qeqertalimmi inuussutissarsiuteqarnikkut ingerlatsiviusoq taamaalillunilu suliffissanik qularnaarinnittuusoq:

- Kommunerput ilinniartoqarfiuvoq, uagutsinnullu pingaaruteqarpoq kommunitta ilinniartoqarfittut ingerlaannarnissaa ineriartortitsiviunissaalu. Tamatuma saniatigut Avannaani pilersuinermi qitiusoqarfiuvugut, aamma qularutiginngilarput Qasigiannguani Aasiannilu erngup nukinga atorlugu nukissiuutitigut inerisarneqarnera suliffissanik nutaanik pilersitsisoqarnissaanut tunngavisseeqataajumaartoq.

Taamaattumik, Kommune Qeqertalimmi kommunalbestyrelse aamma pilersitsinikuuvoq siunnersuisarfimmik "Qeqertalik Business Council"-imik, taassuma suliffeqarfinnut nutaanut pioreersunullu ineriartortitsinermi siunnersuisarnermik suliassarivai, taamatuttaaq  takornariaqarnerup ineriartortinneqarnera suliassaanut ilaalluni.

Akileraarummik procentinik marlunnik appaaneq aamma atugarissaarnerulernissamik sulissutiginninneq annertusaaneq

Qinigaaffiit marluk ingerlanerini Kommune Qeqertaliup aaqqissuussaanera annertuumik immikkuullarissumillu nutarteriffigineqarsimavoq, innuttaasut amerlassusaannut naleqqussagaalluni, tamatumalu ilutigisaanik  sulissutigineqarpoq inuit kommunimut nuunnissaaannik pilerisaarutigineqarnera:

- Akileraarutinik appartitsinermi ukioq manna piviusunngortinneqartumi siunertaavoq kommunitsinnut nutaanik innuttaasussanik nuukkusilersitsinissaq, soorunalumi aamma siunertarineqarpoq innuttaasut maani najugartut aningaasanik pisissutissaqarnerulersinneqarnissaat.

- Atugarissaarnikkut pitsanngorsaatinik suliaqarnitsinni siunertaavoq sulisussanik amigaateqarnerup qaangerniarneqarnissaa, upperaarput innuttaasut pisortanit ikiorsiissutinik ikiorserneqartut tapersersorlugit inuunerissarnerisigut piginnaasaatigullu qaffassaanikkut sulinermut ikaarsaarsinnaasut arlaqartut, kommunitsinnimi nunatta sinneratut inuussutissarsiortut pisortallu ingerlatsivii sulisussaaleqinermik eqqugaaqqavoq.

Borgmesterip erseqqissaatigaa kommunimi suliassat, amerlanertigut tassaasut assaat kissalaartut, sulisussameernerullu kingunerisaanik aaqqiissutissarsiortoqarsimavoq inuit sulisussatut pisariaqartinneqartut nunaqarfiinut nassiunneqartarnerisigut.

- Pingaartumik aasakkut sulisussaaleqiffiusarpoq, sulisut sulinngiffeqarnerisa nalaanni. Assersuutigalugu Kitsissuarsuarni, meeqqerivimmi sulisut allanilu ikiortarialinnut sullissisut sulinngiffeqarneranni, taava Aasianniit imaluunniit kommunimi sumiiffinni allaniit taartaasussanik nassiussisarpugut. Taamaalilluta sullissinerup ingerlaavartuunissaa qulakkeerniartarparput, borgmesteri oqaluttuarpoq.

Kommunimi tamarmi ineriartortoqarpoq

Borgmesterip aamma erseqqissaatigaa Qeqertarsuarmi takornariaqarneq siuariartorfiusoq, tamatumalu kingunerisaanik takornariaqarnermut attuumassutilinnik nutaanik suliffinnik pilersitsiortortoqarsimasoq.

- Kangaatsiaq aamma ersarinnerulerpoq, ilaatigut nutaanik aallarniutaasunik, inuit illoqarfimmut nunaqarfiinullu tikeraartarnissaannik kaammattuutaasunik, soorlu assersuutigalugu "Qooqa-Festival" Visit Greenlandip aamma nittarsaassineratigut takornariartitsisarnermik, nunanit tamalaanit aamma nunatsinniit tikeraartitsisarnermik, borgmester oqaluttuarpoq.

Akunnaami aamma "Franskinut attaveqaatit"-nik ukiut tamaasa pisartunnguuttumik ineriartortitsisoqarpoq. Franskit eqqumiitsuliortut Akunnaamut isumassarsioriartortarput, ilaatigut qaammatit pingasut tikillugit Akunnaamiittarput . Franskillu eqqumiitsuliortut Akunnaameereeraangamik nunaminnut angerlaqqittarput, tassanilu Akunnaamiissimanertik tunngavigalugu saqqummersitsisarlutik.

Iliuutsit tamakku tamarmik kommunimi takornariartartut amerliartornerannut pissutaapput, kisianni borgmesterip erseqqissaatigaa kommunalbestyrelsip siunertarigaa takornariaqarnerup ineriartortinneqarnera aqunneqarsinnaajuaannassasoq, pingaartumik Kitaani nuna allanngutsaaliugaq piviusunngortinneqarpat.