Angajoqqaat sinniisui kommunalbestyrelsemut ikioqqusut
Qaqortumi angajoqqaat sinniisuinut ilaasortat sisamat illoqarfiup meeqqeriviini pissutsit ernummatigigamikkit ikioqqupput.
Foto: Trine Juncher
Meeqqat kommunillu siunissaat eqqarsaatigalugit Qaqortumi meeqqeriviit pitsaanerulersinnissaat Kommune Kujallermi kommunalbestyrelsimut qinigaarlaat pingaarnersiortariaqarpaat.
Meeqqerivinni sisamani Inneriilami, Tunguusaami, Aqqalumi Angajumilu angajoqqaat sinniisaanni ilaasortat politikerinut ammasumik taamatut allapput:
- Allaffigaasi massakkoqqissaaq meeqqeriviit
inissisimaffii assut ernumassutigigatsigit.
- Ukiuni
kingullerni Kommune Kujallermi sipaarniarneq assut kingulerlutsitsivoq. Sulisut
ilinniarsimasut amigaataapput, meeqqeriviit illui nungullarsimapput, aserfallatsaaliuinerit pisariaqavissut ingerlanneqanngillat kiisalu
tamakkiisumik isigalugu meeqqanut sulisunullu avatangiisiit suli
ajornerulerlutik, allakkani ilaatigut allassimavoq.
Angajoqqaat sinnissaanni ilaasortat meeqqerivik Aqqaluk assersuutigaat. Meeqqerivik ukiuni pingasuni matoqqareertoq nutarterineq suli aallartinneqarsimanngilaq, unittooqqanerullu angajoqqaat
meeqqallu akornanni nikallornarlunilu aningaasaliisoqannginneranik ersersitsisoq angajoqqaat inerniliuppaat.
Sisamanngornermi akerliussutsimik takutitsiniartut
Sulisut atugaat pitsanngorsarnissai aamma kissaatigaat. Sulisut suliffimmi suliinnarnissaat anguniarlugu sulisunik piginnaanngorsaaanermut, sulineranni atugassarititat pitsanngorsarnerisigut iluaqutillu aningaasaliiffiginissaat aamma ujartorneqarpoq.
Angajoqqaat sinniisaannut ilaasortat kommunip sipaarniuteqarnera oqaloqatigiissutiginiarlugu naapissimallutik aamma paasissutissiissutigaat.
Angajoqqaat sisamanngornermi nal. 11.30 puilasuliamit kommunip allaffianut eqqissisimasumik akerliussutsimik takutitsillutik ingerlaaqatigiinnissaq aaqqissuuppaat.
Kommune Kujalleq aningaasaqarnikkut annertuumik ajornartorsiuteqartoq, ilaatigut Namminersorlutik Oqartussanut 40 millionit koruuninik akileraarutitigut akiitsoqalersimasoq, siorna upernaakkut saqqummiunneqarpoq.
Kommunip akiitsoqarneq aaqqiiviginarlugu ilaatigut sipaarniuteqarlunilu nutaamik taarsigassarsinikuuvoq.
