Angajoqqaat sulinngiffeqartarnerisa sivitsorneqarnissaanut siunnersuut taperserneqarpoq
Inatsisartut ataatsimiinneranni ilaasortat tamarmiusut angajoqqaat meeqqaminnik qaammatini siullerni piffissaqarnerunissaata pingaaruteqassusaa isumaqatigiissutigaat. Angajoqqaat sulinngiffeqartarnerisa sivitsorneqarnissaannut siunnersuut taamaalilluni partiinit tamarnit taperserneqarpoq, aappassaaneerneqannginneranilu ataatsimiititaliamut suliassanngorlugu ingerlateqqinneqarluni.
Leiff Josefsen
Angajoqqaat sulinngiffeqartarnerisa sivitsorneqarnissaanut siunnersuut marlunngornermi apriilip 30-ani Inatsisartuni siullermeerlugu suliarineqarpoq, tapersersorneqarlunilu.
Siunnersuutip, Demokraatineersup Anna Wangenheimip saqqummiussaani, angajoqqaat sulinngiffeqarnerisa maannakkut sapaatip-akunnerini 21-niit 37-nut sivitsorneqarnissaa aamma angajoqqaat sulinngiffeqarnerminnik qanoq agguataarisinnaanissaat piumasarineqarpoq.
Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisup siunnersuut akuerineqarnissaanik innersuussuteqarpoq, siunnersuullu illuatungiliuttuniit naalakkersuisooqatigiinniillu aamma taperserneqarpoq.
Siunnersuutip Inatsisartuni suliarineqarnerani oqallinnermi ilaasortat arlallit angajoqqaat meeqqamik qaammatini siullerni inuuneranni piffissaqarnerunissaata pingaaruteqarnera isumaqatigiissutigaat, taamaattumillu siunnersuut illuatungiliuttuniit naalakkersuisooqatigiinniillu tamarmiusunit tapersersorneqarluni.
Piniartut nuliaallu aamma eqqaaneqartut
Inatsisartut marlunngornermi ataatsimiinneranni angajoqqaatut sulinngiffeqarnerup sivitsorneqarnissaa kisiat eqqartorneqanngilaq, aammali piniartut nuliaallu inatsisissamut ilanngunneqarnissaata pisariaqarnera eqqartorneqarpoq.
Piniartut, aalisartut pissakitsullu tamarmik angajoqqaatut sulinngiffeqarnissamut inatsisissatut siunnersuutip atuunnerani ilanngullutik sulinngiffeqarsinnaanissaat neriuutigaa.
Qaqugu atuutilersinneqassava?
Partiit tamarmiusut siunnersuummut tapersersuimmata inatsip qaqugu atuutilersinneqarsinnaanera naatsorsuutigisinnaaneraat Anna Wangenheimip ilaasortanut apeqqutiga. Mala Høy Kuko Siumumeersoq naapertorlugu atuutilersinneqarnissaa aningaasanut inatsisissap suliarineqarnerani eqqartorneqarsinnaasoq oqaatigaa.
Anna Wangenheimip siunnersuutimi taperserneqarluarnera nuannaarutigaa, suliarineqaqqinnissaanullu qilanaarnerarluni.
Anna Wangenheimip angajoqqaatut sulinngiffeqarnerup sivitsorneqarnissaanik siunnersuutaa siullermeerneqarmat Inatsisartut Naalakkersuisullu taperserpaat. Siunnersuut maanna aappassaaneerneqartinnagu ataatsimiititaliamut ingerlateqqinneqassaaq. Maajip 22-ani aappassaaneerneqassaaq.
