Politikki
Angajoqqaat sulinngiffeqartarnerisa sivitsorneqarnissaat Naalakkersuisut ajunngitsutut isigaat
Angajoqqaat sulinngiffeqartarnerat sapaatit akunnerinit 21-init 37-nut sivitsorneqassava? Tamanna Inatsisartut Naalakkersuisullu ullumi marlunngornermi oqaluuserissavaat. Siunnersuut Naalakkersuisut akuereqqullugu innersuussutigaat isumaqarlutillu, erninermi sulinngiffeqartarneq pillugu malittarisassat iluarsaannissaannut piffissanngortoq.
Thomas Rousing/Ritzau Scanpix
Angajoqqaanngortussat meerartaarunik inoorlaajutertik piffissaqarfiginerunissaanut naatsorsuuteqassannguatsiarput.
Inatsisartuni ilaasortaq, Anna Wangenheim (D) angajoqqaatut sulinngiffeqartarnerup sapaatip akunnerini 21-init 37-inut sivitsorneqarnissaanik, aammalu angajoqqaat kiffaanngissuseqarlutik namminneq sulinngiffeqarnermik aalajangiisinnaanissaannut siunnersuuteqarpoq.
- Piffissanngorpoq
Anna Wangenheimip siunnersuutaanut Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane akissuteqaluni allappoq angajoqqaat sulinngiffeqartarnerisa sivitsorneqarnissaat ajunngitsutut isigalugu:
- Suliassaqarfimmi iliuuserisinnaasagut pitsanngoriaataasinnaasut amerlaqaat. Taamaattumik Naalakkersuisut isumaqarput, erninermi sulinngiffeqartarneq pillugu malittarisassat iluarsaannissaannut piffissanngortoq. Tamatumani angajoqqaat sulinngiffeqartarnerisa sivitsorneqarnissaat tulluartuuvoq isiginiassallugu.
Ataataasut ilanngutissapput
Naalakkersuisoq aamma allappoq erninermi sulinngiffeqartarnermut tunngatillugu naligiissitaanissamut aqqutissaq suli takeqisoq. Naalakkersuisoq naapertorlugu arnat meerartaarnermut ataatsimut inuunerminni isertitaminnik agguaqatigiissillugu 10 %-ii annaasarpaat, angutillu isertitaat ataatsimut isigalugit sunnerneqartaratik.
- Pisuni amerlanerpaani angajoqqaat sulinngiffeqartarnerannik sivitsuineq ullumikkut isumaqassaaq, anaanaasut sulinertik piffissami sivisunerusumi unitsikkallartariaqartassagaat. Naligiissitaanermik nikisitsissagutta, ataataasut ilannguttariaqarpagut.
- Nunani eqqarlerisatsinni erninermi sulinngiffeqartarnerup ilaanik ataataasunut sivisunerusumik immikkoortinneqartarnerat takusalerparput. Aamma takusinnaavarput iluatsittoq. Iluarsiissut nunatsinnut iluaqutaasinnaammat immaqa piffissanngorpoq isumaliuutigissallugu?
Inatsisartut ullumi ataatsimiippata siunnersuut suliarineqassaaq.
Naalakkersuisut siunnersuutip akuerineqarnissaanut innersuussipput. Siunnersuullu akuerineqarpat inatsisissaq nutaaq suliarineqassaaq, Inatsisartunullu saqqummiuteqqinneqarluni.
