Angalanermik nittarsaassinermi suliffeqarfiit 39-t peqataasut

Savalimmiuni Thorshavnimi Nunani Avannarlerni angalanermik nittarsaassinerit annersaat, Vestnorden, ulluni makkunani  ingerlanneqarpoq. Kalaallillu Nunaat takornariaqarnikkut suliffeqarfinnik 39-t tungaannut amerlassuseqartunik aallartitaqarpoq, taakkulu suleqateqarnerminnik nukittorsaanissaq Kalaallillu Nunaanni aammalu nunani tamalaani suleqatiminnik attaveqarnermik ineriartortinnissaq siunertaralugu peqataapput. Visit Greenland tusagassiutinut nalunaarummi allappoq.

Nuna tamakkerlugu takornariaqarnermik siuarsaavik nittarsaassinermi soorunami aamma peqataavoq, ataasinngormallu unnukkut Visit Greenlandip  kalaallit takornariaqarnermik suliaqartut pillugit "kalaalerpalaartumik" atserlugu aaqqissuussivoq.

Naalakkersuisoq Naaja H. Nathanielsen (IA) takornariaqarnermut inatsit, oqallisaaqisoq isornartorsiorneqangaartorlu, saqqummiuppaa. Taassuma saniatigut Air Greenland, Icelandair kiisalu Greenland Airports timmisartuussinissaminnut angallannerullu ineriartortitsinissaanut pilersaarutitik pillugit kiisalu mittarfissuit nutaat ammarneqarnerisa kingorna, siunissami angalariaatsit qanoq sunnerneqarnissaat pillugit naatsorsuuteqarnerminnik saqqummiipput.

Takornariaqarnermut nersornaat Disko Adventuresimut

Takornariaqarnermut nersornaat Greenland Tourism Award 2024 aaqqissuussami aamma tunniunneqarpoq.

Akisussaassuseqarluni takornariartitsisarnerup iluani immikkut iliuuseqarsimasumut nersornaasiuttagaavoq, ukioq mannalu nersornaat Disko Adventuresimut tunniunneqarpoq.

Disko Adventures Danny Mølgaardimit, Naja Bjerregaardimit Steve Brobergimillu pigineqarpoq. Sanaluttartumit Kim Kleist-Eriksenimit sanaaq aamma Air Greenlandimut angalanissamut 10.000 koruuninik nalilik nersornaammut akissarsiassatut ilaapput.

Disko Adventures pinngortitami misigisassarsiornerit kulturikkullu ilisimasanik takornarianut neqeroorutit immikkut sammisarpaat, Kalaallit Nunaata kulturianik pinngortitaanillu nuannersunik saqqummiussineq pingaartillugu, Air Greenland nersornaammut tunngavilersuummi ilaatigut allappoq.

Kalaallit Nunaannut kingorna angalaneq

Visit Greenland aamma Air Greenland suleqatigiillutik nersornaasiuttakkamik tunniussisartuupput.

Vestnorden pingasunngornermi naammassineqassaaq, tamatumalu kingorna Visit Greenland aamma Air Greenland angalatitsivinnut, angalatitsinermik ingerlatsisunut tusagassiortunullu toqqakkanut Visit Greenland Air Greenlandilu Kalaallit Nunaannut angallassissaaq.

- Kalaallit Nunaanni ornitassanut najukkamilu takornarialerisut eqqarsaatigalugit, tikeqqaarnermi misigisassat siulliit peqataasunut misigitinneqarnissaat angallassinermi siunertaavoq, taamaalillutik misigisassat peqataasunit paasineqarluarneruniassammata pisisartuminnullu nittarsaassilluarnerussallutik, Visit Greenland allappoq.