Angalatooq Qaanaamut qaannamik aputtoq: – Killitsinnartumik tikilluaqqusipput
Angalatooq Mike Keen 850 kilometerit missaat qaannamik ingerlaarfigereerlugit Qaanaamut apuuppoq.
Mike Keen Upernavimmi umiarsualivimmi Qaanaamut angalanissamut piareersarpoq. Tallimanngornermi juulip 26-ani aallarpoq Qaanaamullu sapaatip akunnerani matumani tikilluni.
Assiliisoq: Najannguaq Mathæussen
Iluatsippoq.
Mike Keen qaannamik Upernavimmiit juulip 26-ani aallartoq Qaanaamut apuuppoq.
Illoqarfimmiorpassuit tikilluaqqusiniarlutik najuuttut qummoroortarlutillu angalatuup Facebookimi quppernerani immiussani arlalinni takuneqarsinnaavoq.
- Qaanaamut apuukkama oqiliallappunga, Qaanaamilu tikilluaqqusinerup nuannissusaanik suli killitseqqallunga.
- Tikilluaqqusineq killitsinnaqaaq. Illoqarfimmit kilometerialunnik ungasitsigisumi umiatsiat parsiarpaannga, sissamullu pigatta inuit 200-300-t missaanniittut aggiasimapput, Mike Keen Sermitsiamut oqaluttuarpoq.
Igasoq angalatooq
Mike Keen tuluuvoq igasoq, angalatooq qajartortartorlu. Upernavimmiit Qaanaamut angalanera sivisooq 2023-miilli angalalerneranit sakkortunerpaaq naammassivaa.
Qaqortumiit Upernavimmut qaannamik angalavoq. Pilersaarutaagaluarpoq Qaanaamut apuutissasoq, sikoqarpallaarnerali pissutigalugu Upernavimmut siorna juulip qiteqqunnerani killiinnarpoq.
Angalanini naammassiniarlugu Upernavimmit ukioq manna juulip 26-ani aallarpoq, tallimanngormallu iluatsilluartumik apuulluni.
Akunnerit arfineq-pingasut qulingilualluunniit akornanni ingerlaartoq
Ulluni arlalinni silarlussioreerluni Qaanaaq tallimanngormat nuisimallugu Mike Keen oqaluttuarpoq.
- Anori sakkukillimmat Qaanaaq 52 kilometerisut ungasitsigisumiittoq erserpoq.
- Taava nalunaaquttap-akunneri arfineq-pingasut qulingilualluunniit ingerlaarniarlunga aalajangerpunga, taamaaliorlunga.
Allakkat Qaqortumiit Qaanaami innuttaasunut allagarsiassat taamaalilluni tunniussinnaalerpai.
Mike Keenip Facebookimi quppernerani illoqarfimmut avannarpasinnerpaamut tikinneranit immiussarpassuit takuneqarsinnaapput.
Orpippassuaqarfiit tulliuttut
Mike Keen maanna arlaleriarluni Kalaallit Nunaannut tikeraarsimavoq, tassanilu ilisimatusarlunilu inuussutissanik nunatsinneersunit nerisaqarluni.
Tikeraarnermini ilaanni kalaaliminernik nerisaqarnermini 14 kilonik oqilivoq.
- Tupinnaannarpoq, aagalu tamakkiisumik pitsanngorluinnangajappoq, oqaluttuarpoq.
Mike Keenip suliniutaa tulliuttoq Ecuadorimi orpippassuarni pissaaq. Upernaaru qaammatini marlunni nunap inoqqaavini najugaqarumaarpoq, nerisaqartarnerannik ilisimasaqalerumalluni timiminullu qanoq sunniuteqartarneranik paasisaqarumalluni.
