Angallannermut Aqutsisoqarfiup timmisartortitseqatigiiffiit allat Nuummukarsinnaanerat akuerai

Nuummi mittarfik nutaaq 2024-mi novembarip 28-ani atulermat, mittarfimmi inaarutaasumik aaqqiissutissat suli inissinneqanngimmata akuersissut piumasaqaatitalik tunniunneqarpoq.

Piumasaqaat immikkut ittoq eqqartorneqarnerpaaq tassaavoq Air Greenlandip Icelandairillu timmisartuutileqatigiiffittut kisiartaallutik Nuummut missinnaanerat. Timmisartulli allat immikkut akuerineqarlutik missinnaallutik.

Angallannermut Aqutsisoqarfik killilersuineq tamanna atorunnaarsinnaasoq maanna aalajangerpoq, taakku Sermitsiamit saaffigineqarneramik uppernarsarpaat:

– Piumasaqaatinut 2024-mi novembarip 28-anniilli atuuttunut atatillugu ilisimatitsissutigisinnaavarput Greenland Airportsip pisariaqartut iliuuseqarfigisimammagit Nuup mittarfiani killilersuinerit ilaat maanna atorunnaarsinneqarsimasut.

– Timmisartortitseqatigiiffiit sorliit mittarfimmik atuisinnaanerannik killilersuinerit atorunnaarsippavut, Nuulli Mittarfia qulaallugu angallanneq mittarfiup atorneqarsinnaaneranut sunniuteqartoq suli killilersorneqarluni.

Taamaalilluni malittarisassat taakku timmisartortitseqatigiiffinnut marlunnut nutaanut pilersaarutit malillugit Nuummut 2025-mi aasakkut timmisartuussisussanut aporfiujunnaarput: SAS Københavnimeersoq aamma United Airlines New Yorkimeersoq.

USA-mulli aqqutit nutaat amerikamiut oqartussaasuinit aamma erseqqissarneqaqqaassapput.