Angut 23-nik ukiulik aningaasanik peqquserlussimasutut hashimillu anngiortumik eqqussuisimasutut eqqartuunneqarpoq
Angut 23-inik ukiulik aningaasanik 1,8 millionit koruunit sinnerlugit peqquserlussimasutut hashimillu 4 kg-lunik anngiortumik eqqussuisimasutut ataasinngornermi ullaakkut eqqartuunneqarpoq. Taanna ukiuni marlunni qaammatinilu qulingiluani pinerluuteqarsimasunut inissiisarfimmiittussanngorlugu eqqartuunneqarpoq. Eqqartuunneqartup suliaq Nunatta Eqqartuussivianut ingerlateqqitassanngortippaa.
Leiff Josefsen
Kalaallit Nunaanni Politiit peqquserlulluni aningaasarsiortoqarsimaneranik hashimillu 4 kg-lumik anngiortumik eqqussuisoqarsimaneranik piffissami pivisuumi misissuisimapput.
Angut 23-inik ataasinngornermi juulip aallaqqaataani eqqartuunneqarluni pisuutinneqarpoq. Ukiuni marlunni qaammatinilu qulingiluani pinerluuteqarsimasunut inissiisarfimmiittussanngortinneqarpoq, suliallu ingerlanneqarneranut aningaasartuutit akilertussanngorlugit.
Suliaq pisariusoq
Suliap misissuiffigineqarnera pisariusimasoq Kalaallit Nunaanni Politiit paasissutissiipput. Tassani 23-inik ukioqartup aningaasat peqquserlunnermi aningaasarsiarineqartut toqqoqqalluarniarlugit iliuuseqarsimammat.
- Suliaq imaannaanngilaq, pinerlunnermit iluanaarutit isertorniarlugit nunat tamalaat akornanni aningaasanik nuussisartut aqqutigalugit aningaasanik nuussisoqartuaannarmat. Ilaatigut akiligassat eqqunngitsuusut, aningaasanik kingorna akilerneqartarsimapput, aningaasat Danmarkimi ininnut nunanullu allanut nuunneqarnissaat siunertarineqartarluni, Politikommissæri Malik Sandgreen, misissuisartut immikkoortortaqarfianni pisortaq oqarpoq.
Aningaasat nuummi akilerneqartarsimasut pillugit politiit misissuisimapput, angullu 23-inik ukiulik februaarip ulluisa arfineq-pingajuanni tigusarineqarpoq, suliallu misissuiffigineqarnerani tigummineqarluni.
- Misissuinermi paasineqarpoq 4 kg-mit ikinnerunngitsumik umiarsuarni containerit atorlugit anngiortumik eqqunneqarsimasut, taassuma 23-inik ukiullip tigusimallugit nassuerutigisaanik, pinerloqatiminullu kinaassusersineqanngitsunut ingerlateqqissimallugit, politikommissær Malik Sandgreen oqarpoq.
Eqqartuussiviup unnerluussisussaatitaasup piumasaa akueraa, eqqartuussutillu ilaatut aningaasat 16.500 koruunit atortullu elektroniskiusut assigiinngitsut arsaarinnissutigineqarput.
Politiit unnerluussisussaatitaasullu eqqartuussinerup inernera iluarisimaarpaat, eqqartuussiviup unnerluutigineqartoq taamaaliorsimasutut pisuutimmassuk.
Pineqaatissinneqartup suliaq ingerlateqqitassanngorpaa.
