Angut 27-nik ukiulik toqutsisimasutut eqqartuunneqartoq – ukiuni arfineq-marlunni qaammatinilu arfinilinni pineqaatissinneqarpoq
Kujallermi Eqqartuussiviup angut 27-nik ukiulik siorna Nanortalimmi arnamik 65-inik ukiulimmik toqutsisimasutut, angerlarsimaffimmi eqqissiunnaarsitsisimasutut, kannguttaatsuliorsimasutut aserorterisimasutullu meeqqamillu 15-it inorlugit ukiulimmik kinguaassiuutitigut atoqateqarsimasutut sisamanngornermi pisuutinneqartoq eqqartuuppaa.
Kujalleq Kredsret tallimanngornermi 27-nik ukiulimmik ukiup kingullermi toqutsinermut pineqartumi eqqartuussivoq.
Assi: Bruno Josefsen
Angut 27-nik ukiulik siorna februaarimi arnamik 65-inik ukiulimmik toqutsisimasutut Kujallermi Eqqartuussivimmit ukiuni arfineq-marlunni qaammatinilu arfinilinni pineqaatissinneqarsimasunut inissiisarfimmiittussanngortinneqarpoq.
Sapaammi 18. februar 2024 ullaap tungaani Nanortalimmi politiit nalunaarfigineqarput arnaq 65-inik ukiulik toqungasoq silami nassaarineqarsimasoq. Toqungasoq niaqumigut timimigullu arlalitsigut ajoqusersimavoq. Taamaattumik politiit arnaq toqutaasimassasoq ilimagaat.
Ulloq taanna angut maanna 27-nik ukiulik politiinit tigusarineqarpoq toqutsisimasutullu unnerluutigineqarluni.
Kujallermi Eqqartuussiviup suliaq ulluni kingullerni suliarisimavaa, sisamanngornermilu angut toqutsisimasutut, angerlarsimaffimmi eqqissiviilliortitsisimasutut, kannguttaatsuliorsimasutut, aserorterisimasutut meeqqamillu 15-it inorlugit ukiulimmik kinguaassiuutitigut atoqateqarsimasutut eqqartuunneqarpoq.
Pisoq sakkortulluinnartoq
- Toqutsinermut tunngatillugu eqqartuussiviup unnerluutigineqartoq arnamik 65-inik ukiulimmik nakuusersimasutut pisuusutut eqqartuunneqarpoq – aamma toqunerata kingorna. Unnerluutigineqartoq imigassartorsimavoq, toqutaasullu 65-inik ukiullip 27-nillu ukiullip siornatigut imminnut attaveqarsimanerannik takussutissaqanngilaq, unnerluussisussaatitaasoq Cecilie Stürup Sørensen oqarpoq nangillunilu:
- Nalaatsornerinnakkut arnaq pinerluffigitissimasinnaasoq takussutissaqarpoq. Taamaattumik naammagisimaarpara eqqartuussiviup 27-nik ukiulik pisuutimmagu, unnerluussisullu piumasaatut ukiuni arfineq-marlunni qaammatinilu arfinilinni pineqaatissinneqarsimasunut inissiisarfimmiittussanngortillugu, toqukkut annaasaqarsimasut Nanortalimmiullu suliaq naammassisinnaaqqullugu.
Angut 27-nik ukiulik aamma toqusup qitornaasa inersimasut taarsiiffiginissaanut, meeqqamillu kannguttaatsuliorfigisimasaminut taarsiinissaminut pineqaatissinneqarpoq.
