Angut aallaasersortoq tigusarineqartoq
Angut 44-nik ukiulik Nuummi unnuaq aallaasersorsimasoq politiinit tigusarineqarpoq. Angut toqutseriarsimasutut unnerluutigineqarpoq.
Angut toqutseriarsimasutut unnerluutigineqarluni tigusarineqarpoq.
Foto: Oscar Scott Carl
Kalaallit Nunaanni Politiit pingasunngornerup unnuaani aallaasersortoqartoq nalunaarfigineqarput. Nalunaarut nal. 02.19 tiguneqarpoq.
Aallaasersortoqarnerani angut 49-nik ukiulik ajoquserpoq, Kalaallit Nunaanni Politiit ilisimatitsipput.
- Angut 44-nik ukiulik tigusarineqarnikuuvoq. Toqutseriarsimasutut unnerluutigineqarpoq, ullumilu pingasunngornermi oktobarip arfineq-pingajuanni eqqartuussivimmi sassartinneqassalluni, politiit tusagassiorfinnut nalunaaruteqarlutik allapput.
Kalaallit Nunaanni Politiit pisoq pillugu annerusumik oqaaseqarsinnaanngikkallarput suliamut tunngatillugu paasiniaasoqarnera pissutigalugu.
