Angut innaarsummit nakkarluni toqusoq

Angut utoqqaliarsaartoq sapaatip-akunnerata naanerani mannissartilluni innaarsummit nakkarami toquvoq.

Politi

Angut utoqqaliarsaartoq sapaatip-akunnerata naanerani mannissarniarluni qaqqamut angalanera alianartumik kinguneqarpoq. KNR taama allaaserisaqarpoq.

Ittoqqortoormiinit 20 kilometerisut ungasitsigisumiittumi angut innaarsummit nakkarpoq, tassanilu toquvoq. Angut taanna arlalinnik angalaqateqartilluni ajunaarpoq.

Ikiuigasuarnissamik pisariaqartitsisut tamaasa peqqinnissaqarfimmi oqartussaasut kommunillu ajunaarnermut atatillugu ikiorumaaraat, politiit ilisimatitsipput.

Tallimanngornerup unnuaani nalunaaqutaq 00.23 ajunaarnermik politiit nalunaarfigineqartut, politiit pigaartuisa pisortaat Anette Ostenfeldt Sermitsiamut oqarpoq.

- Timmissat manniinik mannissartoqarsimavoq, tassanilu angut utoqqaliarsaartoq innaarsummit nakkarsimavoq toqullunilu.

- Pisimasoq alianartoq tamanna najukkami innuttaasunut sunniuteqangaarpoq. Ajunaarneq inuppassuarnit takuneqarpoq, nakkartorlu inuppassuit ilisarisimavaat, Anette Ostenfeldt oqarpoq.

Pisimasoq ajutoornertut alianartutut politiit isigigaat oqarpoq.

Powered by Labrador CMS