Angut innarliisimagaluarluni taxaannarsinnaatitaavoq
Angut taxartartoq marloriarluni kannguttaatsuliorsimasutut eqqartuunneqarpoq, kisianni taxartitsisuuginnarsinnaavoq.
Leiff Josefsen
Sapaatip-akunnerata siuliani Kalaallit Nunaata Eqqartuussiviani angut 60-it sinnerlugit ukiulik eqqartuunneqarmat aalajangiisoqarpoq.
Suliaq Nunatta Eqqartuussivianut unnerluussisussaatitaasut suliareqqitassanngortissimavaat.
Niviarsiaqqamut 15-inik ukiulimmut, arnamullu inersimasumut angut pineqartoq kannguttaatsuliorsimasutut Qaasuitsup Eqqartuussiviani pisuutinneqarpoq.
Niviarsiaqqap 15-inik ukiullip atisaata qaavatigut siffiaatigut angut ilaatigut attuualaarinnissimasutut, assaanillu kunissisimasutut pisuutinneqarpoq.
Angut taxanik ingerlatitsisinnaajunnaartikkumallugu suliaq Nunatta Eqqartuussivianut unnerluussisussaatitaasut ingerlateqqissimavaat, kannguttaatsuliornerillu taxanik ingerlatitsinermi pimmata.
Atorfimmik atornerluisinnaava?
Unnerluussisussaatitaasoq Cecilie Stürup Sørensen taamatut Sermitsiamut paasissutissiivoq.
- Atorfini atornerlullugu allanik kannguttaatsuliorfiginnissinnaasoq isumaqarpugut, taamaattumik suliaq suliareqqitassanngortipparput, unnerluussisoq oqarpoq.
Eqqartuussisulli amerlanerussuteqartut marluk isumaqarput angut taxanik ingerlatsisinnaatitaanerminik arsaarneqarnissaanut suliaq sakkukippallaartoq, taamaattumillu taamatut eqqartuussipput.
Ulluni 40-ni angut pineqaatissinneqarsimasunut inissiisarfimmiittussanngortinneqarluni, eqqugaasunullu marlunnut tamanut taarsiisussanngortinneqarluni eqqartuussaavoq.
