Angut kisimiilluni biilertoq imigassartorsimatilluni biilertutut unnerluutigineqarpoq
Pingasunngormat angut Nuup ilaani Nuussuarmi biilerluni ajutoorpoq.
Politiit pingasunngornermi nalunaaqutaq ataatsip missaani ajutoortoqarneranik nalunaarfigineqarput
Assi: Leiff Josefsen
Pingasunngornermi ullup-qeqqata kingorna nal. 13.10 Nuummi Nuussuup atuarfiata eqqaani aqqusinermi ajutoortoqarneranik Kalaallit Nunaanni Politiit nalunaarfigineqarput.
Ajutoornerup saniatigut aamma biilertup imigassartorsimanissaa pasitsaanneqarsimasoq, pigaartut pisortaat Jeppe Andsager Sermitsiamut oqarpoq.
Ajutoortoq kisimiippoq ajoqusertoqanngilarlu, imigassartorsimanersorli misissorneqarmat paasineqarpoq imigassartorsimatilluni biilersimasoq.
Tamatuma saniatigut biilertoq 49-nik ukiulik biilersinnaanermut allagartaqanngilaq.
- Imigassartorsimatilluni biilersimasutut biilersinnaanermullu allagartaqarnani biilersimasutut unnerluutigineqarpoq, Jeppe Andsager oqaluttuarpoq.
