Angut nakuusersimasutut savilersorsimasutullu katsorsarneqarnissamik pineqaatissinneqartoq
Angut arlaleriarluni nakuusersimasutut politiinullu savimmik miloriussisimasutut eqqartuunneqarpoq. Tarnimikkut nappaatillit napparsimmaviani angut katsorsarneqassaaq.
Leiff Josefsen
Suliaq ilaatigut ukiut arfinillit sinnerlugit matuma siorna ujajaanermik unnerluutiginninnermik imaqartoq, sapaatip-akunnerani matumani Sermersuup Eqqartuussiviani suliarineqarpoq.
Angut 20-t sinnerlugit ukiulik ujajaasimasutut, kannguttaatsuliorsimasutut savimmillu miloriussisimasutut unnerluutigineqarpoq.
2017-imi oktobarip unnuaani Nuummi Atuarfiup Nuussuarmiittup eqqaani ujajaaqataasimallunilu saassussisimasutut, angut ilaatigut unnerluutigineqarpoq.
Unnerluutiginnissut naapertorlugu angut 21-nik ukiulik taanna pinerluttunik arlalinnik kikkuussuserneqanngitsunik peqateqarluni pinerluffigineqartoq mobilianik arsaarsimavaa.
Pinerluffigineqartoq atisaqarpiarnani assilineqarsimasoq
Pinerluffigineqartoq uppitinneqarluni timimigut niaqqumigullu tilluarneqarlunilu tukertarneqarpoq. Pineqartoq aamma atisaajartinneqarpoq, atisaqarpianngitsorlu unnerluussaasunit arlalinnit assilineqarluni - sapaatip-akunnerani matumani eqqartuussinermi ilaatigut unnerluutigineqartumittaaq.
Pinerluffigineqartup atisaqarpianngitsup assilineqarnera aamma kannguttaatsuliorfiginninnermut tunngasumik unnerluussissutigineqarpoq. Unnerluutigineqartoq nammineq pinerlineqartumut assiliinngilaq, najuupporli saassussinermut peqataalluni, taamaattumillu kannguttaatsuliortutut eqqartuunneqarpoq.
Tamatuma saniatigut angut arnamut kimigiisersimasutut, sioorasaarisimasutut kiisalu aneerasaartarfimmit politiinut savimmik miloriussisimasutut unnerluutigineqarpoq. Pisoq 2022-mi juunimi pivoq.
Unnerluussut naapertorlugu angut pisuutinneqartoq, eqqartuussiviullu angut immikkut pineqaatissikkaa, Kalaallit Nunaanni Politiini unnerluussisussaatitaasup Morten Hvergelip Sermitsiamut oqaatigaa.
Katsorsarneqassasoq
Tarnikkut nappaatilinnut napparsimmavimmi angut katsorsarneqartussanngortinneqarpoq, tarnikkut qanoq innera apeqqutaalluni napparsimmavimmit angerlartitaasinnaalluni unitsinneqaqqissinnaallunilu.
Eqqartuussineq sivisunerpaaffissaligaanngilaq, angutillu eqqartuunneqarnini akueraa.
- Pisuusutut eqqartuussaanera suliallu maannamut unitsikkallarneqarnera naammagisimaarpara, Morten Hvergel oqarpoq.
Unnerluussisussaatitaasup eqqartuussut suliareqqitassanngortissanerlugu eqqarsaatigeqqaartariaqaraa ilisimatitsissutigaattaaq, eqqartuussummi oqaaserineqartut unnerluussisussaatitaasup oqaaserisaanit allaanerummata.
