Angut pisiniarfimmi aserorterillunilu nakuusertoq

Politiit ulluni kingullerni marlunni arlaleriarlutik assigiinngitsunut ornigussimasut politiit pigaartuisa pisortaat Aputsiaq Hansen Sermitsiamut oqarpoq.

Pisoq siulleq arfininngornermi ulloqeqqariartortoq nal. 11.12 Ilulissani pisoq pigaartut pisortaata eqqaavaa. Imigassartorsimalluni biilertoqarnera ilimagineqartoq nalunaarfigineqaramik biilit pineqartut unitsinniarlugit politiit ornigupput.

Angut biilertoq aalakoorluni biilertutut pasineqarpoq, aaversinniarlugulu tigusarineqarpoq. Angut aamma biilersinnaatitaanani biilersimasutut unnerluutigineqartoq pigaartut pisortaat oqarpoq.

Niuertarfimmi aserorterineq nakuusernerlu

Angut Nuummi pisiniarfimmi aserorterisoq politiit arfininngornermi ualikkut nal. 13.18 aamma nalunaarfigineqarput.

Politiit ornigukkamik angut taanna sulisunut aamma nakuusersimasoq paasivaat. Politiit angut nassaaraat, taannalu aamma politiinut nakuuseriaraluarpoq.

Angut tigusarineqarpoq arlalinnillu unnerluutigineqarluni.

Nannuttoqarsimasoq Ilulissat eqqaanni nunaqarfimmit Oqaatsuniit politiit nalunaaqutaq 15.37 nalunaarfigineqarput. Politiit aalisarnermut piniarnermullu naalakkersuisoqarfik attaveqarfigaat taakkulu suliaq misissuiffigissavaat.

Nammattagaq kuupeermik imalik

Nuummi Nuussuarmi pisoq alla pillugu politiit sapaatip unnuaani nalunaaqutaq 02.35 nalunaarfigineqarput. Niuertarfimmut aserorterisoqartumik takunnittoq naluanarutiginnippoq.

Politiit ornigupput inuilli qimaareersimapput. Takunnittup inuit nammattagallit takusimavaat, sumiiffiullu ungasinngisaani nammattagaq kuupeernik marlunnik imalik nassaaraat.

Politiit videokkut nakkutilliinermut atortut ilaatigut iluaqutigalugit suliaq suli misissuiffigaat.

Nalunaaqutaq 03.50 inuk alla aalakoorluni biilertoq tigusarineqarpoq – tamatumuuna Sisimiuni.

Suliat imigassartorsimanermik aallaaveqartut ulapputigineqartut

Politiit eqqaaneqareersut saniatigut aamma allanik ulapputeqarsimasut pigaartut pisortaat oqarpoq:

Pisut tallimat inuit aalakoortut imminnut isumagisinnaajunnaarsimasut. Taakkua ilaat pingasut silattorserlugit isertitsivimmut innartinneqarput.

Aqqusinermi eqqissiviilliornerit arfineq-marluk, imigassartortoqarneranut attuumassutillit. Suliami ataatsimi inuk ataaseq isertitsivimmut parnaarunneqartariaqarsimavoq.

Angerlarsimaffimmi eqqissiviilliornerit pillugit nalunaarutit 14-it - meerartallit marluk. Inuit marluk tigusaapput isertitsivimmilu silattorserneqarlutik.

Inuit arfinillit tikilluaqquneqaratik sumiiffimmiittut nalunaarfigineqarsimapput, tassa inuit aalakoortut sumiiffimmiit ingerlarusunngitsut.