Angut qitornassaminik atornerluisutut ukiuni arfineq-pingasuni pineqaatissinneqartoq

Angut 46-nik ukiulik qitornassaminik kinguaassiuutitigut atornerluisimasutut ukiuni arfineq-pingasuni pineqaatissinneqarsimasunut inissiisarfimmiittussassanngortinneqarpoq.

Upernaviup eqqaani nunaqarfimmi 2014-imiit 2023-mut kinguaassiuutitigut atornerluinerit pisarsimapput, tallimanngormallu Ilulissani Eqqartuussisoqarfik Qaasuitsumi pineqaatissiisoqarpoq. Kalaallit Nunaanni Politiit tusagassiutinut taama nalunaaruteqarput.

Angut taanna pinerluffigineqartup ilisimannittutut immiullugu apersorneqarnera tunngavigalugu 2024-mi maajimi tigusarineqarpoq. Suliaq peqqarniitsuliortoqarneranut politiinit isigineqarpoq.

- Meeqqanut kinguaassiutitigut atornerluinerit peqqarniitsuupput, meeraanermimi atornerlugaaneq pinerliffigineqartup inersimasutut inuuneranut sunniuteqartarput.

- Kinguaassiutitigullu atornerluinerit suliami matumanitut annertutigisut ukiunilu arlalinni pisimasut qujanartumik akuttupput, atornerluisoqarneranut immikkoortortami unnerluussisussaatitaasoq, Alexander Stürup oqarpoq.

200.000 kr.-inik taarsiisussanngortinneqartoq

Pisup peqqarniitsuunera pissutigalugu unnerluussisussaatitaasup ukiuni arfineq-pingasuni pineqaatissinneqarsimasunut inissiisarfimmiittussassanngortitsisoqarnissaa piumasarigaa politiit paasissutissiipput.

Unnerluussisup eqqartuussut naammagisimaarpaa:

- Nunatta Eqqartuussisuuneqarfiata meeqqanut atornerluinerit pillugit suliat toqutsisoqarnerani suliani pineqaatissiissutip annertussusaanik killilerneqassanngitsut 2021-mi aalajangerpaa. Taamaattumik unnerluussisussaatitaasut suliani peqqarniitsuni pineqaatissiisarnermut killiliussaq, pinerluttunik inatsimmi annertussusiliunneqarsimasoq, ukiut qulit atorneqartassasoq isumaqarput.

- Taamaammat eqqartuussiviup suliami matumani ukiunik arfineq-pingasunik naliliinera naammagisimaarpara, tamanna suliani assingusuni takusimasatsinnit qaffasinnerusumiippoq.

Unnerluutigineqartup eqqartuussivimmi pineqaatissinneqarnini aamma pinerlineqartumut 200.000 koruuninik taarsiisussanngortinneqarnini akuerai.