Angut toqutsisimasutut aappassaanik pineqaatissinneqartoq
Nunatta Eqqartuussisuuneqarfiata angut 36-nik ukiulik Qaqortumeersoq sakkortunerpaamik pineqaatissippaa.
Foto: Morten Okkels
Angut Qaqortumeersoq 2023-mi toqutsisimasutut pingasunngornermi pineqaatissinneqarpoq.
Angut aappassaanik toqutsisimasutut pineqaatissinneqarpoq. Pisuni taakkuani toqutaasut tamarmik ilaqutaasuupput.
36-nik ukiulimmut suliaq Nunatta Eqqartuussisuuneqarfiani naammassineqarpoq, killiligaanngitsumillu pineqaatissinneqarsimasunut inissiisarfimmiittussanngortinneqarotq Kalaallit Nunaanni Politiini unnerluussisussaatitaasoq inuit attaveqaqatigiittarfianni X-imi ilisimatitsivoq.
Angutip akkani 2012-imi unatarlugulu isimmittarlugulu toquppaa, februaarimilu 2023-mi illortaani toqullugu. Taannalu pisimasoq eqqartuussivimmi maanna pineqaatissiissutigineqarpoq. Illortaava isimmittarneqarlunilu siatsivimmik anaalerneqarnini toqqutigaa. 53-inik ukioqarpoq.
Pinerlunneq februaarip pingajuata sisamaatalu akornanni unnuakkut inissiarsuarni J.H. Lytzensvejimiittumi pivoq. Suliamullu atatillugu sukumiisumik misissueqqissaartoqartoq politiit siusinnerusukkut nalunaarutigaat.
Inuit 60-it missaanniittut apersorneqarput, toqutsisoqarsimatillugulu misissuisartut Danmarkimit tikisinneqarput.
Maanna eqqartuussaasoq arlaleriarluni killisiorneqarpoq, februaarip qulingiluaani tigusarinninnissamut naammattumik uppernarsaatissaqalertoq politiit naliliipput.
Kalaallit Nunaanni pinerluttulerinermi inatsimmi killiligaanngitsumik pineqaatissinneqarsimasunut inissiisarfimmiittussanngortitsineq sakkortunerpaavoq. Tassa killiligaanngitsumik paarineqassaaq, iperagaagallassappallu eqqartuussivikkoortumik aalajangerneqassalluni.
Pingasunngornermi eqqartuussinermi Kujallermi Eqqartuussiviup siorna aggustimi aalajangiinera attatiinnarneqarpoq.
/ritzau/
