Angutinut inuusuttunut pingasunut eqqartuussineq nanginneqarpoq: - Tassanngaannaq tilluppaanga

Angutit inuusuttut pingasut politiinit marlunnit nakkutigineqarlutik eqqartuussivimmi sassartinneqarput. Unnerluutigineqartoq siulleq qaqortumik qernertortalimmik naasortalinnik allaqartumik ilulleqarpoq. Unnerluutigineqartut aappaat qaqortunik timersuutinik atisaqartoq, pingajuat nukarlersaajusoq sukkulaataasamik nasartalimmik tujuuloqarpoq.

- Tassanngaannaq...

Takunnissimasut ilaat arnaq nakuusertoqarsimaneranik nassuiaasinneqarpoq, taanna oktobarimi siorna pisimasuuvoq, ikinngutaa nakuuserfigineqarmat.

- Tassanngaannaq pivoq, arnaq eqqartuussivimmi nassuiaagami oqarpoq. 

Taassuma ilanngullugu oqaatigaa kammalaatinilu paasisinnaasimanagu sooq angut nakuuserluni aallartinnersoq.

- Tassanngaannaavissuaq pivoq, taanna nassuiaavoq ilanngullugulu oqaatigalugu nammineq kammalaatinilu paasiuminaatsillugu sooq nakuusernersoq. 

- Kammalaatikka aperaakka sooq taamaaliornersoq, aamma taakku naluaat sooq qisersinersoq kammalaatigalu sooq tillunneraa. Taamaalioriasaarneq nalinginnaannginnami.

Arnaq Sisimiuni imerniartarfiup silataani nakuuserfigineqartoq junimi nassuiaasinneqarpoq. Tassuma oqaluttuaraa unnerluutigineqartoq takunikuunngisaannarsimallugu oqaloqatiginikuunngisaannarsimallugulu. Taamaammat tillunneqarnini assut tupaallaatigisimanerarlugu.

Quleriarlugu tillunneqartoq

Arnaq alla televideo aqqutigalugu nassuiaatinneqarami nassuiaavoq imerniartarfimmi quleriarlugu tilluarneqarsimalluni.

- Arnapalaajunerartippunga, qulillu missaanik tilluartillunga, arnaq eqqartuussivimmi nassuiaagami oqarpoq.

Taassuma nassuiaatigisinnaanngilaa sooq nakuuserfigineqarnerluni. Nakorsamut misissortinnermini ajoqusersimaneranik ersittoqanngilaq. Taamaattumik unnerluutigineqartoq nassuiaatigineqartunut apeqqusiivoq.

- Tilluarsimagaluarukku ajoqusersimassagaluarpoq, ersarissagaluarput, angut nassuiaavoq ajaannarsimanerarlugulu.

Eqqartuussinerup nanginneqarnerani arnat pingasut angutillu sisamat nassuiaasinneqarput. Eqqartuussineq sisamanngornermi ullaakkut nangeqqinneqassaaq.