Angutit pingasut tillinniarsimasutut toqutseriaraluarsimasutullu eqqartuunneqartut
Angutit pingasut Nuummi tillinniarsimasutut toqutseriarsimasutullu ukiuni arlalinni pineqaatissinneqarsimasunut inissiisarfimmiittussanngortinneqarput.
Assiliisoq: Leiff Josefsen
Angutit marluk 24-nik 21-nillu ukiullit tillinniarsimasutut aamma angut 22-nik ukiulik peqatigalugu angut 37-nik ukiulik isumaqatigeeriarlutik kattullugu savimmik kapisimanerannik sisamanngornermi pisuutinneqarput.
Kalaallit Nunaanni Politiit tusagassiuutinut nalunaaruteqarput.
Angutit taakku pingasut angut 41-nik ukiulik peqatigalugu Nuummi pisiniarfimmut ukioq manna marsip 18-iani pisiassanik tillinniarsimasut Politiit paasissutissiissutigaat.
Angutit taakku sisamat sulisunit unitsinniarneqaraluaramik immiaaqqanik sulisunut milloorsimapput qimaallutillu. Sulisut ilaat puiaasaaqqat seqummakuinik igalaaminernik eqqorneqarsimavoq.
Tamatuma kingorna angutit sisamat taakkua aalakkupput, tassanilu angut 37-nik ukiulik pingasuullutik oqqatilersimallugu. Aaqqiagiinnginneq nakuusernermik savimmillu kapisinermik kinguneqarpoq, angullu 37-nik ukiulik napparsimmaviliaanneqarluni.
Ukiut sisamat qaammatillu arfinillit pineqaatissinneqarsimasunut inissiisarfimmi
Angutit sisamat tamarmik tigusarineqarput, eqqartuussiviullu angutit pingasut tigummigallarneqartussanngorlugit angut 41-nik ukiulik iperarpaa. Angut iperagaasoq nakuusernermut savilersornermullu peqataasimanngitsoq paasineqarmat iperagaasoq politiit allapput.
Angutip 22-nik ukiullip savilersorluni kapisisimanera, angutillu marluk — angut 24-nik ukiulik angullu 21-nik ukiulik — nakuusernermut sakkortuumut peqataasimariarlutik tillinniarnerminni pissarsiatik nassarlugit angut saassunneqartoq ilisimajunnaaqqalluni aanaartoq qimaannarsimammassuk eqqartuussiviup isiginiaraa Politiit eqqartuussut pillugu ilisimatitsipput.
- Ikiueqqaartoqanngilaq ikiortissarsiorlunilu sianertoqarani. Angut 41-nik ukiulik tillinniarsimasutut eqqartuunneqarpoq, Kalaallit Nunaanni Politiit allapput.
Angut 22-nik ukiulik angummik 37-nik ukiulimmik kapisisoq ukiuni sisamani qaammatinilu arfinilinni pineqaatissinneqarsimasunut inissiisarfimmiittussanngorlugu eqqartuunneqarpoq, angullu 24-nik ukiulik aamma angut 21-nik ukiulik ukiuni sisamani pineqaatissinneqarsimasunut inissiisarfimmiittussanngorlugit eqqartuunneqarlutik.
Angutip 22-nik ukiullip angutillu 24-nik ukiullip eqqartuussut akueraat, angutilli 21-nik ukiullip Nunatta Eqqartuussisuuneqarfianut eqqartuussut suliareqqitassanngortippaa.
