AKILERAARTARNEQ PILLUGU AAQQISSUUSSEQQINNEQ PILLUGU OQALLINNEQ
Aningaasalersuineq akisussaassuseqanngitsutut isumakulunnartutullu oqaatigineqarpoq
Naalakkersuisut akileraarutitigut aaqqissuusseqqinnerat siullermeerneqarmat aningaasalersorneqarnera oqallisaangaatsiarpoq.
Aningaasaqarnermut akileraartarnermullu naalakkersuisup Erik Jensenip akileraarutinik aaqqissuusseqqinnerup aningaasalersorneqarnera sisamanngormat illersortariaqarsimavaa.
Assi: Leiff Josefsen
Akileraarutitigut aaqqissuusseqqinneq, pisortanut 360 millionit koruunit missaannik akeqartussaq, pillugu partiit naalakkersuisooqatigiit IA aamma Siumut isumaqatigiissuteqarput.
Aningaasat taakku inummut ilanngaammut sulinermullu ilanngaammut atorneqarumaarput, aaqqissuusseqqinnissarlu akuerineqarpat sulisartut amerlanerpaartaat akileraarnikinnerulissapput.
Aaqqissuusseqqinneq aningaasanut inatsisissatut siunnersuummi ilaavoq, aammali Inatsisartuni immikkut siunnersuutitut suliarineqarpoq, sisamanngormallu nalunaaquttap-akunnerini sisamani oqallisigineqarpoq.
Naalakkersuisoqatigiit Naalakkersuisullu ilanngaatit qaffanneqarnerannut akiligassarujussuaq ingammik qanoq akilerniarneraat illuatungiliuttut, aaqqissuusseqqinnermut peqataanngitsut, isornartorsiorpaat.
Akisussaassuseqanngitsoq isumakulunnartorlu
AAQQJSSUUSAP PINGAARNERSAI
Inummut ilanngaat ukiumut 12.000 koruuninik qaffanneqassaaq. Tamanna aningaasarsialinnut tamanut, ilanngaammik atuilluarnissamut naammattumik aningaasarsialinnut, agguarlugu ukiumut 5.160 koruuninik isertitaqarnerulersitsivoq.
Siunnersuutip kingunerisaanik akileraartartut 23.000-it missai suliffeqarnermut ilanngaatitigut aningaasarsiaqarnerulissapput. Akileraartartut 6.000-it sinnilaarlugit ullumimut sanilliullugu suliffeqarnermut ilanngaataat appassaaq. Tamanna 440.000 - 630.000 koruunit akornanni isertitalinnut pingaarnermik atuuppoq.
Kilde: Naalakkersuisoq Erik Jensen
Naalakkersuisut ilaatigut Nunatta Karsiata sinneqartoorutaanit ukiumut 116 millionit koruuninik pissarsiniarput. Taamatut periaaseqarneq Naleqqami oqaaseqartartumit Jens Napãtômit sakkortuumik isornartorsiorneqarpoq:
Takussutissaq una akileraarutinik aaqqissuusseqqinnermut nassuiaammit tigusaavoq, tassanilu aaqqissuusseqqinnermut aningaasat sumit pissarsiarineqarumaarnersut ersersinneqarpoq.
Najoqqutaq: Naalakkersuisut
- 116 millionit koruunit Nunatta Karsianit tiguneqartussaapput. Taama iliorneq kusanaappoq. Naalakkersuisoqatigiit nutaat ajorluinnartumik ajornakusuungaartumillu inissisimassapput. Tamanna eqqortuliornerunngilaq, Jens Napãtôk oqarpoq, aaqqissuusseqqinnerullu kommunit karsiinut kinguneri ernumanartutut taassuma oqaatigai.
Inatsisissatut siunnersuut naapertorlugu aaqqissuusseqqinneq kommuninut ukiumut 182 millionit koruunit missaannik akeqassaaq. Kommunit ataatsimut tapiissutaannik isumaqatiginninniarnermi aaqqissuusseqqinnermut taarsiissutissat eqqartorneqarnissaat Naalakkersuisut siunnersuutigaat.
Akiligassap ingerlateqqinneqarnissaa isumakuluutigigaa
Demokraatineersup Jens-Frederik Nielsenip sisamanngormat oqallinnermi aningaasalersuineq isornartorsiorneruaa, akisussaassuseqanngitsutullu taavaa.
Poortuutissanut akitsuut akerleriissutaasoq aamma siunissami Nunap Karsiata sinneqartoorutai aaqqissuusseqqinnermut aningaasalersuisuunissaat Demokraatit isumakuluutigaat. Taakku marluk ataatsimut katillugit 201 millionit koruuninik aaqqissuusseqqinnermut tapersiipput:
- Naalakkersuisut aningaasanik amerlanerusunik nassaarniarlutik tunniutiinnarput, taarsiullugulu sinneqartoorutit atorniarlugit aalajangerput neriuutigalugulu ukiuni aggersuni aamma atorsinnaasaminnik sinneqartooruteqangaarumaarlutik.
- Taamaaliorneq qularnartorujussuuvoq. Qitornatta ernuttattalu akiligassamik akiliinngitsoorsimasamik tunineqarnissaat ilimanartorujussuuvoq, Jens-Frederik Nielsen ilaatigut oqarpoq.
Naalakkersuisoq ilumuunnginneraavoq
Aningaasaqarnermut naalakkersuisup Erik Jensenip (S) sivisuumik oqallinnermi aaqqissuusseqqinneq minnerunngitsumillu aningaasalersuineq illersortariaqarpai.
Siunnersuutip piumasaqaatai tamarmik, aamma aningaasalersorneqarnera, naammassineqarsimasut, aamma Nunatta Karsiata sinneqartoorutai innuttaasunut iluaqutaasariaqartut, Erik Jensenip erseqqissarpaa:
- Aalisarneq isertitaqarfiulluarluni suliffissaaleqinerlu appasilluinnarluni aningaasaqarneq ingerlalluarpoq. Ukiuni kingullerni Nunap Karsiata naatsorsuutaani maluginiarnartumik sinneqartooruteqartoqarsimavoq.
- Aningaasat akileraarutitigut apparsaanikkut innuttaasunut iluaqutaanissaat maannakkut pissutsit atuuttut naapertorlugit pitsaanerussasoq Naalakkersuisut isumaqarput, nunatta karsianut sinneqartoorutaasutut toqqorneqarnatik, ilaatigut taama oqarpoq Erik Jensen.
Aaqqissuusseqqinneq innuttaasorpassuarnut, pingaartumik isertitakinnerusunut akileraarnikinnerulersussanut, iluaqutaassasoq, aammattaaq naalakkersuisup erseqqissaatigisaqattaarpaa.
Inatsisartut Aningaasaqarnermut Akileraartarnermullu Ataatsimiititaliaata siunnersuut maanna suliarissavaa.
