Aningaasanut inatsisissatut siunnersuut: Nunanut allanut tunngasunut naalakkersuisoqarfik pitsanngorsarneqassaaq
Canadami Ottawamut ilaatigullu Belgiami Natomut tunngatillugu aningaasatigut immikkut aningaasaliiffiginninnikkut nunanut allanut naalakkersuisoqarfimmik Naalakkersuisut nukittorsaaniarput, tamanna 2025-mut aningaasanut inatsisissatut siunnersuummi, Aningaasaqarnermut Akileraartarnermullu Naalakkersuisup Erik Jensenip pingasunngornermi saqqummiussaani, atuarneqarsinnaavoq.
Vivian Motzfeldt, nunanut allanut tunngasunut naalakkersuisoq, 2025-mut aningaasanut inatsisissatut siunnersuut naapertorlugu akisussaaffimmini aningaasanik amerlanerusunik tunineqassaaq.
Toqqorsivimmit assi: Leiff Josefsen
Ukiut sisamat ingerlanerini 18,4 millionit koruuninik annertussusilinnik, agguaqatigiissilluguluunniit ukiumut 4,6 millionit koruuninik qaffaanikkut nunanut allanut tunngasunik nukittorsaaneq ataatsimut isigalugu Naalakkersuisut pilersaarutigaat.
Naalakkersuisut Canadamut saniliminnut attaveqarnerup nukittorsarneqarnissaanik pilersaarutertik taamaatinngilaat, tamanna 2025-mut aningaasanut inatsisissatut siunnersuummi atuarneqarsinnaavoq. Ottawamili Canadamiittumi sinniisoqarfik nutaaq aatsaat 2028-mi inaarutaasumik inissinneqassaaq.
- Ottawami, Canada, sinniisoqarfissap nutaap pilersinnissaanut 2027-mit aningaasanik ujartuisoqarpoq, 2028-mullu 3,5 millionit koruunit qinnutigineqarlutik, aningaasanut inatsisissatut siunnersuutip tamatuma takutippaa.
Nunani allani sinniisoqarfinnut aningaasat amerlanerit
Maannakkut aappaagulu atuutilereersussamik Kalaallit Nunaata nunani allani sinniisoqarfii amerlasuut ukiumut 900.000 koruuninik aningaasaliiffigineqarnerunerisigut nukittorsarneqarniarput. Kalaallit Nunaata Bruxellesimi NATO-mi sulisuanut ukiumut aningaasaliissutit 200.000 koruuninik ilaneqartalernissaat tamatuma saniatigut kissaatigineqarpoq.
WTO-mi suliassaqarfimmut sulianik suliarinnittartumut nutaamut aamma niuernernut oqaloqatigiittarnerit nukittorsarneqassapput. Tamatumani Kalaallit Nunaata niuernikkut soqutigisaanik isumaginnissinnaasumik immikkut ittumik Naalakkersuisut atorfinitsitsinissartik pilersaarutigaat, tamannalu aappaagumut aningaasanut inatsimmi 1 millionit koruuninik immikkut ittumik aningaasartuuteqalersitsissaaq.
Kiisalu Issittumi Siunnersuisoqatigiit isumaginissaannut suliniuteqarnerunissamut ukiumut aningaasat 1,6 millionit koruunit immikkut qinnutigineqarput.
