Aningaasaqarnermut pisortaq qilernerusaqanngitsoq

Peter Beck ukiorpassuit kræfteqarluni napparsimareerluni sapaatiummat toquvoq.

Taanna 1988-mi Kalaallit Nunaata aqunneqanngitsumik atuivallaarnerup aalisarnermullu aningaasaliivallaarnerup kingunerisaanik akiitsoqangaarnerata nalaani tikikkami Namminersornerullutik Oqartussani aningaasaqarnermut pisortanngorpoq. Taarsigassarsingaatsiarnikkut, missingersuusiornermilu nutaanik malittarisaliorlunilu inatsiseqalersitsinikkut Nunatta tamatuma kingorna assingusumik ajornartuunnginnissaanik qulakkeerinninniarluni annertuumik suliniuteqarsimavoq. Nunatta aningaasaqarnikkut ineriartornera inuiaqatigiillu ineriartornerat ukiuni 30-ni sunniuteqaqataaffigisimavai.

Aningaasaqarneq pillugu qaffasissumik, tassa cand.polit.-imik, ilinniagaqarlunilu Gladsaxep Ringstedillu kommuuniini kiisalu kommuunit kattuffianni sulisarsimavoq.

Peter Beck ataqqineqarpoq. Nutaanik ingerlatsisussaqartillugu ima aperisoqartuarsimavoq: Peter Beck qanormita oqassava.

Taannattaaq ukiuni atorfeqarfimmini tamani suleqatitut nuannarineqarsimavoq.

Inuussutissarsiornermut, Aatsitassanut, Nukissiuuteqarnermut, Inatsisinik atortitsinermut Naligiissitaanermullu Naalakkersuisoqarfimmi suleqatigisimasaa Jørgen T. Hammeken-Holm oqarpoq:

”Peter suleqatit akornanni ”nalinginnaasuunngitsutut” isigineqarpoq. Nunamimi naalakkersuisoqarfiit pingaarnersaanni pisortatut atorfeqassagaanni immaqa aamma taamaattariaqarpoq. Ingammik pujortarunnaareernermi kingorna. Ileqqupalaaq unitsikkaluaraanniluunniit ileqqupalaaqartoqaannassasoq oqaatigineqartarpoq. Peter pujortarunnaarami tamorasaanik nikotinilinnik tamorasaartalerpoq. Tamorasaanngikkaangamiullu voksitut ilusilersortakkatut assaminik pinngaralugulu siaaqattaartarpaa. Ingammik ajornartorsiutinut assigiinngitsunut aaqqiissutissaasinnaasunik eqqarsaraangami. Eqqarsaatini annertusiartortillugit tamorasaaq pinnguarigaluttuinnartarpaa.

Oqaluttuaq alla nuannersoq tassaavoq unnuit ilaanni Peterp Nuummi umiarsualivimmut uternera. Tassani qaninnersiorniarluni ikkarlippoq. Tamatuma kingorna Peterp umiatsiaa illoqarfiup avatinnguani ikkarleqqasoq takuniarneqakulaarpoq.

Peter nallukattarumatuutut ilisimaneqarpoq. Ingammik nallukattariaaseq bridge eqqarsarnartippaa, aammali angerlarsimaffimmini whist nuannarilluartuuaa.

Peter inuk asannittuullunilu isumaginnittuugami imminut pinnani qanigisanili isumagikkajuppai. Assersuutigalugu 50-iliinerminut atatillugu ukiut pingasut nalliuttorsiortinniarneqarpoq. Taava allat piareersaasussanngorput, taannalu akiliivoq”, Jørgen T. Hammeken-Holm oqaluttuarpoq.

Suleqatigisimasaata allap Nikolai S. Christensenip, ullumikkut Aningaasaqarnermut Akileraartarnermullu Naalakkersuisoqarfimmi pisortaasup, Peter atortorissaarutinut digitaliusunut pikkorinnerpaarsuunngitsoq oqaluttuaraa.

”Qarasaasiatigut allatat, allattukkat assigisaalluunniit atuassagaangamigit pappilianngorteqqaartarpai, taava kipungasumik allattariaasini atuaruminarnerpaarsuunngitsoq atorlugu ilanngussaqartarlunilu kukkunersiuinermi ilisarnaatit atorlugit allattuisarpoq. Allaffimmiut inuusuttut arlallit, kipungasumik allariaatsimik kukkunersiuinermiluunniit ilisarnaatinik ilinniartinneqarsimanngitsut, paatsiveerutsittarsimaqai. Ilikkartarpulli, tassami Peter taama suleriuseqarpoq. 

Makiaallusuunngilaq. Ullaaralaamiit sulinissaq pisariaqaranilu naleqquttuunngitsoq Peter isumaqarpoq. Illuatungianik unnukkut angerlarniarluni tuaviorneq ajorpoq, suliassanilu pingaaruteqarpata unnuarsuarmut sulisinnaasarpoq. 

Qilernerusaq atorfilinnut arlalinnut pingaaruteqarpoq. Peter taama isumaqartuaannanngilaq. Taassuma illersornissaqarfimmiikkallarami qilernerusaqartarsimalluni, atoqqikkumanagulu ilaanni nassuiaappaanga. Aatsaat pisortatigoorluinnartunik pisoqartillugu minnerunngitsumillu aningaasaqarnermik suliaqartunik ataatsimeeqateqassagaangami qilernerusaqartarpoq. Qilernerusanili ataatsimiinneq naammassiniariartoq peertarpaa”, taanna oqaluttuarpoq.

Frankrig, 1971-imi ilinniarnermi nalaani tikissimasaa, nuannarisarivissugaasa ilagaat. Inuunermi sinnera soqutigisaraa.

Peter Beck Danmarkimi kisitsisilerinermi ilinniarnertuunngoreerluni ilinniarnertuunngorniaqqissimasoq Nikolai S. Christensen oqaluttuarpoq.

”Tamatumuuna Frankrigimi, franskisut, atuartitsinerillu nalinginnaanerusut oqaatsinullu tunnganerusut ilinniarpai. Tamanna Peterp inuunerata sinneranut sunniuteqarpoq. Franskit kulturiat, nerisassioriaasiat, atuakkiaat aningaasaqarnermik suliaqartut akornanni nalinginnaanngitsoq oqaluuserisinnaavaa”, taanna oqaluttuarpoq.

Peter Nersornaammik sølviusumik 2014-mi saqqarmiulerneqarpoq. Tamanna Lars-Emil Johansenimit, taamanikkut Inatsisartuni siulittaasuusumit, tunngavilersorneqarlunilu tunniunneqarpoq.

Peter Beck 2018-imi soraarninngorlunilu 2020-mi Kalaallit Nunaannit aallarpoq. Kræfternerminut katsorsarneqarnera Kalaallit Nunaanni peqqinnissaqarfimmit akissaarunneqarsimammat aallartariaqarsimalluni arlaleriarluni oqaluttuartarpoq.

Peterp inunnik naapitaminik soqutiginnilluartarnera nuliata Martha Labansenip erseqqissarpaa.

– Kikkut tamaasa maluginiartarlugillu angusaqarnissaannut tapersersortarpai. Ulluinnarni qiimasuuvoq, sukkut tamaana oqaaseqalaartarluni, ilisarnartumik qungujuttariaaseqarnini tamorasaartarninilu ilisarnaatigai.

– Qitornaqanngilaq, toqussanili tikillugu Iluunamut asannilluni ataataavoq.

– Nunarput asasorujussuuaa, Martha Labansen oqaluttuarpoq.

Peterp nuliani Martha Labansen, panini Iluuna qatanngutinilu Lone qimappai.

Peter Beck Holbækimi Skt. Nikolaip oqaluffiani tallimanngorpat oktobarip 24-anni nal. 11 ilisaassaaq. Kingorna Skomagerkroenimi, Landevejen 4, 4060 Kirke Såbymi eqqaaniaasoqassaaq.