Aningaasat kinguaattoorutit milliardit affaanik ikilisinneqarput
Nukissiorfiit aserfallatsaaliuinermi kinguaattoorutaat 500 millionit koruunit sinnerlugit appariartut, misissuinerup nutaap takutippaa.
Nukissiorfiit kinguaattoorutaat siornatigut naatsorsuutigineqartumit annikinnerupput.
Assi: Leiff Josefsen
Politikerit ilimaginngisaminnik ikiorneqarput, tassami pisortani atortulersuinermi iluarsaasarnernut aningaasaleeqqittarnernullu kinguaattoorutit ikilisinneqarsimapput.
Tamanna ukiumoortumik Aningaasaqarnikkut Ingerlatsineq pillugu Nalunaarusiami, Inatsisartunut nassiunneqareersumi sapaatip-akunneranilu matumani saqqummiunneqartussami, atuarneqarsinnaavoq.
Iluarsaasarnernut aningaasaleeqqittarnernullu akiligassanut kinguaattoornerit 0,5 milliardit koruuninik appartinneqarsimasut, nalunaarusiami ersersinneqarpoq.
- Taamatut kinguaattoorutinik appartitsineq suliassaqarfimmut aningaasaleeqataanerup annertusineranut takussutissaanngilaq, Nukissiorfiilli pigisaanik misissuinerup kingunerisaanik 2,3 milliardit koruunit 1,8 milliardit koruunillu akornanni naatsorsuutit appartinneqarsimanerat pissutaanerpaavoq, Naalakkersuisut nalunaarusiaminni allapput.
Peqqinnissaqarfiup kinguaattoorutai amerleriarput
Ajoraluartumilli aamma allamik ilisimaneqarluartumik pitsaanngitsumik sammivilimmukartoqarpoq:
- Peqqinnissaqarfimmut suliassaqarfiup pigisaasa tamarmiusut kingullermik nalilersuiffiginerat 641 mio. kr.-nit 887 mio. kr.-nut qaffaanermik kinguneqarsimammat, peqatigitillugu maluginiartussaammat malugissallugu pingaaruteqarpoq. Tassungalu ilaavoq pisortat illuutaannut (ilinniarnertuunngorniarfiit, qitiusumik ilinniarfiit, seminariat ilinniartullu ineqarfii) kinguaattoorutit qanoq annertutiginerannut naatsorsuinerit suli pigineqanngimmata, tamakkulu annertusinnaapput, Naalakkersuisut allapput.
Dronning Ingridip Napparsimmavissuani kinguaattoorutit 450 millionit koruuninit 650 millionit koruuninut amerlisimanerat, Peqqinnissaqarfimmi aningaasartuutit annertuseriarsimanerinut pissutaanerpaavoq.
Iluarsaasarnernut aningaasaleeqqittarnernullu kinguaattoorutit ataatsimut nalunaarsorneri aajukua, maanna 7,1 milliardit koruuniusut.
Politikkikkut-Aningaasaqarnikkut nalunaarusiaq 2024
- Akisussaaffimmik tigusisoqarnissaa pingaaruteqarpoq
Kinguaattoorutit isumagineqarnissaata aaqqiissutissanillu nassaarnissap pisariaqassusia nalunaarusiami erseqqissarneqarpoq, taamaanngippammi kinguaariinnut tulliuttunut akiligasseerujussuarnertut issaaq:
- Tamanna taakkununnga aningaasatigut atukkanullu pitsaanngitsutigut kingornussanngorsinnaavoq artorsaatissiisoq. Taamaattumik inuiaqatigiit pigisaannut akisussaassuseqarnissaq tamakkulu aserfallassimannginnissaasa qulakkeernissaat pingaaruteqarpoq, taamaaliornikkut uagutsinnut tullinnguuttut akiitsunik akilerneqanngitsunik kingornussaqassanngimmata, Naalakkersuisut nalunaarummi allapput.
