Anna Wangenheim: Sana ilisimatusarfiutigaluni napparsimavinngussaaq

Podcasti allaaserisap naqqaniittoq tusarnaarsinnaavat.

Naammagittaalliuutit Facebookikkut saqqummiunneqartut ullut tamarluinnangajaasa takusarpagut.

Peqqinnissaqarfillu pillugu isornartorsiutit imaaginnavipput: Sulisussaaleqineq, taartaasaartut akisoorujussuit, aningaasassaaleqineq nakorsiallu sivisuumik ikiorneqarsimanatik nappaataat kingusiinnaq suussusersineqartut.

Taakkua saniatigut peqqinnissaqarfimmi sulisut aningaasarsiatigut isumaqatigiissutaat siornali qaangiuttoq suli nutarterneqanngitsoq.

Peqqinnissaqarfik pillugu isornartorsiutit sammissagaanni sumit aallartissanerluni nalunartulluunniit ilaatigut eqqarsaatigalugit Anna Wangenheim naapipparput. Dronning Ingridip Napparsimavissua, ulluinnarni Sanamik taagorneqartoq kaajallallugu pisuttuaqatiginiarparput. 

Anna Wangenheim peqqissutsimut inunnullu innarluutilinnut naalakkersuisunngoqqammerpoq, innuttaasullu qisuariaatigisartagai ilisimalluakkani oqaluttuarai.

- Attavigineqaannaavippunga Messengerikkut Facebookikkullu. Sumi tamaani tag-ertiinnaavillunga. Taakkua immikkoortikkuminaatsissinnaasarpakka tiguartiffigisarakkit.

- Ullumikkut ajoraluartumik amerlasuut oqartut tusaasarpakka illu toqoraavik. Sakkortugaluarpoq taama oqassalluni, kisianni taanna isiginnittaaseq aamma ersiutaagami, taanna oqarpoq.

Anna Wangenheim peqqissaasutut ilinniagaqarpoq, Narsami Nuummilu peqqissaasutut sulinikuulluni. Taamaammat peqqinnissaqarfiup iluani susoqarnera ilisimalluarpaa. Allanngortitaqarusupporlu.

- Allanngortittariaqaratsigu taanna oqaluttuaq. Oqaluttuaq nukittuunngortitsisoq neriuummik pilersitsisoq. Kisiannili unneqqarissumik, ullormiit ullormut taanna takkunnavianngilaq. Kisianni aallartiffeqartariaqaratta, Anna Wangenheim oqarpoq.

Dronning Ingridip Napparsimavissua ilisimatusarfiutigaluni napparsimavittut

Aallartiffiit ilaattut taasinnaasaa tassaavoq nunatsinni napparsimavinni qitiusutut inissisimasoq Dronning Ingridip Napparsimavissua. Napparsimavissuarmi ilisimatusarfiutigaluni napparsimavinngortikkusuppaa. Anguniagaq inuttaata oqarnera malillugu aappagu piviusunngorsinnaavoq.

Piviusunngussappat ilisimatusarfimmik suleqateqarnissaq pisariaqarpoq. Atorfilittamilu periarfissat misissoreersimammatigit anguniakkani piviusorsiortuusoraa.

- Ilisimatusarfinnik suleqateqarnikkut piginnaasanik ilisimasanillu qaffassaanikkut annertunerusumik sinaakkuteqalissagami. Pituttuissallunilu ineriartortitsinermut tunnganerusumik isikkoqalerluni, Anna Wangenheim takorluukkani pillugit taama oqarpoq.

Ilisimatusarfiutigaluni napparsimavik peqqinnissaqarfiup isigineqarnerata pitsanngortinnissaanut iluaqutaallunilu, ataavartumik sulisussanik qammaaqataasinnaasoraa. Aammali aningaasaliisussanik nutaanik ammaassisinnaavoq.

- Aningaasaliinissamut avataaninngaanniit ammaasseqataasinnaanera kissaatigalugu, ilaa aningaasameerfioqimmat.

Inuit innarluutillit pillugit nutaamik eqqarsarneq

Anna Wangenheimip peqqinnissaqarfiup akisussaaffigilernerata saniatigut nutaamik allamik akisussaaffeqalerpoq, inunnummi innarluutilinnut naalakkersuisunngorami. Oqartussaaffik taanna nutaajuvoq, nunatsinniinnaanngitsoq aammali nunat avannarliit eqqarsaatigalugit.

Naak inuit innarluutillit sullinneqarneranni kommunit akisussaaffeqaqataagaluartut qitiusumit ukkatarineqarnissaa pisariaqartoq naalakkersuisup oqaatigaa.

- Takusinnaanngisat takuneqarsinnaalerpata paasinninneq annertusiartortarami, Anna Wangenheim oqarpoq. 

Inunnulli innarluutilinnut tunngasut ersarinnerulersinnissaat kisimi naammanngilaq. Sulisussat amigaataaginnarnatik sulisussat ilinniarsimasut amigaatigineqarput. Taamaammat nutaamik eqqarsartaaseqarluni sulisoqartariaqarsoraa. Nunattalu nunarsuarmioqatigiinnit piffissami matumani ukkatarineqarnera atorluarneqartariaqarnerarlugu.

- Oqaannaavikkatta sumiikkaluaruttaluunniit assassaqanngilagut aningaasassaqanngilagut. Taavami allatut eqqarsarluta misissuilaatsiarta?

Assersuutigalugu aningaasaateqarfiit aningaasaliisartullu nunatta avataaneersut, inuit tarnimikkut timikkulluunniit innarluutillit najugaqarfiisa inuttaannut naleqqussarnerinut, imaluunniit atortunik tulluarsakkanik pissarsissunniarnerinut aningaasaliisinnaanerat takorloorpaa.

- Immaqa periarfissaqaruttortoq, kommuninut immikkut aningaasartuutigissallugu oqimaappallaarpat, Anna Wangeheim taama oqarpoq.

Anna Wangenheimip oqaloqatigineqarnera tamakkiisoq ataani podcastimi tusarnaarsinnaavat. Naalakkersuisoq peqqinnissaqarfik pillugu, aamma inuit innarluutillit pillugit eqqartueqatigalugu Dronning Ingridip Napparsimavissuata eqqaani pisuttuaqatigaarput.