Anorersuarneranit qulimiguulik mikisoq uppippoq
Qulimiguulik uppissimasoq pillugu kalerrisaarisoqarmat, qatserisartut marlunngormat Nuummi mittarfimmut ornigupput.
Qulimiguulik mikisoq mittarfimmi uppippoq
Assiliisoq: Leiff Josefsen
Illoqarfiit pingaarnersaanni anorersuartut sakkortutigisumik anorlernissaa ilimasaarutigineqarmat, marlunngornermi ualikkut Nuummi upalungaarsimasut innuttaasunut angerlarsimaannaqusillutik kaammattuipput.
Anorersuarnera pissutigalugu inuit ataasiakkaat politiinut nalunaarutiginnittarsimasut Kalaallit Nunaanni Politiit pigaartuisa pisortaat Carl Sværd, sisamanngornermi ullaakkut Sermitsiamut oqarpoq.
Assersuutigalugu Nuummi mittarfimmi ikuallattoqarneranik kalerrisaarut aallartimmat qatserisartut ornigupput.
Qulimiguulik mikisoq anorersuarujussuarnerani uppissimammat kalerrisaarut aallartinneqarsimasoq, pigaartut pisortaat oqaluttuarpoq.
Pisoq pimmat qulimiguulik mittarfimmi uninngavoq inuttaqarnani, ajoqusertoqanngilarlu. Ilaatigut mingutsitsisoqarsinnaanersoq misissorniarlugu qatserisartut sumiiffimmiipput.
Suliffeqarfimmit saviminernik teqqaasoqarsimasoq politiit aammattaaq nalunaarfigineqarsimapput, annertunerusumilli atortorissaarutinik ajoqusertoqarsimaneranik politiit paasissutissaateqanngillat.
