Anorersuarnissaa aarlerisaarutigineqartoq: Nuummiit timmisartuussinissat marlunngornermi taamaatinneqarput
Nuummi marlunngorpat anorersuarnissaa aarlerisaarutigineqarpoq. Anori ullaarnganiik 30 m/s-imik sakkortutigisarsinnaanissaa ilimasaarutaavoq. Nuummiit Nuummullu timmisartuussinissat tamarmik taamaatinneqartut, timmisartuutileqatigiiffik nalunaarpoq.
Timmisartut Nuumminngaanniit aqagu qangattassanngillat. Nuummiit Nuummullu timmisartuussinissat tamarmik taamaatinneqarput.
Assi: Oscar Scott Carl
Ukiaakkut silarluttarnera Nuummut nalliuppoq.
Air Greenlandip Nuummut Nuummiillu marlunngornermi oktobarip arfineq-aappaani timmisartuussinissani tamaasa taamaatippai. Sapaatip-akunnerata ataatsip ingerlanerani Nuummi anorersuarnissaanik aappassaanik aarlerisaarisoqarpoq, tassa ullaarnganiik 30 m/s-imik sakkortutigisumik anoraasuartarnissaa naatsorsuutigineqarluni.
DMI naapertorlugu anorersuaq nalunaaqutaq 08.00 missaani Nuummut anngutissasoq naatsorsuutigineqarpoq, anoraalu 21 m/s-iussalluni. Ulloq naallugu anorersuarnissaa ilimasaarutaavoq.
Angalasut nutaamik pilersaarummik tunineqassasut
Nuup mittarfiani timmisartut sullinneqarsinnaasut Angallannermut Aqutsisoqarfimmit killilersugaapput, tassa nalunaaquttap akunneranut amerlanerpaamik sisamanik timmisartunik sullissisoqarsinnaalluni.
- Angallassinissamut pilersaarutit sivisunerusumik suliarineqarnissaat tamatuma kinguneraa, angalasut ilaasa apuunniarnissaat sivisinerussasoq ilimagissavaat. Ajuusaarutigaarput aaqqiiffiginissaalu sukataarutigaarput, Air Greenland nittartakkamini allappoq.
Air Greenlandip angalasunut angalanissamik pilersaarutit nutaat mailikkut SMS-ikkullu nassiunneqarnissaat eqqumaffigeqqullugit kajumissaarutigaa.
- Timmisartuni inissat ulluni makkunani tamakkeqqammata eqqumaffigeqquarputtaaq, taamaattumik angalanissamut pilersaarutit nutaat allanngortinneqarsinnaanavianngillat aatsaat pinartoqarsimatillugu takussutissaqaraanni. Soorlu napparsimasoornermut imaluunniit toqusoorsimanermut tunngatillugu.
