Aqqaluap ikinngutivissuani annaavaa: Allaanngilaq inuttut ilanngarneqarluni

Inatsisartut ukiaanerani ataatsimiinnerata aallartinnginnerani naalagiaqatigiinneq ileqquusoq ukioq manna allaaneroqaaq. Ukiuni 30-ni kingullerni naalagiaqataasartoq peqataanngilaq.

- Immikkuullarilluinnartutut misigivara. Aamma allaanngilaq affaannarmik naalagiarluni, Aqqaluaq B. Egede naalagiarnerup kingorna taama oqaluttuarpoq.

Ikinngussuami Hans Enoksen pingasunngornermi unnukkut qimaguppoq. Taannalu pillugu naalagiarneq aallartinngitsiartoq oqaluffimmi naneruummik ikitsisoqaqqaarpoq.

- Inatsisartut siulittaasuata aammalu Naalakkersuisut siulittaasuata inassutigimmassuk uanga ikissaginga, qamuuna qujallungalu attortippunga aamma. Noqinniarnaqaaq, nukittuniarnaqaaq.

Tussiutit sisamat naalagiarnermi atorneqarput. Siullertut normu 56 “Toqqorpara Uummatinnut” atorneqarluni.

- Tussiut taanna Hansilu avissaartinneqarsinnaanngillat. Immikkoortinneqarsinnaanngillat. Inuunermini taallaq erinaq taanna pigisarivaa. Taamaammat aamma atorneqarmat noqinneq ajulerlunga qialaarpunga.

Neriartoqqusaaneq

Hans Enoksen Aqqaluaq B. Egedelu parteeqatigiinngikkaluarlutik qanittumik ikinngutigiinnerat nunarput tamakkerlugu ilisimaneqarpoq. Ilisimaneqannginnerugunarporli ikinngutigiinnerisa qanoq aallartinnikuunerat. Tamanna ukiut 20-t matuma siorna pivoq.

- Inuusuttuarakasiusunga imminnut neriartoqqunikuuaanga nulianilu. Tassani tassa ilikkarpakka.

Aqqaluaq B. Egede taamani 26-nik ukioqarluni Narsap kommuniani kommunalbestyrelsemut qinigaaqqammerpoq. Neriartoqqusaagamilu tupaallassimaqaaq.

- Taamani uanga silarsuanni Qanoruukkuinnaq isigisagaq, aammalu imatut inuk ilisarisimanagu inuttut.

Soormitaavaana neriartoqqusimagaatit?

- Nutaatut tikilluaqquneqarnissara naalakkersuinermi suliaqarnissannut pingaartissimavaa Naalakkersuisut siulittaasuatut, Aqqaluaq oqaluttuarpoq.

Siumumut Naleqqamullu uteriilluni nooqqusaraluarpaa

Sunaaffali neriartoqqusisoq Hans Enoksen, taamani Siumut tunuliaqutaralugu Naalakkersuisunut siulittaasuusoq allamik aamma isumapalaaqartoq.

- Ulloq tassanngaanniit Siumunngortitsiniarneq aallartippoq. Iluatsinnikuunngilaa, Aqqaluaq illarlunilu oqarpoq

Kingorna Naleraq 2014-imi pilersereerlugu aamma misileeqqittaraluarpoq.

- Naleranngoreerluni Naleranngortitsiniarnersuaq aamma ingerlanikuugaluarpoq.

Aqqaluaq B. Egedep Inuit Ataqatigiit sinnerlugit qinikkatut ulloq manna tikillugu sulivoq. Ullumilu naalagiarnerminni partiiminut nuutsitseriaraluartarsimanera qaffakaatitaanut ilaavoq.

- Marluulluta inuttut sulinikkut, aammalu inooqatigiinnikkut misigisarpassuagut nuannersut oqimaattullu sakkortusinnaasut ilai, tamakkualuunniit tamarmik allanngortissimanngikkaat ikinngutigiinnerput allaat ilaquttagut, taassumalu ilaqutai ilaqutariittut misigisimalerluta. Taanna naleqartittorujussuuara, Aqqaluaq oqarpoq.

Taarsioraluarluni qiimaqatigiissinnaaneq pingaaruteqarpoq

Aqqaluaq naalagiarnermi ullullu ilarujussua killitsisimaqisoq takuneqarsinnaavoq, sunik tamanik, sulinermi inuttullu qanilluinnagaq annaasimagaanni tamanna avaqqunneqarsinnaanngilaq.

- Allaanngilaq inuttut ilanngarneqarluni. Ullumikkut misigeqaara, Inatsisartut ukiaanerani ataatsimiinnerata aallartinnissaani.

Piffissalli ilaani qiimasaarluni pisaqattaarpoq. Nuannaarnermi inissaqartinneqartuaannassasoq ikinngutaata kissaatigiuartarpaa.

- Oqaattuartarpaanga: “Qaquguluunniit peerukkuma aliasullutit inuunerit ingerlatissanngilat. Nuannaarlutit ingerlatissavat, aqqutissagut taamaassimammata”, Aqqaluaq killitsisimalluni oqarpoq.

Ikasaqatigiissinnaasut

Aqqaluap Hansillu ikasaqatigiinnertik Facebookimi siammartertarmassuk inuiaqatigiit ilisimalluarpaat.

- Marluulluta oqaasertalinngikkarluarlugu naleqarterujussuaripput, meeqqaminik annaasaqarnermini aammalu peqqissutsimigut pakasarneqarujussuarnermini. Orninnerit tamaasa oqallisigisinnaanera. Kisianni pingaarnerpaatillugu, qiimaneq ulluni ajornerpaani aamma ilaassooq, Aqqaluaq oqaluttuarpoq.

Qiimanerli ikasarninnguukkaangat ilaanni ingasavittarsimapput. Pisoq ataaseq Aqqaluap eqqaavaa.

- Allaffiginikuuaanga ataatsimiilluta. Taamanikkut eqqaamanerliunngikkukku aningaasaqarnermut ataatsimiititaliami ilaasortaallunga, ataatsimiillunga. Allassimavoq “ajorpunga, nukeeqqavunga, sakiara annernartuinnaavoq.”

- Taava ataatsimiinnera unitsilaariarlugu, ilakka kalerriarlugit ornippara.

Iserfigigamiullu qanoq innera takusinnarlugu isumannanngitsoq paasileramiuk sammillugu aallartippaa.

- Tusagassiorfinni oqaatigerpiarsinnaanngisannik ikasarfigalugu aallartippara. Taava illariiliivilluta, tassani maluginikuuara inuup taarsiortup aamma nuannersumik sanileqartikkaangamiuk sukkanerujussuarmik pitsaasup tungaanut ingerlasinnaasoq.

Hansip taamani iluaallakkami ikinngunni qujaffigaa.

- Taava qujaffigalunga skildpaddemik sukkulaamik tunivaanga, oqarluni, taamagooq ikinngut nalikitsigisoq akisuumik tunineqarsinnaanngilaq

- Tassalu Hansi!, Aqqaluaq illarlunilu oqarpoq.

Inuuneq ingerlaqqissaaq

Aqqaluap Hansillu ikinngutigiinnerat ikasarfiuinnartanngilaq.

- Eqqarsaatigisani annaasara annerpaaq unaavoq, kisimiittorujorujussuunikuuvunga, naalakkersuinikkut sulininni meeqqakka kisima ilagalugit. Ulluni taakkunani unamminartorsiorfiusuni saninniittuarnikuuvoq. Misigissutsikkut imaluunniit sulinerup nalaatigut ilaatigut oqimaattumiikkuma saaffissaqartuarnikuuvunga, Aqqaluaq oqarpoq.

Sorpassuimmi avitseqatigiissutigisarpaat.

- Suleqatitut attaveqatigiinneq allaavoq, aamma inuttut attaveqatigiinneq allaavoq. Taamaammat Hansi inuttut attavigisinnaajuarnera, suliffimmuinnaq tunnganngitsumik, kisianni aamma misigissutsit, immaqalu aamma inuttut allanut oqallisigivallaartanngisat Hansimut apuussinnaajuarneri, aamma taanna killormut. Tassa taannaavoq uannut annaasaq angisoorujorujussuaq.

Taamaakkaluartoq inuuneq ingerlaqqissaaq, maqaasinerli takkuttarumaarpoq.

- Taava oqarfiginikuuaanga ullut ajornerpaarpaat ilikkareernikuuarput inersimasutut pinngitsoornata qaangerniagassarigigut. Aamma inuit allat attavissaasut, qanigisagut. Tassa taamaammat ernumananga aamma soorunami ingerlatissavara, Aqqaluaq B. Egede taama naggasiivoq.