IA-P ATAATSIMEERSUARNERA 2024
Aqqaluaq Biilmann Egede qinigassanngorteqqippoq Agathe Fontainilu tunuassalluni
Maanna uppernarsarneqarpoq. Inuit Ataqatigiit politikkikkut siulittaasup tullersortaata, Aqqaluaq Biilmann Egede qinigassanngorteqqinniarluni aalajangerpoq. Taamaalilluni maanna erseqqissaivoq politikkikkut siulittaasup tulliatut inissisimaffik pillugu unammillertoqassasoq. Partiilli aaqqissuussaanermut siulittaasup tullianut tunngasoq allaanerussamaarpasippoq, Agathe Fontain aalajangerpoq tunuarumalluni: - Ukiuni amerlasuuni partiip siulersorneqarnikkut sullinnerani peqataanikuuvunga, kisianni maanna piffissanngorsorivara nukiit nutaat suliassamik tigusinissaat, taanna Sermitsiamut oqarpoq.
Siulittaasussamik qinersinermi aamma partiip siulersuisuunerisa qinersinermi, Aqqaluaq aamma Agathe qalipaataat saqqummiuppaat. Aqqaluaq atorfimminut qinigassanngortikkusuppoq Agathelu atorfimminiit nutaanut inuttassarsiuussilluni.
Assiliisoq: Jensine Berthelsen
Sermitsiaq ulluni kingullerni akissutissarsiniarparput Inuit Ataqatigiit oqartussaasuisa qullersaanni, tassa siulittaasutut, politikkikkut siulittaasup tulliatut aammalu aaqqissuussaanermi siulittaasup tulliatut sassartussat arlaliunersut, taamaalillunilu unammillertoqassanersoq.
Maanna akissutisivugut. Aqqaluaq aalajangersimanerminik qularuteqanngilaq:
- Piffissangaatsiaq atorlugu eqqarsaatigisimavara aamma partiitta iluani malussarniutikka naalaarsimavakka, minnerunngitsumillu partiitsinnut suna pitsaanerussanersoq aamma nalilersorpara sassaqqinnissara aalajangiutsinnagu. Maanna aalajangerpunga. Partiitta siunissaanik nangittumik ilusilersueqataarusuppunga, ingerlalluarnitta siunissatsinni ingerlaannarnissaa qulakkeersimaniarlugu suleqataarusuppunga, qinigassanngorteqqittoq Biilmann Egede oqarpoq nangillunilu:
- Partiitsinni ingerlatsinerput ajunngilaq ingerlalluarlutalu, kisianni politikkikkut suliaqarnermik annertuumik suliassaqarpugut. Politikkikkut ingerlatsinermi peqataaffiginninnera partiitsinni aammalu naalakkersuinikkut pitsaasumik ineriartornissaat nangittumik suleqataaffigerusupppara.
Agathe: Nukiit nutaat suleqataanissaat piffissanngorpoq
Taamaalilluni Aqqaluaq unammisussanngorpoq, tassami Pipaluk Lynge nalunaaruteqareerpoq politikkikkut siulittaasup tulliatut sassarluni, allaavorli partiip aaqqissuussaanermut siulittaasup tulliatut qinersinissaq.
Allamik sassartoqassanngippat, 49-nik ukiulik Naya Pedersen Lyberthip Agathe Fontain taarserlugu aaqqissuussaanermut siulittaasup tulliatut inissittussaassaaq.
- Ukiorpassuarni partiimik sullisseqataanikuuvunga, upernaarli eqqarsaatigisarpara sassaqqissanerlunga imaluunniit partiimik sullissinera akisussaaffitsigut annikillisassanerlugu, maannalu aalajangerpunga nukiit nutaat suliassamik tigusinissaat, Fontain oqarpoq.
