Aqqaneq-marluullutik ineqatigiipput, aniguiniarnissarlu imaannaanngilaq

Illu sungaartoq qanganitsersimaqisoq inuit aqqaneq-marluk najugaqarfigisaat isersimavarput. Illup silataata qalipaataa katagartoq maluginiagassanut siullernut ilaavoq. Inimullu iseraanni madrassi saatsoq isiginnaarutip saani inissinneqarsimasoq takuinnarlugu pissutsit qanoq inneri takuneqarsinnaapput.

Inissakilliorneq Louis Kristiansenimut najugaqartunullu allanut ulluinnarsiutaavoq.

- Ilaanni ilungersunartarpoq amerlanerput, Louis anersaarulullunilu taama oqarpoq.

Illu najugaqarfigisaat Louisip ataataata, maannakkut 76-nik ukiullip Aage Kristiansenip illoraa. Kinguaariit sisamat maani najugaqarput, taakkununnga ilaavoq Louisip ernutaa suli maannamut atertaarsimanngitsoq. Louisip ernuttani eqqaatillugu ilungersuummertartoq malunnarpoq.

- Illup ilua oqoqarami, soorunami ernutannguara ilaanni napparsimasarpoq, Louis oqarpoq.

18-iunikuugaluarput

Illup qaliani init ilorlerpaartaanni inuusuttuaraq Johannes Kristiansen Fifamik spillerujoorpoq. Tunuani Efraim Kristiansen innangavoq isiginnaarujoorlunilu. Ineeraq taanna marluullutik sinittarfigaat. Illu inuit aqqaneq-marluullutik najugaqarfigisaat 1960-ikkunni sanaajusoq illup ittuata Aagep, nuliarigaluatalu 1978-imi iserterfigaat. 1980-ikkunni allilerneqarnikuuvoq, tallimanillu sinittarfeqarluni.

Maani ullumikkut najugaqartut aqqaneq-marluusut siornatigornit ikinnerupput. Louis Kristiansenimmi oqaluttuarnera naapertorlugu 18-iunikuugaluaramik.

Louis immikkut ineqarnikuugaluarpoq, alianartumilli pisoqarneratigut iniginikuusaminnit angajoqqaami illuanut 2016-imi uteqqittariaqalerpoq.

- Meeraqarfigigaluaralu najugaqatigiikkallaratta eqqissisimaarnartorujussuuvoq. Peerummat, adressealu inuttaanut allaqqammat tigummiinnarsinnaanikuunngilara. Taamani pigisagut tigoriarlugit maannga nooqqilerama imaannaannginnikooqaaq. Nammineq angerlarsimaffeqarunnaarluni. Ataatannut nooqqilerluni ilungersunarpoq, Louis oqaluttuarpoq.

Imertoqartillugu toqqissisimanarunnaartarpoq

Illumi amerlasuujulluni najugaqatigiikkaanni ataqqeqatigiinnissaq pingaarutilerujussuuvoq. Tamatigulli taamaattoqartuaannanngilaq. 

- Weekendi aallartikkaangat ilaanni imertoqartarpoq. Taamaattoqaraangat toqqissisimanarneq ajorpoq, Louis oqarpoq.

Louis nulianilu Asta ilaanni imertarlutik isertuutinngilaa. Namminerlu angerlarsimaffeqannginneq Louisimut ilaqutaanullu sunniuteqartaqaaq.

- Nuliaralu kisimiikkusuttaraluarpugut. Ernutannguarput ilagaarput, panigalu, ataataga aamma maaniippoq. Nammineq angerlarsimaffittaarusunnartarpoq privateqarusunnarluni, Louis oqaluttuarpoq.

Naak ilaanni naammagittarnissaq pisariaqartaraluartoq inuppassuulluni najugaqatigiinneq tujorminartuinnaasanngilaq.

- Ataatsimooraangatta nippaarittaqaaq, ernutara qiimmaallattaqaaq, nuannaaleqqittarpoq, Louis qungujulluni oqarpoq.

AAMMA ATUARUK

Aalup tunumiut sumiorpaluutaat tammatsaalerusuppai: - Ukiut ingerlanerini kitaamiusuinnaq oqalulernissaq ernumanarpoq

Kisimeeqqajanngillat

Ilaqutariit Kristiansenikkut amerlasuujullutik najugaqatigiittuni kisimeeqqajanngillat. Naatsorsueqqissaartarfiup kisitsisaatai qiviaraanni Tasiilami inuit arfineq-pingasunit amerlanerullutik najugaqatigiit 42-pput.

Maniitsumut 700-nik innuttaasoqarnerusumut sanilliutissagaanni, inuit arfineq-pingasunit amerlanerullutik najugaqatigiit arfineq-marluupput.

Tasiilami innuttaasut aalajangersimasumik adresseqanngitsut 2024-mi 54-usut innuttaasut allattorsimaffianni takuneqarsinnaavoq.

Inuillu 195-it inissiaatileqatigiiffik Iserit aqqutigalugu Tasiilami inissarsiortuusut decembarip 31-ani 2024-mi kisitsisit ersersippaat.

Allannguinissamut nukissaaleqineq

Louis Kristiansenip ernuttani inimi madrassimi saatsumi pinnguarusaartoq qungujuttarpaa. Louis maanna 45-nik ukiulik pingasunik qitornaqarpoq. Angajulleq meeraqarfimminik siullermik meeraa anaanaminiippoq, akulleq taassumalu ernera maanna najugaqatigai. 

Nukarlequtaalu angerlarsimaffiup avataanut inissinneqarnikuusoq qanittukkut 18-iliisussaq Tasiilamut angerlartussannguliivippoq. Taanna Tasiilamut angerlaruni inuusuttut najugaqarfiinut nuussasoq ataataata oqaluttuaraa. Illullu najugartik nutaanngilimmat kinguaani aamma pillugit initaarusuttaraluarpoq.

- Ernutannguatta peroriartornerani manna najuinnassagutsigu nutarterneqanngikkuni nakkaateriissooq, Louis oqaluttuarpoq.

Pilersuisup Tasiilami pisiniarfiata aappaani paarlatsitut sulinikuugaluarpoq, maannali suliffeqarani. Inissarsiortut allattorsimaffianniinnikuugaluarluni aamma oqaluttuaraa.

- Inissarsiorlunga aallartinnikuugaluarpara unitseqqilluguli. Utaqqisuniinnermut akilersuut unitsinnikuuara, immaqa tullinnguuteruttorlunga.

Maanna nulianilu suliffeqannginnamik initaassanerlutik akissaqassanerlutik qularaa. Utaqqisunulli allatseqqikkusuppoq.

- Init akitsoqqinnikuummata akissaqassanerluta naluara. Imaassinnaasoq nuliaralu suliffittaaqqeriarutta iluatsitsisinnaasugut.

Nuliani Meeqqerivik Mikisumi paarlatsitut pulaareernitta kingorna sulilersimasoq Louis oqaluttuarpoq, suliffissarsiornissanilu eqqarsaatiginerarlugu. Suliffeqanngitsuullunili aamma nammineq angerlarsimaffeqanngitsuunermit aniguiniarneq artornartaqisoq isertuutinngilaa. Aniguiniarsarineq qanoq innersoq aperineqarami oqaasissaaleqivoq.

- Akisinnaanngilaraluunniit taannartaa, Louis Kristiansen qullilillunilu oqarpoq.