NUUK
Aqqusineq angallaffiulluartartoq misissuinermi matugallarneqartoq
Nuummi aqqusineq 400-rtalik politiit misissuinerinut atatillugu sisamanngornermi ullup qeqqata missaani matugallarneqarpoq.
Assiliisoq: Leiff Josefsen
Sapaatip-akunnerata aallartinnerani Nuummi aqqusinermi 400-rtalimmi biilerluni ajutoorujussuarfiuvoq.
Ajutoornermi inuusuttut marluk aqqunartiterput.
Sisamanngornermi ualikkut aqqusineq ajutoorfiusoq eqqaalu politiinit matuneqarallarpoq.
Pigaartut pisortaat Malik Olesen paasissutissiivoq, matusigallarneq biilinik ajutoorsimasunik misissuisup ajutoorfiusumik misissuineranit pissuteqartoq.
Biilinik misissuisoq Danmarkimiit Nuummut tikisinneqarsimavoq, teknikkikkullu misissuinerit maanna ingerlatilerlugit.
Pigaartut pisortaata naatsorsuutigaa, misissuinerit akunnerup ataatsip imaluunniit akunnialuit iluanni naammassineqarsinnaasut. Tamassuma kingorna aqqusinermi angallanneq ammarneqaqqissaaq.
