- Aqutsineq nakkutigineqarpoq aamma ernumanissamut pissutissaqanngilaq

Kommunit tamarmik namminersorlutillu oqartussat missingersuutinut naatsorsuutinullu inatsit (inatsisit nr. 26 28. november 2016-meersoq) malittussaavaat. Kisianni suli sumik pissuteqarnersumik paasineqanngitsumik Kommune Kujallermit nuna tamakkerlugu akileraarutit aningaasartaannik qaammatini arlalinni 2023-ip naajartornerani 2024-llu aallartinnerani namminersorlutik oqartussanut nuussisoqarsimanngilaq.

Tamanna isumaqarpoq kommunip aningaasat 40 millionit koruunit sinnerlugit amerlassusillit kommunip karsianiitiinnarsimagai, taakkulu nunatta karsianut nuunneqartussaagaluarput. Kommunili aningaasat nuunngitsuuginnarnagit, siunertanut suli suussusersineqanngitsunut atorsimavai, tamatumalu kingunerisaanik maanna kommunip taarsigassarsiat qaavisigut taarsigassarsiniarnissaq avaqqussinnaajunnaarsimallugu.

Stine Egede Sermitsiamut nassuiaavoq paasineqarmat akileraarutit A-t akilinngitsoorneqartarsimasut ingerlaannaq aallartittumik akiitsorilersimasanik akilersuineq aallartinneqarsimasoq.

- Maannakkut amigaatitisagut tassaapput akiligassat qaammatit pingasut nalinginik annertussusillit, taakkulu akilersinnaanissaanut aningaasanik tigoriaannarnik amigaateqarpugut. Aningaasat akiliutigisassaraluagut siunertanut allanut atorneqarsimasut maanna qulaajartippagut. Atuivallaartoqarsimanersoq maannangaaq erseqqissumik oqaatigineqarsinnaanngikkallarpoq, misissuinerit suli ingerlammata naatsorsuutillu suli amigaataammata.

- Tassa maanna qulaajartipparput aningaasat pineqartut sumut aammalu immikkoortortaqarfinnit sorlernit atorneqarsimanersut, aamma naatsorsuutigaara aningaasaqarnermut ataatsimiititaliamut nalunaarusiamik piaarnerpaamik tunniussisoqarumaartoq, Stine Egede oqarpoq nangillunilu:

- Taamaattumik susoqarpiarsimanersoq suli oqaaseqarfigisinnaanngikkallarpara, nalunaarusiaq nassuiaataasoq utaqqeqqaartariaqaratsigu, kisianni kingumut erseqqissassavara pinerluttoqarnikuunngimmat. Tassungalu ilanngullugu erseqqissaatigissavara pisoq pimoorullugu tigugatsigu taamatuttaaq aningaasaqarnikkut aqutsinerup ukiup aallartinneraniit sukannersumik nakkutigeqqissaarnera ingerlanneqarmat, aamma sulissutigalugulu piviusunngortinnikuuara kommunalbestyrelsip tamarmiusup aningaasaqarnikkut inissisimanerup nalunaarsuiffii sapaatip akunneri tamaasa malinnaatinneqarnissaa, siornatigut aningaasaqarnermut ataatsimiititaliamut taamaallaat tunniussisoqartarnikuugaluarpoq.

Kinguneqartitsisoqassanngilaq

Kisianni aningaasat atorneqartut, kommunip nammineq aningaasaatiginngisai missingersuutinullu ilaanngitsut atorneqarsimapput, tamannalu inatsisinik malinninnginnertut taaneqartariaqarluni, tamatumalu saniatigut illit aningaasaqarnermut ataatsimiititaliap siulittaasuatut kiisalu aningaasaqarnermut ataatsimiititaliami ilaasortaqatitit aatsaat aprilimi ilisimatinneqarsimavusi pissutsit qanoq innerinik, kinguneqartitsissavisi?

- Naamik! Taama isumaqarpunga kinguneqartitsinissamut pissutissaqanngitsoq. Ukiorpassuarni naatsorsuuserinermi ajornartorsiuteqarsimanngilagut, taamaallaat ukiuni kingullerni, tassani aaqqissuussaanerup annertuumik allanngortiterneqarnera ingerlasimavoq, tamatumalu saniatigut aningaasaqarnermik aqutsinermi systemimut nutaamut ikaarsaarsimalluta, taannalu naatsorsuuserinermi ajornartorsiuteqalersitsisimavoq, tassami nutaamik systemimik atuilernissaq ajornaatsuusimanngimmat. Kisianni maanna killiffitsinni isumannaatsumik ingerlatsisoqarpoq, taamaammallu qulakkeersinnaavarput taamatut kukkusoqaqqissanngitsoq, taamaattumik isumaqarpunga kinguneqartitsisoqassanngitsoq, borgmesteri Stine Egede Sermitsiamut oqarpoq.

Borgmesterip ilanngullugu erseqqissaatigaa suliat torersumik ingerlanneqarnerat  aningaasaqarnermut pisortamik nutaamik atorfinitsitsisoqarnerata kingunerisaanik (februaarimi 2024, aaqq.) suli pitsaanerulersimasoq, borgmesterilu naapertorlugu kommunip ataani immikkoortortaqarfinnik tamanik aningaasaqarnikkut aqutsinermik nakkutilliilluarneq qulakkeerneqarsimavoq aningaasaqarnikkullu aalajangiussatigut ineriartortitsinermi missingersuutinut malinninneq nakkutigisaallualerluni.

Kommunip akiliisinnaassusia qulakkeerneqassaaq taarsigassarsiat qaffanneqarpata

Kommuni maanna Namminersorlutik Oqartussat peqatigalugit oqaloqatigiissuteqarpoq kommunip kassekreditip 25 millionit koruuninit 100 millionit koruuninut qaffaaviginissaanut qinnuteqaataa pillugu. Namminersorlutik Oqartussat akuersippata, A-skattit kinguaattoorutit sinneri nunatta karsianut kommunip akilissavai taamaalillunilu ernianik pilersitsineq pinngitsoortillugu.

Kisianni 75 millionit koruuninik qaffaaneq kommunip aningaasaqarneranut ajoqusiisinnaavoq, qanoq iliuuseqassavisi aniguiniarnissinnut?

- Ernumanartoqanngilaq. Kujallermi Illuutit A/S-imik kommunitsinni matuneqarnissaa kommunalbestyrelsimi aalajangernikuuarput, taamaattumik 25 million koruuninik taarsigassarsinikuuvugut.

- Matusinerummi nassataanik ingerlatseqatigiiffiup akiitsui isumagisassarilersimavagut, isumaginikuuagullu taarsigassarsinikkut, maannalu tamanna isumannaarneqareerpoq, taamaattumik kommunip akiliisinnaassusaa qulakkeerniagassaraarput, tamannalu pissaaq taarsigassarsiatta qaffanneratigut, taamaalilluni 65 million koruuninik amigartooruteqarneq atuukkallassaaq piffissami sivikitsumi, taamaattumik aarlerinartoqanngilaq, borgmester Stine Egede (IA) akivoq.