Arctic Circle Business nutaamik pisortassarsiulerpoq

Tuttunniarfiup nalaani tuttunik qinaasiuffiuleruttornerani, Arctic Circle Business pisortassamik qinaasisussanngorpoq. 

Arctic Circle Businessimi pisortaq atorfimminiit tunuartussanngorpoq:

- Nunap immikkoortuani periarfissanik nuanningaartunik peqarluarpoq, ingammik inuunerup suliffiullu ataqatigiinnissaannut, pinngortitap tunuliaqutaasigut kangerluillu aqqutigalugit periarfissat pilersitaat pissutigalugit. 

Sermersuup sineriaanut aqqut najukkami inuussutissarsiornermilu peqqinnartumik immikkuullarissumillu ineriartortitsivoq, neriuppungattaaq Sisimiup, Maniitsup Nuullu akornanni imaatigut aqqut aamma nukittunerulerumaartoq. Ineriartornermullu tamatumunnga peqataasimanera tulluusimaarutigeqaara, Jesper Schrøder tusagassiutinut nalunaarummi allappoq.

Siulersuisuni siulittaasoq Sofie Frydenrejn Johansenip paasissutissiissutigaa Jesperip tunuarnissani nammineq kissaatigigaa.

- Malunnaatilimmik allannguisimavoq

-  Suliffeqarfimmut Arctic Circle Businessimut malunnaatilimmik allannguisimavoq, ullumikkullu inissisimaffitsinnut qaffassinnerusumut sunneeqataangaatsiarsimalluni, sulisuvut pikkorissut, suleqativut suliffeqarfiillu ilaasortaasut suleqatiginerasugut, Arctic Circle Businessimi siulersuisuni siulittaasoq, Sofie Frydenrejn Johansen oqarpoq.

Arctic Circle Business allappoq Jesper piffissami corona tuniluunnerata nalaani suliffeqarfitsinni sulisimasoq, taamaakkaluartoq Kangerlussuup siunissaa pillugu nalunaarusiaq, Arctic Circle Road pillugu nalunaarusiaq; silap pissusaanut tunngasut pillugit nalunaarusiaq aammalu 2019-imi takornariaqarneq pillugu ataatsimeersuartitsineq aaqqisueqataaffigisimagaa.

Sisimiuni Qulleq fablab aamma pilersitseqataaffigivaa, nunap immikkoortortaani eqqumiitsuliornermi suliniutinik arlalinnik ineriartortitseqataasimavoq ilaatigullu aamma nunap immikkoortortaani avammut nittarsaassineq ineriartortitsifigeqataasimallugu. 

Minnerunngitsumillu aamma inuussutissarsiornermik siuarsaaniarnermut tapiisutit misiliutaasumik piffissalerneqarsimasoq akisussaafigisimavaa, suliniutinillu pissanganartunik arlalinnik ukiuni aggersuni piviusunngortinneqartussanik suli peqarlunilu.

Arctic Circle Businessimi pisortatut atorfik qanittukkut inuttassarsiuunneqassaaq.